އާޓިފިޝަލް ބީޗް ކުރިމަތީގައި, އެމްޑީޕީގެ ހަރުގެ ހުންނަ ތަނުގައި, އަލަށް އުފައްދާ "ދަ ޑިމޮކްރެޓްސް" ސިޔާސީ ޕާޓީގެ ހަރުގެ ހުޅުވައި އެ ޕާޓީއަށް މެންބަރުން ވެެއްދުމަށް ފޯމު ފުރަން ފަށައިފި އެވެ.
ޑިމޮކްރެޓްސްގެ ހަރުގެ އެ ތަނުގައި ހުޅުވުމަށް މިއަދު ހަވީރު އެއްވުމަށް މި ބާއްވަނީ، އެ ތަނުގެ ވެރިފަރާތުން އެ ތަން ހުސްކުރަން އެމްޑީޕީއަށް އެންގުމުން އެ ޕާޓީން އެ މައްސަލާގައި ސިވިލް ކޯޓަށް މައްސަލައެއް ވައްދާފައި ވަނިކޮށެވެ.
އެމްޑީޕީ ހަރުގެ ހިންގަމުން އައި އެ ބިމުގެ ވެރިފަރަތަކީ އެ ޕާޓީގެ ކުރީގެ އެކްޓިވިސްޓް ޝަފިއްޔާ ޒުބައިރެވެ. އެމްޑީޕީ ތެރޭގައި ދެ ފެކްޝަން އުފެދި, ކޯޅުން ބޮޑުވެފައި ވަނިކޮށް ޕާޓީގެ މައި ހަރުގެ ހުސްކުރަން އެންގީ މިދިޔަ މާޗް މަހު ފަހު ދުވަހުގަ އެވެ.
ޑިމޮކްރެޓްކްސް އިން މިއަދު ހަވީރު ހަރުގަ ހުޅުވާ ރަސްމިއްޔާތަށް ނޫސްވެރިންނަށް ދިން ދައުވަތާއެކު، އެ ސަހަރައްދުގައި ތިބި ނޫސްވެރިންނާ ބައްދަލުކޮށް ޝަފިއްޔާ ބުނީ މިހާރު އެ ބިން އޭނާ ކުއްޔަށް ދޫކުރީ ވިޔަފާރިވެރިޔަކަށް ކަމަށެވެ. އެއީ އެ ވިޔަފާރިވެރިޔާ އެހެން ބަޔަކަށް ވެސް ކުއްޔަށް ދެވޭ ގޮތަށެވެ.
އެ އިމާރާތް ޑިމޮކްރެޓުންގެ ފަރާތުން ނަގާފައި ވަނީ އެ ވިޔަފާރިވެރިޔާއާ އެކު ހެދި ސަބް ލީސް އެއްބަސްވުމެއްގެ ދަށުން ކަން އެ ޕާޓީން ވަނީ ކަށަވަރު ކޮށްދީފަ އެވެ.
ޝަފިއްޔާ އަދި އޭނާގެ ވަކީލު ހަމްޒާ ނޫސްވެރިންނާ ވާހަކަ ދައްކަނީ --- ފޮޓޯ: އަބްދުالله އިޔާން/އަދަދު
"މި ތަނަށް އެހެން ޕާޓީގެ ބަޔަކު އައުމަކީ އަޅުގަނޑުމެން ބަލަން ޖެހޭ ކަމެއް ނޫން، އަޅުގަނޑުމެން މި ތަން ކުއްޔަށް ދިނީ ވިޔަފާރިވެރިޔަކަށް، ޑިމޮކްރެޓްސް އިން ދެން ސާފުކުރުން ރަނގަޅު، ސަބްލީޒަށް ކުއްޔަށް ނެގީތޯ،" ޝަފިއްޔާ ބުންޏެވެ.
އެމްޑީޕީން މީގެ ކުރިން ބުނެފައިވާ ގޮތުގައި އެ ޕާޓީގެ ހަރުގެ ހިންގަން ހަދާފައިވާ އެއްބަސްވުމުވެ މުއްދަތު ހަމަވެފައި އޮތް ނަމަވެސް, އަންނަ ރިޔާސީ އިންތިހާބު ނިމެންދެން އެތަނުގައި ތިބެވޭނެ ކަމަށް ވެރިފަރާތުން ބުނެފައިވާ ކަމަށެވެ.
ޖެނުއަރީ 28، ގައި އޮތް އެމްޑީޕީގެ ރިޔާސީ ޕްރައިމަރީން ނަޝީދު ބަލިވި ފަހުން އެމަނިކުފާނަށް ތާއީދުކުރާ މެންބަރުން ގެންދިޔައީ "ފިކުރެއްގެ ދިރުން" ނަމުގައި ވަކި ފެކްޝަނެއް ގޮތަށް ހަރަކާތްތެރިވަމުންނެވެ. ހަރުގެ ހުސްކުރަން ނޯޓިސް ދިނީ ވެސް ޕްރައިމަރީއަށް ފަހުގަ އެވެ.
ނަޝީދުގެ ސަޕޯޓަރުން އެމްޑީޕީން ވަކިވާން ނިންމައި، އާ ސިޔާސީ ޕާޓީއެއްގެ މަސައްކަތް ފެށީ އެ ފެކްޝަންގައި އިސްކޮށް ހަރަކާތްތެރިވަމުން ދިޔަ މެދު ހެންވޭރު ދާއިރާގެ މެންބަރު އަލީ އާޒިމް އެމްޑީޕީން ވަކިކުރަން އެ ޕާޓީގެ ފިޔަވަޅު އަޅާ ކޮމިޓީން ނިންމާފައިވަނިކޮށެވެ.
ޑިމޮކްރެޓްސްގެ މެމްބާޝިޕް ޑްރައިގެ މަސައްކަތްތައް އެ ސަރަހައްދުގައި ކުރިއަށްދަނީ --- ފޮޓޯ: އަބްދުالله އިޔާން/އަދަދު
އާޒިމް ހިމެނޭހެން ނަޝީދަށް ތާއީދުކުރައްވާ ރައްޔިތުންގެ މަޖިލީހުގެ 13 މެންބަރަކު ވަނީ އެމްޑީޕީން ވަކިވެފަ އެވެ. ނަމަވެސް ނަޝީދު އަދި ހުންނެވީ އެމްޑީޕީގަ އެވެ. ރައްޔިތުންގެ މަޖިލީހުގެ ރައީސްގެ މަގާމު ވެސް ފުރުއްވާ ނަޝީދު އެމްޑީޕީގައި މަޑުކޮށްގެން ހުންނެވި ސަބަބެއް އަދި ސާފެއް ނުވެ އެވެ.
ނަޝީދުގެ އިރުޝާދާއެކު އުފައްދަވާ ދަ ޑިމޮކްރެޓްސްއިން މި އަހަރު އޮންނަ ރިޔާސީ އިންތިހާބުގައި ވެސް ވާދަކުރާނެ ކަމަށް ވަނީ އިއުލާންކޮށްފަ އެވެ.
