ވޮޝިންޓަން، އެމެރިކާ (މޭ 27) - މަދުން ނޫނީ ނުބާއްވާ ޗައިނާ އާއި އެމެރިކާގެ ވިޔަފާރި މަޝްވަރާގެ ތެރެއިން ހުކުރު ދުވަހު ދެ ގައުމުން ހޫނު ބަހުސަކަށް ހިނގައްޖެ އެވެ.
ދެ ގައުމުން ވެސް ތުހުމަތުތައް ކުރަމުން ގޮސް ބަހުސް ހޫނުވި ނަމަވެސް، މަޝްވަރާގެ ދޮރު އަބަދުވެސް ހުޅުވާފައި ބާއްވަން އެއްބަސްވި އެވެ.
މަޝްވަރާ ބައްދަލުވުން އޮތީ އެމެރިކާގެ ޑަޓްރޮއިޓްގައި އޭޝިއާ ޕެސިފިކް އިކޮނޮމިކް ކޯޕޮރޭޝަން ސަމިޓްގެ ހަވާސާގެ ތެރެއިންނެވެ.
ޗައިނާގެ މިނިސްޓަރު ވާންގް ވެންޓާއޯ ބައްދަލު ކުރެއްވީ އެމެރިކާގެ ވިޔަފާރި މަންދޫބު ކެތެރީން ޓައިއާ އެވެ. އޭގެ ކުރިން ވާންގް ވަނީ އެމެރިކާގެ ވިޔަފާރި ސެކެޓްރީ ޖީނާ ރައިމޮންޑޯއާ ބައްދަލުކުރައްވައިފަ އެވެ.
އެމެރިކާގެ ބަޔާނުގައި ބުނީ އެމެރިކާ އާއި ޗައިނާގެ ވިޔަފާރި ގުޅުން ދުނިޔެއަށް މުހިއްމުކަން ޓައި ފާހަގަ ކުރެއްވި ކަމަށާއި އެހެންވެ މަޝްވަރާއަށް އަބަދުވެސް ފުރުސަތު އޮންނަން ވާނެ ކަމަށެވެ.
ޗައިނާގެ ޝިންހުއާ ނިއުސް އެޖެންސީން ބުނީ ބައްދަލުވުން އޮތީ ވަރަށް ހުޅުވާލެވިގެން، ސާފުކޮށް ބޭނުން ވާހަކައެއް ދެއްކޭނެ ފަދަ ގޮތަކަށް ކަމަށެވެ.
އެމެރިކާގެ ސިޔާސަތުތަކާ މެދު ވާންގް ކަންބޮޑުވުން ފާޅުކުރެއްވި ކަމަށާއި ވަކިން ހާއްސަކޮށް ޓައިވާންގެ މައްސަލަ ފާހަގަކުރެއްވި ކަމަށް ޝިންހުއާއިން ރިޕޯޓުކުރި އެވެ.
ޗައިނާއިން ދެކޭ ގޮތުގައި ޓައިވާނަކީ އެ ގައުމުގެ ބަޔެކެވެ. އެމެރިކާއިން ރަސްމީ ގުޅުން ބާއްވަނީ ޗައިނާއާ އެކު ނަމަވެސް، ޓައިވާން ވަކި ދައުލަތަކަށް ވުމަށް ކުރާ މަސައްކަތަށް އެހީވެދެ އެވެ.
އޭގެ އިތުރުން އެމެރިކާގެ ޗިޕް އުފައްދާ މިކްރޯންގެ ސެކިއުރިޓީ ނުރައްކާތަކެއް ހުރި ކަމަށް ބުނެ، އެ ކުންފުނީގެ ތަކެތި ނުގަތުމަށް އެންގި އެންގުމާ މެދު އެމެރިކާއިން ކަަންބޮޑުވުން ފާޅުކުރި އެވެ.
އެނެލިސްޓުން ބުނާ ގޮތުގައި ޗައިނާއިން އެގޮތަށް ނިންމީ ޗައިނާގެ ކުންފުނިތަކާ މެދު އެމެރިކާއިން ގެންގުޅޭ ސިޔާސަތާ ހެދި އެވެ. ސަލާމަތަށް ނުރައްކާވާ ކަމަށް ބުނެ ޗައިނާގެ ގިނަ ކުންފުނިތަކުން ވިޔަފާރި ކުރުން އެމެރިކާއިން މަނާކުރި އެވެ.
މިއީ ޖޯ ބައިޑެން ރައީސް ކަމަށް ވަޑައިގެންނެވި ފަހު އެމެރިކާއަށް ދަތުރު ކުރެއްވި ޗައިނާގެ އެންމެ މަތީ ފަންތީގެ ވަފުދެވެ. ދެ ގައުމުގެ މެދުގައި މަތީ ފަންތީގެ މަޝްވަރާ ކުރުން މެދުކެނޑުނީ ކޮވިޑްގެ ސަބަބުންނެވެ.
އެހެން ނަމަވެސް، މިދިޔަ ނޮވެމްބަރު މަހު ބައިޑެން ވަނީ ބާލީއަށް ކުރެއްވި ދަތުރެއްގެ ތެރެއިން ރައީސް ޝީ ޖިންޕިންއާ ބައްދަލުކުރައްވައިފަ އެވެ.
