ލަންޑަން، އިނގިރޭސިވިލާތް (މޭ 27) - އިނގިރޭސިވިލާތުގެ އެއާޕޯޓުތަކުގެ ޕާސްޕޯޓް އީ-ގޭޓް ނިޒާމަށް މައްސަތަކެއް ދިމާވެ އެއާޕޯޓުތަކުގައި މީހުން ތޮއްޖެހިއްޖެ އެވެ.
ޗުއްޓީއަަކާ ދިމާކޮށް މި ހަފުތާ ބަންދުގައި ގިނަ ބަޔަކު ދަތުރުކުރަމުންދާ އިރު، ސޯޝަލް މީޑިއާގައި އެކި މީހުން ބުނީ އީ-ގޭޓުން ޕާސްޕޯޓު ޗެކް ނުކުރެވި، އިމިގްރޭޝަން އޮފިޝަލުން ކައިރީގައި ކިޔު ހަދަން ޖެހުމުން ތޮއްޖެހިފައިވާ ކަމަށެވެ.
އެ މައްސަލަ ދިމާވި އެއާޕޯޓުތަކުގެ ތެރޭގައި ލަންޑަންގެ އެންމެ ބޮޑު ދެ އެއާޕޯޓު، ހީތުރޯ އާއި ގެޓްވިކް ހިމެނެ އެވެ.
ހީތުރޯއިން ބުނީ އީ-ގޭޓުތަައް އޮޕަރޭޓް ކުރާ ބޯޑާ ފޯސް އިދާރާއާ އެކު މައްސަލަ ހައްލުކުރަން މަސަައްކަތް ކުރަމުންދާ ކަމަށެވެ. އޭގެ އިތުރުން މަސައްކަތަށް އިތުރު މުވައްޒަފުން ނެރިފައިވާ ކަމަށް ވެސް އެ އެއާޕޯޓުން ބުންޏެވެ.
އިނގިރޭސިވިލާތުގެ ހޯމް އޮފީހުން ބުނީ އޮޕަރޭޓަރުންނާއި އެއާލައިންތަކާ ގުޅިގެން ދަތުރުކުރާ މީހުންނަށް ވީ އެންމެ ބޮޑަކަށް ލުއިކޮށްދެވޭތޯ ބަލަމުންދާ ކަމަށޭވެ.
އިނގިރޭސި ސަރުކާރުން ބުނާ ގޮތުގއި އެ ގައުމުގެ 15 ވައިގެ އަދި ރޭލު ބަނދަރުގައި 270 އަށް ވުރެ އީ-ގޭޓް ގާއިމްކޮށްފައި ހުރެ އެވެ. އެއީ އިނގިރޭސި ރައްޔިތުންނާއި އުމުރުން 12 އަހަރުން މަތީގެ އީޔޫ ރައްޔިތުންނާއި އޮސްޓްރޭލިއާ އަދި ކެނެޑާ ފަދަ ބައެއް އެހެން ގައުމުތަކުގެ ޕާސްޕޯޓް އޮންނަ މީހުންނަށް ކިޔުގައި މަޑުނުކޮށް، ފަސޭހަކަމާ އެކު ދަތުރުކުރުމަށް މަގުފަހިކޮށްދޭ ނިޒާމެކެވެ.
