އެމްޑީޕީ ދޫކޮށް އަލަށް އުފައްދާ ދަ ޑިމޮކްރެޓްސްއަށް ސޮއި ކުރެއްވި ސަރުކާރުގެ ސިޔާސީ މަގާމުތަކުގައި ތިއްބެވި ތިން ބޭފުޅަކު މަގާމުތަކުން ވަކިކުރުމަކީ ދިވެހިންނަށް ދިން ގެއްލުމެއްކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ދަ ޑިމޮކްރެޓްސްއާ ގުޅުމުން މަގާމުން ވަކިކޮށްފައިވަނީ އެންވަޔަރަމެންޓު މިނިސްޓްރީގެ ޑެޕިއުޓީ މިނިސްޓަރު މުހައްމަދު އަންސަރާއި ހޯމް މިނިސްޓްރީގެ ޕޮލިސީ ޑައިރެކްޓަރު އައިޝަތު އަލައިކާ އަދި އެންވަޔަރަމެންޓް މިނިސްޓްރީގެ ސީނިއާ އެގްޒެކެޓިވް ޑައިރެކްޓަރު މުހައްމަދު ހަމްދާނެވެ. ހަމްދާނާއި އަލައިކާ އަކީ ދެމަފިރިންނެވެ.
ސިޔާސީ މަގާމުތަކުން ވަކިކުރަމުންދަނީ އެމްޑީޕީގެ ސްލޮޓުތަކުގައި އައްޔަނުކުރި ފަރާތްތައް އެ ޕާޓީން ވަކިވުމުން ކަމަށާއި އެ ފަރާތްތައް މަގާމުން ވަކިކުރަނީ ޕާޓީން އެދިގެން ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވި އެވެ.
ޕާޓީން އެދިގެން މަގާމުން ތިން ބޭފުޅަކު ވަކިކުރުން ވެސް، އެމްޑީޕީގެ ރައީސް ނަޝީދަށް ގޯސްވީ ސަރުކާރެވެ.
"[އެއީ] އެމްޑީޕީގެ މެނިފެސްޓޯއެއް ތަންފީޒުކުރަން އިނގޭނެ ގާބިލު މީހުން. އެ މީހުން ވަކިކުރުމަކީ ދިވެހިންނަށް ދެވޭ ގެއްލުމެއް،" އަންސަރު، އަލައިކާ، ހަމްދާން ވަކިކުރުމާ ގުޅިގެން ނަޝީދު ކުރެއްވި ޓްވީޓުގައި ވިދާޅުވެފައިވެ އެވެ.
އެމްޑީޕީގެ ރައީސްގެ މަގާމުގައި ހުންނަވައި އެ މަނިކުފާނު އަޑީގައި ހުންނަވައިގެން ދަ ޑިމޮކްރެޓްސް ޕާޓީ އުފެއްދުމުގެ މަސައްކަތް ދަނީ ކުރަމުންނެވެ.
އެމްޑީޕީން ވަކިވެ ދަ ޑިމޮކްރެޓްސްއާ ގުޅުމަށް ފަހު ވެސް ބައެއް ބޭފުޅުން މަގާމުން އިސްތިއުފާ ނުދެއްވި ނަމަވެސް، ފެން ކުންފުނި، އެމްޑަބްލިޔޫއެސްސީގެ ޗެއާމަން މައުސޫމް ވަނީ މަގާމުން އިސްތިއުފާ ދެއްވައި ނަމޫނާ ދައްކަވައިފަ އެވެ.
މުހިންމު ބައެއް ހަބަރު
ދުވަހުގެ ކޯޓޭޝަން
އެމްޑީޕީން ވަކިވި ތިން މެމްބަރަކު ފުރުއްވަމުން ގެންދެވި ސަރުކާރުގެ ސިޔާސީ މަގާމުތަކުން ވަކިކުރުމުން، އެކަން ކުށްވެރުކޮށް އެމްޑީޕީގެ ރައީސް މުހައްމަދު ނަޝީދު ވިދާޅުވީ،
މިއަދު ސަރުކާރުން ވަކިކުރި އަންސަރު، އަލައިކާ، ހަމްދާން އަކީ ވެސް މި އެމްޑީޕީ ސަރުކާރު ފަސް އަހަރު ދުވަހަށް ގެނައުމަށް އިންތިހާއަށް ބުރަ މަސައްކަތް ކުރި ޒުވާނުން. [އެއީ] އެމްޑީޕީގެ މެނިފެސްޓޯއެއް ތަންފީޒުކުރަން އިނގޭނެ ގާބިލު މީހުން. އެ މީހުން ވަކިކުރުމަކީ ދިވެހިންނަށް ދެވޭ ގެއްލުމެއް،"
