ރާއްޖޭގެ ކަނޑުން ބައެއް ވިއްކާލާފައިވާ ކަމަށް ބުނެ ފޯޅަވަހި ކޯލިޝަނުން މިރޭ ބޭއްވުމަށް ތައްޔާރުވަމުންދާ ޖަލްސާއިން ރައްޔިތުންގެ މެދުގައި ފިތުނަ ފަސާދަ އުފެއްދުން ނޫން ނަތީޖާއެއް ނުނެރެވޭނެ ކަމަށް ޖުމްހޫރީ ޕާޓީގެ ލީޑަރު، ގާސިމް އިބްރާހިމް މިއަދު ވިދާޅުވެއްޖެ އެވެ.
ގާސިމް އެހެން ވިދާޅުވީ މފޯޅާވަހި ކޯލިޝަނުން ބާއްވާ އެއްވުމަށް ޖުމްހޫރީ ޕާޓީގެ އެއްވެސް މެމްބަރަކު ނުދިއުމަށް މީގެ ކުރިން ކުރެއްވި އިލްތިމާސްއާ ގުޅިގެން އާންމުންނާއި ސިޔާސީ ބައެއް ފަރާތްތަކުގެ ފާޑުކިޔުން އޭނާއަށް އަމާޒުވެވުމާ ގުޅިގެން މިހާރު ވީޓީވީގައި ދެމުން ގެންދާ ބަސްދީގަތުމުގަ އެވެ.
"މިރޭގެ ނަތީޖާއިން ދެން ކުރެވޭނެ ކަމަކީ ތަފާތު ގިނަ ވާހަކަދައްކައިގެން ރައްޔިތުންގެ މެދުގައި ފަސާދަ އުފެއްދުން، ފިތުންވެރިވުން، އެ ނޫން އެއްވެސް ކަމެއް ނޯންނާނެ ކުރެވޭނެ، ނަތީޖާއެއް ނޯންނާނެ ނެރެވޭނެ،" ގާސިމް ވިދާޅުވި އެވެ.
ޖުމްހޫރީ ޕާޓީގެ ރިޔާސީ ކެންޑިޑޭޓުގެ ގޮތުގައި ވެސް ހުންނެވި، ގާސިމް ވިދާޅުވީ ރާއްޖޭގެ އިން ކަނޑައެޅުމުގެ މައްސަލައިގައި އެންމެ ފުރަތަމަ ވެސް ބަޔާނެއް ނެރުނީ ޖުމްހޫރީ ޕާޓީން ކަމަށާއި އޭގެފަހުން ވެސް ސިލްސިލާކޮށް އެކަމާ ގުޅިގެން ވާހަކަތައް ދައްކާފައި ވާނެ ކަމަށެވެ.
އެހެން ނަމަވެސް އިޓްލޮސް އިން ނިންމި ނިންމުމަށް ބަދަލު ގެންނަން ކުރަންޖެހޭ ކަމަކީ އެކަން ހައްލު ކުރެވެން ގާނޫނީ ގޮތުން ކުރެވޭނެ ކަމެއް އޮތްތޯ ބަލައި މައްސަލަ ހުށަހަޅާނީ އިޓްލޮސްއަށްތޯ ނުވަތަ އެހެން ތަނަކަށްތޯ ބަލައި އެކަން ކުރުން ކަމަށެވެ.
"މިރޭ ބާއްވަން އުޅޭ ބައްދަލުވުމުން އެއްވެސް ބަދަލެއް ގެނެވިދާނެ ތޯ؟ މިރޭގެ އެއްވުމުން އެއްވެސް ބަދަލެއް އިޓްލޮސްގެ ނިންމުމަކަށް ނާންނާނެ،" މިރޭގެ އެއްވުމުން އެއްވެސް ރަނގަޅު ނަތީޖާއެއް ނުކުންނާނެ ކަމަށް ގަބޫލު ނުކުރައްވާކަން ފާހަގަ ކުރައްވައި ގާސިމް ވިދާޅުވި އެވެ.
