ރަޝިއާއިން ޔޫކްރެއިންގެ ވެރިރަށް ކިޔެވްއަށް ބޮޑު ޑްރޯން ހަމަލާއެއް ދީފި އެވެ.
ކިޔެވްގެ މޭޔަރު ވިޓާލީ ކްލިޝްކޯ ވިދާޅުވީ ޕެޓްރޯލް ސްޓޭޝަނެއް ކައިރިއަށް ޑްރޯނެއްގެ ބައިތައް ވެއްޓުމުން ފިރިހެނަކު މަރުވެ އަންހެނަކަށް އަނިޔާވި ކަމަށެވެ.
ޔޫކްރެއިންގެ ވައިގެ ފައުޖުން ބުނީ 54 ކަމިކާޒޭ ޑްރޯން ފޮނުވި އިރު، އޭގެ ތެރެއިން 52 ޑްރޯން ވައްޓާލި ކަމަށެވެ. އެއީ ރަޝިއާއިން މިހާތަނަށް އެއް ފަހަރާ ފޮނުވި ޑްރޯންގެ ރެކޯޑް އަދަދެކެވެ.
ޑްރޯންގެ ބައިތައް ވެއްޓި ކިޔެވްގެ ދެ ޑިސްޓްރިކްޓެއްގައި ހުރި ދެ އުސް ޓަވަރުގައި އަލިފާން ރޯވި އެވެ. އޭގެ އިތުރުން ދެކުނުގެ ޑިސްޓްރިކްޓެއްގައި ހުރި ގުދަނެއްގައި ވެސް ރޯވި އެވެ.
ރައީސް ވޮލޮޑިމިރް ޒެލެންސްކީ ވައިގެ ދިފާއީ ފައުޖާއި ރެސްކިއު ޓީމުތަކަށް ތައުރީފު ކުރަމުން ވިދާޅުވީ ދުޝްމަނުންގެ ޑްރޯންތައް ވައްޓާލާ ކޮންމެ ފަހަރަކު ފުރާނަ ސަލާމަތް ކުރެވޭ ކަމަށެވެ.
ރަޝިއާއިން ދަނީ ކަމިކާޒޭ ޑްރޯންތަކުގެ އިތުރުން ކްރޫޒް އަދި ބެލިސްޓިކް މިސައިލްތައް ވެސް ހަމަލާ ދިނުމުގައި ބޭނުން ކުރަމުންނެވެ.
ޔޫކްރެއިނުން ވެސް ވަނީ ރަޝިއާއަށް އަމާޒުކޮށް ޑްރޯން ހަމަލާތައް ދީފަ އެވެ. އެގޮތުން ޕުޓިންގެ އޮފީސް ހުންނަ ކްރެމްލިންއަށް ހަމަލާ ދޭން އުޅުނު ކަމަށް ރަޝިއާއިން ތުހުމަތު ކުރެ އެވެ.
