އައްޑޫގެ އިގްތިސާދު ކުރިއެރުވުމަށް ސަރުކާރުން ހިންގަމުންދާ ބިން ހިއްކުމުގެ މަޝްރޫއު މާދަމާ ރަސްމީކޮށް ފަށަން ނިންމާފައިވާ ކަމަށް ޕްލޭނިން މިނިސްޓްރީން ބުނެފި އެވެ.

އައްޑޫ ބިން ހިއްކަނީ ކުރިއަށް އޮތް 50 އަހަރަށް ވާ ވަރަށް ބިން އިތުރުކޮށް، ޓޫރިޒަމް ތަރައްގީކޮށް އިގްތިސާދު ކުރިއެރުވުމުގެ ގޮތުންނެވެ. ބިލިއަނެއްހާ ރުފިޔާގެ މި މަޝްރޫއުގެ ދަށުން، އައްޑުއަށް 194 ހެކްޓަރުގެ ބިން އިތުރުކޮށް، 11 ކިލޯމީޓަރުގެ ޝޯ ޕްރޮޓެކްޝަން ގާއިމްކުރާނެ އެވެ.

އައްޑޫގައި ސަރުކާރުން ހިންގާ ބޮޑެތި މަޝްރޫއުތަކުގެ ޕްރޮޓެކްޓު މެނޭޖްމަންޓު ޔުނިޓު ހިންގުމާ ހަވާލުވެގެން ހުންނެވި ޕްލޭނިން މިނިސްޓްރީގެ ސްޓޭޓް މިނިސްޓަރު އަބްދުﷲ ސޯދިގު "އަދަދު"އަށް ވިދާޅުވީ، އެ މަޝްރޫއުގެ ދަށުން ބިން ހިއްކުމުގެ މަސައްކަތް ރަސްމީކޮށް ފަށަން ހަމަޖެހިފައި ވަނީ މި މަހުގެ ތިން ވަނަ ދުވަހު ކަމަށެވެ.

ކުރިން އައްޑޫގެ މޭޔަރުކުރަން ވެސް ކުރެއްވި ސޯދިގު ވިދާޅުވި ގޮތުގައި، އެ މަސައްކަތް ފައްޓަވައިދެއްވާނީ، ރައީސް އިބްރާހިމް މުހައްމަދު ސޯލިހެވެ.

ރައީސް އިބްރާހިމް މުހައްމަދު ސޯލިހު. -- ފޮޓޯ: ރައީސް އޮފީސް

ހޮނިހިރު ދުވަހު ރައީސް ސޯލިހު އައްޑުއަށް ރަސްމީ ދަތުރުފުޅެއް ކުރައްވަން ހަމަޖެހިފައިވާ ކަމަށް ރައީސް އޮފީހުން ވެސް ވަނީ ބުނެފަ އެވެ. އެކަމަކު، އެ ދަތުރުގެ ތަފްސީލުތަކެއް އަދި ދީފައި ނުވެ އެވެ.

ސޯދިގު ވިދާޅުވި ގޮތުގައި، ބިން ހިއްކުމުގެ މަޝްރޫއުގެ ދަށުން މިހާރު ކުރިއަށްދަނީ ހިއްކުމުގެ ކުރިން، ހިއްކާ ސަރަހައްދުތައް ވަކިކުރަން ބަންޑު ވޯލް ޖެހުމުގެ މަސައްކަތެވެ.

މި މަޝްރޫއުގެ ދަށުން އައްޑޫގެ ރަށްތަކަށް ބިން އިތުރުކުރުމުގެ އިތުރުން، ރިސޯޓު ހަދަން ފަޅުތެރެއިން ތިން ރަށެއް އުފައްދާނެ އެވެ. އަދި, ހަންކެޑެ ކައިރިން ލިންކު ރޯޑު ވަކިކުރުމަށް ފަޅުތެރެއިން މިހާރު ވަނީ ބައެއް ހިއްކައިފަ އެވެ.

އައްޑޫއިން ހިއްކާ ބިންތައް:

• ހިތަދޫއިން 50 ހެކްޓަރުގެ ސަރަހައްދަކާއި 40 ހެކްޓަރުގެ ސަރަހައްދެއް
• މަރަދޫފޭދޫއިން 76 ހެކްޓަރުގެ ސަރަހައްދެއް
• ރިސޯޓު ހަދަން 8.3 ހެކްޓަރުގެ ތިން ރަށް
• ލިންކު ރޯޑް ހަދަން 3.3 ހެކްޓަރު

ލިންކު ރޯޑު ހަންކެޑެއިން ވަކިކުރުމަށް ހިއްކާފައި ސަރަހައްދު

ޕްލޭނިން މިނިސްޓްރީގެ ޓްވިޓާގައި އާންމުކޮށްފައިވާ މައުލޫމާތުތަކުން އެނގޭ ގޮތުގައި ބިން ހިއްކުމުގެ ކުރިން، ހިއްކާ ސަރަހައްދުން މުރަކަތައް ނަގައި އެެހެން ތަންތަނަށް ބަދަލުކުރުމުގެ މަސައްކަތް ވަނީ ނިންމާލައިފަ އެވެ. އެގޮތުން، 70،000 މުރަކަ ކޮލިނީ ރައްކާތެރި ސަރަހައްދަކަށް ބަދަލުކޮށްފައިވާ ކަމަށް މިނިސްޓްރީއިން ބުނެފައިވެ އެވެ.

މި މަޝްރޫއު ނެދަލޭންޑްސްގެ ވެން އޫޑް ކުންފުންޏާ ހަވާލުކޮށްފައި ވަނީ 18 މަސް ދުވަހުގެ ތެރޭގައި ނިންމާ ގޮތަށެވެ.

ބިން ހިއްކާއިރު އުފެދޭ ކިސަޑުގަނޑު އަތޮޅުގެ އެތެރެވަރިއަށް ފޭދިގެން ގޮސް ކަނޑުއަޑީގެ މާހައުލަށް ގެއްލުންވުމުގެ ފުރުސަތު އޮތްކަން ކަމަށް މަޝްރޫއަށް ތައްޔާރު ކުރި އީއައިއޭ ރިޕޯޓުން ވަނީ ހާމަވެފަ އެވެ. އެގޮތުން، އައްޑޫގެ ހިމާޔަތްކޮށްފައިވާ ތިން ސަރަހައްދެއް ކަމަށްވާ މާކަނޑު (މަންޓާ ޕޮއިންޓް)، ކުޑަކަނޑު އަދި ޝިޕްރެކްއަށް ގެއްލުންވުމުގެ ފުރުސަތު ވެސް އޮތްކަން ހާމަވި އެވެ.

އެކަމާ ހެދި، މަޝްރޫއު ހުއްޓާލަން ތިމާވެށި ހިމާޔަތް ކުރަން ވަކާލާތުކުރާ ޖަމިއްޔާތަކާއި މަދަނީ އެހެނިހެން ޖަމިއްޔާތަކުން މީގެ ކުރިން ވަނީ ގޮވައިލައިފަ އެވެ. މަޝްރޫއު ހިންގަނީ ޓޫރިޒަމް ވެސް ކުރިއަރުވަން ކަމަށްވާއިރު، ކަނޑުއަޑީގެ މާހައުލު ހަލާކުވުމުން ކުރެވޭނީ ކޮންކަހަލަ ޓޫރިޒަމެއްތޯ އެ ޖަމިއްޔާތަކުން ވަނީ ސުވާލު އުފައްދައިފަ އެވެ.

މިނިސްޓްރީއިން ބުނީ، މަޝްރޫއުގެ މަސައްކަތް ކުރިއަށްދާއިރު ހުރިހާ މަރުހަލާއެއްގައި ވެސް ތިމާވެށީގެ މޮނިޓަރިން ކުރިއަށްގެންދާނެ ކަމަށެވެ. އަދި ހިއްކާ އިރު ވެއްޓަށް ގެއްލުންކުޑަކޮށް އެކަން ކުރާނެ ކަމަށް ވެން އޫޑް ކުންފުނިން ވަނީ ބުނެފަ އެވެ.

މުހިއްމު ބައެއް ހަބަރު

އެޑިޓަރުގެ ހޮވުން

ދުވަހުގެ ކޯޓޭޝަން

އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް ކަމަށް ރައްޔިތުންގެ މަޖިލީހަށް ހުށަހަޅާފައިވާ މައްސަލައިގެ ދިފާއުގައި ރައްޔިތުންގެ މަޖިލީހަށް އިއްޔެ ފޮނުވި ސިޓީގައި އޭނާ ވިދާޅުވެފައި ވަނީ؛

މި މައްސަލައިގައި އަޅުގަނޑު ނިންމާފައިވާ ނިންމުމަކީ ކަނޑައެޅިގެން ގާނޫނާ ހިލާފު ނިންމުމެއްކަމުގައި ބުނެވޭނެ ގާނޫނީ މަރުކަޒެއް، އެއްވެސް ހެއްކެއް އަދި ގަރީނާއެއް ވެސް މައްސަލަ ހުށަހެޅުއްވި މެންބަރުން ދައްކަވާފައި ނުވޭ."

ދުވަހުގެ ފޮޓޯ

މިހާރު ކުރިއަށްދާ ހޭންޑުބާޅަ މުބާރާތުގައި ރޭ ތުޅާދޫ އާއި ޒެފްރޯލް ބައްދަލުކުރި މެޗުގެ ތެރެއިން. -- ފޮޓޯ: އަބްދުﷲ އިޔާން/އަދަދު