ފޯޅަވައްސާ ދިމާލުން ދިވެހިރާއްޖޭގެ ކަނޑުގެ އިން ކަނޑައެޅި މައްސަލައިގައި ސަރުކާރުން އަމަލު ކުރި ގޮތް ކުށްވެރިކުރަން ޕީޕީއެމް އިސްވެ އޮވެ، އިދިކޮޅު ފަރާތްތާ ގުޅިގެން ރޭ ބޭއްވި ޖަލްސާގައި "އިންޑިއާ އައުޓް" ޖަހާފައިވާ ބެނާއެއް ދެމުމުގެ ފަހަތުގައި ވަނީ ސަރުކާރު ކަމަށް، އެމްޑީޕީގެ ރައީސް މުހައްމަދު ނަޝީދުގެ ހިޔަނީގައި އުފައްދަން މަސައްކަތްކުރާ ދަ ޑިމޮކްރެޓްސްއިން ތުހުމަތުކޮށްފި އެވެ.
އިންޑިއާ ސިފައިން ދިވެހިރާއްޖޭގައި ގާއިމުވެ ތިބުމާ ދެކޮޅަށް އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް އިން ފެށި އިންޑިއާ އައުޓް ކެމްޕެއިން ހުއްޓުވަން ސަރުކާރުން މީގެ ކުރިން ވަރަށް ބޮޑަށް މަސައްކަތް ކުރި އެވެ. އެ ކެމްޕެއިން މަނާ ކުރަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ގަރާރެއް ވެސް ނެރުއްވިއިރު، އިންޑިއާ އައުޓު މައްސަލައިގައި ނަޝީދު ވެސް ޕީޕީއެމް އަށް ވަރަށް ބޮޑަށް ފާޑުވިދާޅުވެފައިވެ އެވެ.
ނަޝީދުގެ ދަ ޑިމޮކްރެޓްސްއަށް ނިސްބަތްވާ، ރައްޔިތުންގެ މަޖިލީހުގެ ބައެއް މެމްބަރުން ބައިވެރިވި ރޭގެ ޖަލްސާގެ ފަހަތުގައި ހުދުކުލައިގެ ޓީޝާޓު ލައިގެން ތިބި ޒުވާނުންތަކެއް އިންޑިއާ އައުޓު ލިޔެފައިވާ ބެނާއެއް ދެމި އެވެ. އަދި އިންޑިއާ ސިފައިން ރާއްޖޭން ބޭރުވާން ގޮވި އެވެ.
މި މައްސަލައިގައި އެހެން އެއްވެސް ޕާޓީއަކުން ރަސްމީކޮށް ބަހެއް މިހާތަނަށް ބުނެފައި ނުވާއިރު، އުފައްދާން މަސައްކަތް ކުރާ ދަ ޑިމޮކްރެޓްސްއިން ނެރުނު ބަޔާނެއްގައި ބުނީ އެ ބަނާ ބަޔަކު ނެގީ، ޖަލްސާގެ މަގުސަދު އޮޅުވައިލުމަށް ކަމަށެވެ.
ބެނާ ދެމި ބަޔަކު އަކަން ކުރީ ރޭގެ ޖަލްސާއަކީ އެކުވެރި ގައުމުތަކާއި ބައިނަލްއަގުވާމީ ގައުމުތަކާ ދެކޮޅު ހަރަކާތެއްކަން ދެއްކުމުގެ ބޭނުމުގައި ކަމަށާއި އެއީ ހަޑިހުތުރު އަމަލެއް ކަމަށް އެ ޕާޓީން ބުންޏެވެ. ނަމަވެސް، އެކަން ކުރީ އެހެން ބައެއް ކަމަށް ދެއްކުމަށް ދަ ޑިމޮކްރެޓްސްއިން ބުނާ ބުނުން ފިޔަވައި އިތުރު ހެއްކެއް ނެތެވެ.
އަވަށްޓެރި ނުވަތަ ބައިނަލްއަގުވާމީ އެއްވެސް ބައިވެރިއަކާ ދެކޮޅަށް ޑިމޮކްރެޓުން މިފަދަ ހަރަކާތަކާ ގުޅިވަޑައިނުގަންނަވާނެ ކަމުގެ ޔަގީންކަން އެ ޕާޓީން ދިނެވެ.
ސަރުކާރުން ކުރިމަތި ކުރުވި ފިއްތުންތަކާއެކު އިދިކޮޅުގެ ކެމްޕެއިން މަޑުޖައްސާލާފައި އޮއްވައި މިރޭގެ ޖަލްސާގައި ބެނާއެއް ދެމީ އެކަމަށް ތައްޔާރުވެގެން ގޮސް ތިބި އަށް ވަރަކަށް މީހުން ހިމެނޭ ޒުވާނުންގެ ޓީމެކެވެ. އެމީހުން ތިބީ ހުދު ކުލައިގެ ޓީޝާޓެއްގައި އިންޑިއާ އައުޓް އިނގިރޭސި ބަހުން ޖަހައިގެނެވެ. ބެނާގައި ވެސް އޮތީ އެހެނެވެ.
އެ ޒުވާނުން އިންޑިއާ އައުޓް ބެނާ ދެމީ އެއްވެސް ސިޔާސީ ފަރާތަކާ ގުޅިގެންކަން މިހާތަނަށް އެނގިފައެއްނުވެ އެވެ.
ފޯޅަވައްސާއި ދިވެހިރާއްޖެއާ ދެމެދު އޮތް ކަނޑުގެ ފުށުއަރާ ސަރަހައްދު ބަހަން ޖެހުނީ ފޯޅަވަހީގެ ސިޔާދަތީ ބާރު މޮރިޝަސް އަށް އޮތް ކަމަށް ކަނޑައެޅުމުން އެ ގައުމުން ދާދި ފަހުން ހުށަހެޅި މައްސަލައަކާ ގުޅިގެންނެވެ.
