ވޮޝިންޓަން، އެމެރިކާ (ޖޫން 1) - ޔޫކްރެއިނަށް އިތުރު 300 މިލިއަން ޑޮލަރުގެ ހަތިޔާރު ޕެކޭޖެއް އިއުލާން ކުރުމަށް ފަހު، އެމެރިކާގެ ހަތިޔާރު ބޭނުންކޮށްގެން ރަޝިއާގެ ބިމުގެ ސަރަހައްދަށް ހަމަލާތައް ނުދިނުމަށް އެމެރިކާއިން ޔޫކްރެއިނަށް އިންޒާރު ދީފި އެވެ.
އަލަށް ފާސްކުރި ޕެކޭޖުގައި އެއާ ޑިފެންސް ސިސްޓަމްތަކާއި އެތައް ހާސް ވަޒަން ހިމެނެ އެވެ.
"ޕްރައިވެޓްކޮށް ދެކެވޭ ވާހަކައިގައި އަޅުގަނޑުމެން ވަރަށް ސާފުކޮށް އެބަ ބުނަން. އަދި އާއްމުކޮށް ދެކެވޭ ވާހަކައިގައި އެއަށްވުރެ ސާފު ސީދާކޮށް އެބަ ބުނަން. ރަޝިއާ ތެރޭގައި ހަމަލާ ދިނުމަށް އަޅުގަނޑުމެން ތާއީދެއް ނުކުރަަމޭ،" ނޭޝަނަލް ސެކިއުރިޓީ ކައުންސިލްގެ ތަރުޖަމާން ޖޯން ކާބީ ނޫސްވެރިންނަށް ވިދާޅުވި އެވެ.
ޑިފެންސް ޑިޕާޓްމަންޓުން ބުނީ އާ ޕެކޭޖާ އެކު އެމެރިކާއިން މިހާތަނަށް ޔޫކްރެއިނަށް ފޯރުކޮށްދީފައިވާ އަސްކރީ އެހީގެ އަދަދު 37.6 ބިލިއަން ޑޮލަރަށް އަރާނެ ކަމަށެވެ.
"ހަނގުރާމައިގައި ޔޫކްރެއިނަށް ބޭނުންވާ ތަކެތި ފޯރުކޮށްދިނުމަށާއި ދިގު މުއްދަތުގެ ސެކިއުރިޓީ ވަރުގަދަ ކުރުމަށް ބޭނުންވާ ކަންކަން ކުރުމުގައި އެމެރިކާ އާއި އެކުވެރި އެހެން ގައުމުތައް ގުޅިގެން މަސައްކަތް ކުރަމުން ދާނެ،" ޕެންޓަގަންއިން ނެރުނު ބަޔާނެއްގައި ބުންޏެވެ.
އެމެރިކާގެ އިތުރުން ނޭޓޯގެ އެހެން ގައުމުތަކުން ވެސް ދަނީ ހަތިޔާރާއި އެހެނިހެން އެހީ ޔޫކްރެއިނަށް ފޯރުކޮށްދެމުންނެވެ.
ރަޝިއާގެ އެތެރޭގައި ހަމަލާ ދިނުމާ ދެކޮޅަށް އެމެރިކާއިން ވާހަކަދެއްކި އިރު، ޔޫކްރެއިނުން ދާދި ފަހުން ވަނީ މޮސްކޯގެ މީހުން ދިރިއުޅޭ އިމާރާތްތަކެއް ހުންނަ ހިސާބަކަށް ޑްރޯންތަކެއް ފޮނުވައިފަ އެވެ. އޭގެ ތެރެއިން ތިން ޑްރޯން ވެއްޓުނީ އިމާރާތްތަކަށެވެ.
