މި މަހު ރާއްޖެ އައި ޓޫރިސްޓުން މިދިޔަ އަހަރުގެ މޭ މަހަށްވުރެ މަދުވި ނަމަވެސް، ކަނބޮޑުވާން ޖެހޭ ވަރަށް ދަށް ނުވާ ކަމަށް ޓޫރިޒަމް މިނިސްޓްރީން ބުނެފި އެވެ.
މި އަހަރުގެ ޖެނުއަރީން އެޕްރީލް މަހުގެ ނިޔަލަށް ރާއްޖެ އައި ޓޫރިސްޓުންގެ އަދަދު ކޮންމެ މަހަކު ވެސް، މިދިޔަ އަހަރަށްވުރެ، އިތުރުވެފައިވެ އެވެ. ނަމަވެސް މި މަހުގެ ފުރަތަމަ ދުވަހުން ފެށިގެން 24 ވަނަ ދުވަހުގެ ނިޔަލަށް ރާއްޖެ އައި ޓޫރިސްޓުންގެ އަދަދު ވަނީ މިދިޔަ އަހަރުގެ އެ މުއްދަތަށްވުރެ 5.6 ޕަސެންޓް ދަށްވެފަ އެވެ. މި މަހުގެ 24 ވަނަ ދުވަހުގެ ނިޔަލަށް 94،604 ޓޫރިސްޓުން އައިސްފައި ވާއިރު، މިދިޔަ އަހަރުގެ އެ މުއްދަތުގައި 100،230 ޓޫރިސްޓުން ރާއްޖެ އައިސްފަ އެވެ.
ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވީ 2022 ވަނަ އަހަރަކީ ރާއްޖޭގެ ޓޫރިޒަމްގެ ރަންޔޫބީލް، ފާހަގަ ކުރި އަހަރަށް ވުމާއެކު، މިދިޔަ އަހަރުގެ މޭ މަހު އައި ޓޫރިސްޓުންގެ އަދަދު ވެސް ބޮޑުތަނުން އިތުރުވި ކަމަށެވެ. މި މަހު، ޓޫރިސްޓުންގެ އަދަދު ދަށްވި ނަމަވެސް، 2019 ވަނަ އަހަރުގެ މެއި މަހާ އަޅާބަލާއިރު، މި މަހުގެ މިހާތަށް އައި ޓޫރިސްޓުންގެ އަދަދު 15.5 ޕަސެންޓް މަތި ކަން، މިނިސްޓަރު ފާހަގަ ކުރެވި އެވެ.
"ގޯލްޑަން އިޔާ އާ ގުޅިގެން މިދިޔަ އަހަރު ރަނގަޅުވާނެ ކަމަށް އޮތީ ގަބޫލު ކުރެވިފައި، މެއި މަސް އަދިވެސް 2019 ވަނަ އަހަރަށްވުރެ ރަނގަޅު، މުޅި އަހަރަށް ބަލާއިރު ވެސް 15.6 ޕަސެންޓުގެ ކުރިއެރުމެއް (2022 އަޅާ ބަލައިރު) އެބައުޅޭ،" މައުސޫމް ވިދާޅުވި އެވެ.
ކޮވިޑް-19 ގެ ކުރިން 2019 ވަނަ އަހަރުގެ މެއި މަހުގެ ފުރަތަމަ 24 ދުވަހު ރާއްޖެ އައިސްފައިވަނީ 81،889 ޓޫރިސްޓުންނެވެ. މި އަހަރުގެ މިހާތަނަށް ޖުމްލަ 782،889 ޓޫރިސްޓުން އައިސްފައިވެ އެވެ. މިދިޔަ އަހަރުގެ މިހައި ތަނަށް އައިސްފައި ވަނީ 677،034 ޓޫރިސްޓުންނެވެ.
މިދިޔަ އަހަރު ރާއްޖެ އަށް 1.67 މިލިއަން ޓޫރިސްޓުން ޒިޔާރަތް ކޮށްފައިވެ އެވެ. މި އަހަރު އަންނާނެ ކަމަށް އަންދާޒާ ކޮށްފައިވަނީ 1.8 މިލިއަން ޓޫރިސްޓުންނެވެ.
