ރައްޔިތުންގެ މަޖިލީހުގެ ރިޔާސަތު ބެލެހެއްޓެވުމުގައި މަޖިލީހުގެ ރައީސް މުހައްމަދު ނަޝީދު ކަންތައްތައް ކުރައްވާ ގޮތުން އެމަނިކުފާނުގެ އިތުބާރު ގެއްލެން ފަށައިފި ކަމަށް މަޖިލީހުގެ މެޖޯރިޓީ ލީޑަރު މުހައްމަދު އަސްލަމް ވިދާޅުވެއްޖެ އެވެ.
އެޓާނީ ޖެނެރަލް އިބްރާހީމް ރިފްއަތުގެ އިތުބާރު ނެތް ކަމަށް ކަނޑައަޅަން އިދިކޮޅުން މަޖިލީހަށް ވެއްދުމުން، އެކަމުގައި އިޖުރާއީ ސުވާލުތައް އުފައްދަވައި ނަޝީދު ވަނީ އެ މައްސަލަ ޕާކްކުރައްވައިފަ އެވެ.
އެކަން ހިނގައިދިޔަ ގޮތާ މެދު "އަދަދު" އިން ކުރި ސުވާލަކަށް ޖަވާބުދެއްވަމުން އަސްލަމް ވިދާޅުވީ އެ މައްސަލާގައި ސުވާލު އުފައްދަވައިގެން އުޅުއްވަނީ މަޖިލީހުގެ "ވަގުތު ނަގައިލަން" ކަމަށެވެ. އެކަމުގައި ސުޕްރީމް ކޯޓުގެ އިސްތިޝާރީ ލަފައެއް ހޯއްދަވަން ނަޝީދު އުޅުއްވަނީ އެގޮތުން ކަމަށް އޭނާ ތުހުމަތު ކުރެއްވި އެވެ.
"އުނދަގޫ މައްސަލައެއް މިއީ. މަޖިލީހުގެ ރައީސްގެ އިތުބާރު ގެއްލޭ ހިސާބަށް މިދަނީ މިހާރު،" އަސްލަމް ވިދާޅުވި އެވެ.
އަސްލަމް ދެކެވަޑައިގަންނަވާ ގޮތުގައި އިތުބާރުގެ މައްސަލަތަކުގައި ވަޒީރުން މަޖިލީހަށް ޖަވާބުދާރީ ވެވަޑައިގެންނެވުމަކީ ހައްގެއް ކަމަށް ވާތީ އެ ހައްގު ދޫކޮށްލެއްވުމުގެ އިހުތިޔާރު ވަޒީރުންނަށް އޮންނާނެ އެވެ. ގާނޫނުއަސާސީއާއި ރައްޔިތުންގެ މަޖިލީހުގެ ގަވާއިދުގައި ވެސް އެކަން އޮތީ ވަރަށް ސާފުކޮށެވެ.
"މަޖިލީހުގެ މެމްބަރުން މަޖިލީހުގެ ގަވާއިދު ހެދި އިރު ހަމަ ގާނޫނުއަސާސީގައި އޮންނަ ގޮތަށް އެ މާއްދާ ލިޔެފައި އޮތީ،" އަސްލަމް ވިދާޅުވި އެވެ.
އިތުބާރުގެ މައްސަލަ ތަކުގައި ވަޒީރުން މަޖިލީހަށް ޖަވާބުދާރީވުމުގެ ހައްގުގެ ވާހަކަ އޮތީ ގާނޫނު އަސާސީގެ 101 ވަނަ މާއްދާގަ އެވެ. އެ މާއްދާގެ (ށ) ގައި އޮންނަނީ "މި މާއްދާގެ (ހ) ގައި ބަޔާންކޮށްފައިވާ ފަދަ ހުށަހެޅުމަކާ މެދު ރައްޔިތުންގެ މަޖިލީހުގައި ބަހުސް ފެށުމުގެ ސާދަ ދުވަސް ކުރީން ވަޒީރުންގެ މަޖިލީހުގެ އެ މެންބަރަކަށް އެ ކަން އަންގާންވާނެއެވެ. އަދި އެ ބަހުސްގައި އަނގަބަހުންނާއި ލިޔުމުން އޭނާގެ ދިފާޢުގައި މަސައްކަތްކުރުމުގެ ހައްގު އެ މެންބަރަކަށް ލިބިގެންވެއެވެ،" މިހެންނެވެ.
މަޖިލީހުގެ ގަވައިދުގެ 207 ވަނަ މާއްދާގެ (ށ) ގައި ވެސް އޮތީ ހަމަ މި އިބާރާތެވެ.
"އެހެންވީމާ މާނަ ވަރަށް ސާފު، މާނައަކީ އަނގަބަހުން ބޭނުން ވެއްޖެއްޔާ އަނގަބަހުން، ލިޔުމުން ބޭނުންވެއްޖެއްޔާ ލިޔުމުން، އަދި ދެގޮތަށް ބޭނުމިއްޔާ ދެގޮތަށް ވެސް ޖަވާބުދާރީ ވެވިދާނޭ،" އަސްލަމް ވިދާޅުވި އެވެ.
ޖަވާބުދާރީ ވުމަކީ ހައްގެއް ކަމަށް ވާތީ އަސްލަމް ދެކެވަޑައިގަންނަވާ ގޮތުގައި ޖަވާބުދާރީ ވެވަޑައިނުގަތުމަކީ ވެސް ވަޒީރަށް އޮތް އިހުތިޔާރެކެވެ.
"އެގޮތަށް ހުޅުވައިލެވިފައި ވަރަށް ސާފުކޮށް އޮތް މާއްދާއެއް. މިހާރު ކުއްލިއަކަށް އެ ވެސް މާނަކުރަން [ސުޕްރީމްކޯޓަށް] ދާން ޖެހިއްޖެ،" އޭނާ ވިދާޅުވި އެވެ.
އޭނާ ފާހަގަ ކުރެއްވި އަނެއް ނުކުތާ އަކީ އިތުބާރުގެ މައްސަލަތައް މަޖިލީހުގައި މީގެ ކުރިން އެކި ގޮތް ގޮތަށް ނިންމާފައި ވުމެވެ. ބައެއް ވަޒީރުންނާއި ނައިބު ރައީސެއްގެ އިތުބާރުގެ މައްސަލަަ ވެސް މަޖިލީހުން މީގެ ކުރިން ވަނީ ނިންމައިފަ އެވެ. އޭގެ ތެރޭގައި ޖަވާބުދާރީ ވީ ފަހަރުތަކާއި ޖަވާބުދާރީ ނުވި ފަހަރުތައް ވެސް ހިމެނޭ ކަމަށް އޭނާ ވިދާޅުވި އެވެ.
މި މައްސަލައާއި މިނޫން ވެސް އެތައް ކަމެއްގައި މަޖިލީހުގެ ރައީސް މުހައްމަދު ނަޝީދުގެ އިތުބާރު ގެއްލެމުންދާ ކަމަށް ވިދާޅުވި ނަމަވެސް ނަޝީދުގެ އިތުބާރު ނެތް ކަމަަށް މަޖިލީހަށް މައްސަލައެއް ވައްދާނެ ކަމަކަށް ނުވަތަ ނޫން ކަމަކަށް ވެސް އަސްލަމް ވިދާޅެއް ނުވެ އެވެ.
މަޖިލީހުގެ ރައީސްގެ މަގާމުގައި ހުންނަވާ ބޭފުޅަކު އެ މަގާމުން ވަކިކުރަން ހުށަހެޅޭނީ މަޖިލިހުގެ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ މެމްބަރުންގެ ސޮޔާއެކު ހުށަހަޅާ ގަރާރަކުންނެވެ. އެއީ މިހާރު ތިއްބެވި 87 މެންބަރުންގެ ތެރެއިން 22 މެމްބަރުންގެ ސޮޔެވެ.
އަދި, މަޖިލިސް ރައީސްގެ އިތުބާރު ނެތް ކަމަށް ދެބައިކުޅަ އެއްބައި މެންބަރުންގެ ވޯޓުން ފާސްވާނެ އެވެ. އެއީ 44 މެންބަރުންނެވެ. އެ އަދަދަށް އެމްޑީޕީގެ ޕީޖީގައި މެމްބަރުން ތިއްބަވާނެ އެވެ.
