ޔޫކްރެއިންގެ ބޯޑަރު ހުރަސްކޮށް ރަޝިއާގެ ބެލްގޮރޯޑް ސަރަހައްދަށް އަނެއްކާވެސް ހަމަލާތަކެއް އަމާޒުވެ އަށް މީހުންނަށް އަނިޔާވެއްޖެ އެވެ.
ރަޝިއާގެ ޑިފެންސް މިނިސްޓްރީން ތުހުމަތު ކުރީ ޔޫކްރެއިނުން އެ ގައުމުގެ ފަސްގަނޑަށް އަރައި، އެ ސަރަހައްދު ހިފަން އުޅޭ ކަމަށެވެ.
އެ ތުހުމަތާ ގުޅޭ ގޮތުން ޔޫކްރެއިނުން ވަކި އެއްޗެއް ނުބުނެ އެވެ. އެކަމަކު މީގެ ކުރިން ޔޫކްރެއިނުން ބުނީ ބޯޑަރު ހުރަސްކޮށް ރަޝިއާއަށް ދޭ ހަމަލާއެއްގައި އެ ގައުމުން ބައިވެރިނުވާ ކަމަށެވެ.
ބެލްގޮރޯޑްގެ ގަވަރުނަރު ވިޔަޗެސްލާވް ގްލަޑްކޯވް ވިދާޅުވީ ބުރާސްފަތި ދުވަހު އެ ހިސާބުގެ ގިނަ ޑިސްޓްރިކްޓުތަކަށް ޔޫކްރެއިން ސިފައިންގެ ހަމަލާތައް އަމާޒުވި ކަމަށެވެ.
އެއްވެސް މީހަކު މަރުވި ކަމުގެ ރިޕޯޓެއް ނެތް ނަމަވެސް، އެތައް ހާސް އާއިލާއެއް ރައްކާތެރި ހިސާބުތަކަށް ބަދަލުކޮށްފައިވާ ކަމަށް ގްލަޑްކޯވް ވިދާޅުވި އެވެ.
އޭގެ އިތުރުން ބެލްގޮރޯޑް ސިޓީގައި އެއްޗެއް ގޮވި ކަމަށް ވެސް އޭނާ ވިދާޅުވި އެވެ. ބެލެވޭ ގޮތުގައި އެއީ ޑްރޯނެއްގެ ސަބަބުން ހިނގި ގޮވުމެކެވެ. އެ ހާދިސާގައި ދެ މީހުންނަށް އަނިޔާވި އެވެ.
ރަޝިއާ ސަރުކާރުގެ ތަރުޖަމާން ޑިމީޓްރީ ޕެސްކޯވް ވިދާޅުވީ ބެލްގޮރޯޑްގެ ހާލަތާ ގުޅޭ ގޮތުން ރައީސް ލެޑިމިއަ ޕުޓިންއަށް ގަވާއިދުން މައުލޫމާތު ފޯރުކޮށްދެމުންދާ ކަމަށެވެ.
ބައިނަލްއަގްވާމީ މުޖުތަމައިން ޔޫކްރެއިން ކުށްވެރި ނުކުރާތީ އޭނާ ފާޑުވިދާޅުވި އެވެ. ފަހަކަށް އައިސް ރަޝިއާގެ އެތެރޭގައި ދޭ ހަމަލާތައް ވަނީ އިތުރުވެފަ އެވެ.
