ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ތާއީދުގެ ސަޕޯޓަރުން އުފައްދަން މަސައްކަތްކުރާ އާ ޕާޓީ "ދަ ޑިމޮކްރެޓްސް" ރަޖިސްޓްރީ ކުރަން ބޭނުންވާ މެމްބަޝިޕް ފޯމްތައް މާދަމާ އިލެކްޝަންސް ކޮމިޝަނަށް ހުށަހަޅަން ނިންމައިފި އެވެ.
ދަ ޑިމޮކްރެޓްސް އިން ސޯޝަލް މީޑިއާގައި އާއްމުކުރި މައުލޫމާތުގައިވާ ގޮތުން، އެ ޕާޓިީއަށް ވަންނަން މީހުން ފުރާފައިވާ ފޯމުތައް މާދަމާ އީސީއަށް ހުށަހެޅުމަށް ޓަކައި އެންމެ ލަސްވެގެން މިރޭ އެ ފޯމްތައް އެއްތަން ކުރަން އަންނަނީ މަސައްކަތްކުރަމުންނެވެ. މިރޭ އެންމެ ލަސްވެގެން 11:00 ގެ ކުރިން ފޯމްތައް ބޮޑުފެންވަޅުގެއަށްް ގެންދަން، އެޕާޓީގެ ހަރަކާތްތެެރިންނަށް ވަނީ އަންގައިފަ އެވެ.
ނަޝީދު އަޑީގައި ހުރެގެން ޕާޓީއެއް އުފެއްދުމުގެ މަސައްކަތް ފެށީ އެމްޑީޕީގެ ރިޔާސީ ޕްރައިމަރީން އެ މަނިކުފާނު ބަލިވުމަށް ފަހު އެވެ. ނަމަވެސް ރަސްމީކޮށް މަސައްކަތް ފަށާއި، ޕާޓީ ހަދާކަން އިއުލާނު ކުރީ އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް ކަމަށް، އޭރު ފިކުރެއްގެ ދިރުމަށް ނިސްބަތްވާ މެދު ހެންވޭރު ދާއިރާގެ މެމްބަރު އަލީ އާޒިމް ސޮއި ކުރުމާއެކު އޭނާ އެމްޑީޕީން ވަކިކޮށްފައި ވަނިކޮށެވެ.
އާޒިމް ހިމެނޭހެން ނަޝީދަށް ތާއީދުކުރައްވާ ރައްޔިތުންގެ މަޖިލީހުގެ 13 މެމްބަރަކު ވަނީ އެމްޑީޕީން ވަކިވެފަ އެވެ. ނަމަވެސް ނަޝީދު އަދި ހުންނެވީ އެމްޑީޕީގަ އެވެ.
ދަ ޑިމޮކްރެޓްސް ޕާޓީ އުފެއްދުމުގެ ހުއްދަ އިލެކްޝަންސް ކޮމިޝަނުން ދިނީ މިދިޔަ ހަފުތާގެ ބުދަ ދުވަހުގެ އެވެ. ސިޔާސީ ޕާޓީއެއް ރަޖިސްޓްރީކޮށްދޭނީ މަދުވެގެން ސައްހަ 3،000 މެންބަރުންގެ ފޯމު އޮވެގެންނެވެ.
