މާލެއިން ފުރައިގެން 15 މީހުންނާއެކު ރ. މަޑުއްވަރި އަށް ދަތުރުކުރަމުން ދިޔަ މުދާ އުފުލާ ބޯޓެއް އަޑިއަށް ގޮސްފި އެވެ.
"މަޑުއްވަރީ މަސްވެރިން" ފޭސްބުކް ޕޭޖަކުން ކޮށްފައިވާ ޕޯސްޓެއްގައި ބުނެފައިވަނީ "އާލާ" ބޯޓަށް ދިޔަވާން ފެށީ ބޯޓުގެ ފަހަތުން ރާޅެއް އަރައިގެން ކަމަށެވެ.
އެމްއެންޑީއެފުން ބުނީ އެ ބޯޓު މިހާރު އަޑިއަށް ގޮސްފައިވާ ކަމަށެވެ. އެމްއެންޑީއެފްއިން ހިއްސާކުރި ފޮޓޯއިން ފެންނަ ގޮތުގައި ފެނުން މައްޗަށް ފެންނަން ހުރީ ދިރުނބާކޮޅުގެ ކުޑަ ތަންކޮޅެކެވެ.
އެ ބޯޓުގައި ހަރުކޮށްފައިވާ ޓްރެކިން ސިސްޓަމުން ދައްކާ ގޮތުން ބޯޓު މިވަގުތު އޮތީ ބ. އޭދަފުށީގެ އިރުން ހަތަރު ވަރަކަށް މޭލު ބޭރުގަ އެވެ. ބެލެވޭ ގޮތުގައި ރާޅުއެރިއިރު ބޯޓު ދަތުރުކުރަމުންދިޔައީ ކާށިދޫ ކަނޑު ހުރަސްކޮށް ބ. އަތޮޅަށް ވަނުމަށެވެ.
ބޯޓުގައި ތިބި މީހުން އެމްއެންޑީއެފްގެ އެހީގައި ވަނީ އޭދަފުއްޓަށް ގެންގޮސްފަ އެވެ.
