މޮސްކޯ، ރަޝިއާ (މޭ 30) - ޔޫކްރެއިންގެ ވެރިރަށް ކިޔެވްއަށް ރަޝިއާއިން ޑްރޯން ހަމަލާ ފޮނުވާތާ ތިން ދުވަސް ފަހުން، މޮސްކޯގެ އިމާރާތްތަކަކަށް ވެސް ޑްރޯން ހަމަލާތަކެއް އަމާޒުކޮށްފި އެވެ.
ރަޝިއާގެ ޑިފެންސް މިނިސްޓްރީން ބުނީ އެއީ ޔޫކްރެއިންގެ ހަމަލާއެއް ކަމަށެވެ. މޮސްކޯގައި މީހުން ދިރިއުޅޭ އިމާރާތްތަކަށް ވެއްޓުނީ ތިން ޑްރޯން އެވެ.
އޮފިޝަލުން ބުނީ އެއްވެސް މީހަކަށް ސީރިއަސް އަނިޔާއެއް ނުލިބޭ އިރު، އިމާރާތްތަކަށް ކުދި ގެއްލުންތަކެއް ލިބުނު ކަމަށެވެ.
ހަމަލާގައި އަށް ޑްރޯން ބޭނުންކުރި އިރު، އޭގެ ތެރެއިން ފަސް ޑްރޯން ވައްޓާލައި، ތިން ޑްރޯން ޑީއެކްޓިވޭޓް ކުރި ކަމަށް ވެސް ރަޝިއާގެ ޑިފެންސް މިނިސްޓްރީން ބުންޏެވެ.
މީގެ ކުރިން ވެސް ރައީސް ލެޑިމިއަ ޕުޓިންގެ އޮފީސް ހުންނަ ކްރެމްލިންއަށް ހަމަލާ ދޭން އުޅުނު ކަމަށް ރަޝިއާއިން ތުހުމަތު ކުރި އެވެ. ޕުޓިން އަވަހާރަކޮށްލަން މި މަހުގެ ކުރީކޮޅު ދެ ޑްރޯން ފޮނުވި ކަމަށް ބުންޏެވެ.
އެހެން ނަމަވެސް، މިއީ ރަޝިއާގައި މީހުން ދިރިއުޅޭ ހިސާބަކަށް ޑްރޯން ހަމަލާއެއް އަަމާޒުވި ފުރަތަމަ ފަހަރެވެ. ޕުޓިން ވިދާޅުވީ އެ ހަމަލާތަކުން އާއްމުންނަށް ނުރައްކަލެއް ނެތް ކަމަށެވެ.
