ގިނަ ޖަނަވާރުތަކާއި މަސްމަހުގެ ބުރަކަށި އަނދިރިކޮށް އަދި ބަނޑު އަލިކޮށް ހުންނަނީ ކީއްވެގެން ހެއްޔެވެ؟ މިއީ ސައިންސްވެރިން ބަހުސް ކުރަމުން އަންނަތާ އެތައް ދުވަހެއް ވީ ސުވާލެކެވެ. ބައެއް ތިއަރީތަކުން ދައްކާ ގޮތުގައި މިކަމުގެ ސަބަބުން ޖަނަވާރުތައް ޝިކާރަކުރާ ޖަނަވާރުތަކުން ފަރުދާވުމަށާއި، ބައިވެރިއެއް ހޯދުމަށާއި، ހަށިގަނޑުގެ ފިނިހޫނުމިން ރެގިއުލޭޓްކުރުމުގެ އިތުރުން އިންޒާރުގެ އިޝާރާތްތައް ފޮނުވުމަށް އެހީތެރިވެދެ އެވެ.
މި ކުލަ ޕެޓާން އަށް އާންމުކޮށް ކިޔާ އުޅެނީ ކައުންޓަޝޭޑިން އެވެ. މިނިކާ ވަގާއި ކަނޑުމަސް ފަދަ ޖަނަވާރުތަކުން ފެންނަ މި ޕެޓާން އަކީ، މަތި އަނދިރިވެ، ދަށް ފަރާތް އަލިކޮށް ހުރުމެވެ. ކައުންޓަޝޭޑިން އަކީ ޖަނަވާރުތަކަށް ގެއްލުން ހުރި އަލްޓްރާވައިލެޓް ރޭޑިއޭޝަނުން ރައްކާތެރިކޮށްދީ، އަވީގެ ހޫނު އެބްސޯބްކުރުމަށް ވެސް އެހީތެރިވެދޭ އެއްޗެއް ކަމަށް ބެލެވެއެވެ.
ނަމަވެސް ބައެއް ސައިންސްވެރިން ދެކޭ ގޮތުގައި ކައުންޓަޝޭޑިން އުފެދިގެން އައީ ޖަނަވާރުތައް ފެނުމަށް އުނދަގޫ ކުރުމަށެވެ. އެމީހުން ގަބޫލުކުރާ ގޮތުގައި ޖަނަވާރެއްގެ ހަށިގަނޑަށް މަތިން އަލިއެޅުމުން، މި ޕެޓާންގެ ސަބަބުން ވިޝުއަލް ކެމޮފްލޭޖެއް އުފެދެ އެވެ.
ކައުންޓަޝޭޑިން އިން ކެމޮފްލޭޖްވާ ގޮތް ދެނެގަތުމަށްޓަކައި، އަލީގެ ދޯދިތައް އެއްޗަކަށް އެޅުމުން ވާ ގޮތާއި ބަލާ މީހުންނަށް ފެންނަ ގޮތް އެނގެންޖެހެ އެވެ. ތަބީއީ ގޮތުން އަލިކަން އަންނަނީ މަތިންނެވެ. އެހެންކަމުން އެއް ކުލައެއްގެ އެއްޗަކަށް މިފަދައިން މަތިން އަލި އެޅިއްޖެނަމަ، މަތި އަލިކޮށް ފެންނަ އިރު ދަށް ފެންނާނީ އަނދިރިކޮށެވެ.
ބައްޓަމާއި އައްޔާ މެދުގައި ހިނގާ މި މުއާމަލާތަކީ އަހަރުމެންގެ ލޮލުގެ ފެނުމުގެ ނިޒާމަށް މުހިންމު މައުލޫމާތުތަކެއް ލިބިގެންދާ އެއްޗެކެވެ. މިއީ "ޝޭޕް ފްރޮމް ޝޭޑިން" ކިޔާ ކޮންސެޕްޓެކެވެ. އެއީ ތަކެތީގެ ތިން ޑިމެންޝަނަލް ބައްޓަން އަހަރުމެންނަށް ދެނެގަތުމަށް އެހީތެރިވެދޭ ކަމެކެވެ. ފަންނާނުން ވަނީ ގަރުނުތަކެއް ވަންދެން މި އުކުޅު ބޭނުންކޮށްގެން އަސްލާއި އެއްގޮތް ކުރެހުންތައް އުފައްދާފަ އެވެ. ޖަނަވާރުތައް ވެސް ވަށައިގެންވާ މާހައުލުގެ ބައްޓަން ދެނެގަތުމަށް ބަރޯސާވަނީ ހިޔަނި އެޅުމަށެވެ.
ކައުންޓަރޝޭޑިން މަސައްކަތްކުރާ ގޮތް ދައްކާދޭ ސްކެޗެއް - ފޮޓޯ: ސްކެޗްޕްލެނޭޝަންސް
ކައުންޓަރޝޭޑިން އަކީ ދިފާއީ ނިޒާމަކަށް ވެދާނެ އެވެ. ޖަނަވާރެއްގެ ބުރަކަށި އަނދިރިވެ، ބަނޑު އަލިވެއްޖެނަމަ، އަލި އެޅުމުން ދެ ފުށް ވެސް ފެންނާނީ ގާތްގަނޑަކަށް އެއް ކުލައެއްގަ އެވެ. މިކަމުން ޝިކާރަކުރާ ޖަނަވާރުތަކަށް އެ ޖަނަވާރެއް ފެނުމަށް ދަތިވެދާނެ އެވެ. މިސާލަކަށް ގޮފިގަނޑެއްގެ ދަށުގައި އެލިގެން އޮންނަ ކެޓަޕިލާއެއް ފެންނަން އުނދަގޫވަނީ ކައުންޓަރޝޭޑިން އިން، އަސްލު ހިޔަނީގެ އަސަރުތަކާ ދެކޮޅަށް މަސައްކަތް ކުރާތީއެވެ.
ކެޓަޕިލާގެ ކައުންޓަރޝޭޑިން
ނުރައްކާތަކުން ރައްކާތެރިކޮށްދިނުމަށް އެންމެ ރަނގަޅު ކައުންޓަޝޭޑިން ޕެޓާން ބިނާވެފައިވަނީ އެއްޗެއްގެ ބައްޓަމާއި، އަލިހުރި މިންވަރާއި، ބަލާ މީހާ ހުންނަ ތަން ފަދަ އެކި ކަންތައްތަކުގެ މައްޗަށެވެ. ދިރާސާވެރިން ވަނީ އެކި ހާލަތްތަކުގައި އެންމެ ފުރިހަމަ ކައުންޓަޝޭޑިންގް ލަފާކުރުމަށް ކޮމްޕިއުޓޭޝަނަލް މޮޑެލްއެއް އެކުލަވާލާފަ އެވެ. އެ މީހުން ހޯދި ހޯދުންތަކުން ދައްކާ ގޮތުގައި މޫސުމާއި ދުވަހުގެ ވަގުތާއި ޖަނަވާރު ދިރިއުޅޭ ތަން ފަދަ ކަންކަމުގެ ސަބަބުން، އެންމެ ފުރިހަމަ ކައުންޓަޝޭޑިން ޕެޓާން ތަފާތުވެ އެވެ.
އަވިގަދަ ތަންތަނުގައި އުޅޭ ޖަނަވާރުތަކުގެ އަލި ސަރަހައްދުތަކާއި އަނދިރި ސަރަހައްދުތަކުގެ މެދުގައި ބޮޑު ފަރަގެއް އޮންނަން ޖެހޭއިރު، ބުރަކަށީގެ ތިރިއަށް އަނދިރި ރޮނގެއް ހުންނަން ޖެހެ އެވެ. އަނެއްކޮޅުން ގަސްގަހާގެހި ނުވަތަ އިރުގެ އަލި މަދު ސަރަހައްދުތަކުގައި އުޅޭ ޖަނަވާރުތަކުގެ އަލި ބަނޑާއި ކަޅު ބުރަކަށި އާއި ދެމެދު ފޭޑެއް ހުންނަން ޖެހެ އެވެ.
މިޔަރު ފަދަ އެތައް މަހެއްގައި ކައުންޓަރޝޭޑިން ހިމެނޭ
ނިންމާލަމުން ބުނާނަމަ، ކައުންޓަޝޭޑިން ފަދައިން ޖަނަވާރުތަކުގެ ހަށިގަނޑުގައި ވަކި ކުލަތަކެއް އުފެދިފައިވަނީ އެކި ސަބަބުތަކާހުރެ އެވެ. އަލްޓްރާވައިލެޓް ރޭޑިއޭޝަނުން ރައްކާތެރިވެ ހޫނު އެބްސޯބްކުރުމަށް އެހީތެރިވެދޭއިރު، ކެމޮފްލޭޖް އަށް ވެސް އެހީތެރިވެދީ، ޖަނަވާރުތައް ދެނެގަންނަން އުނދަގޫވެއެވެ. އެންމެ ރަނގަޅަށް މަސައްކަތްކުރާ ކައުންޓަރޝޭޑިން ޕެޓަރން ބިނާވަނީ މާހައުލާއި އަލިކަމުގެ ހާލަތުގެ މައްޗަށެވެ. މި އުސޫލުތައް ދެނެގަތުމަކީ ޖަނަވާރުތައް އެމީހުންގެ ދިރިއުޅޭ ތަންތަނުގައި އެޑްއެޕްޓްވެ ދިރިއުޅެވޭ ގޮތުގެ އަގުހުރި ވިސްނުންތަކެއް ލިބިގެންދާނެ ކަމެކެވެ.
