ލަންޑަން، އިނގިރޭސިވިލާތް (މޭ 25) - އިނގިރޭސި ބޮޑު ވަޒީރުގެ އޮފީހާއި ރަސްމީ ގެކޮޅު ހުންނަ ޑައުނިން ސްޓްރީޓްގެ ގޭޓުގައި ކާރަކުން ޖެއްސި މީހަކު ހައްޔަރުކޮށްފި އެވެ.
ފުލުހުން ނެރުނު ބަޔާނެއްގައި ބުނީ ކާރު ދުއްވަން އިން ފިރިހެން މީހާ ހައްޔަރު ކުރީ ނުރައްކާތެރިކޮށް ދުއްވުމާއި ގެއްލުން ދިނުމުގެ ތުހުމަތުގައި ކަމަށެވެ.
އެ ހާދިސާގައި އެއްވެސް މީހަކަށް އަނިޔާއެއް ނުވާ އިރު، ތަހުގީގު ކުރިއަށްދާ ކަމަށް ފުލުހުން ބުނެ އެވެ.
އިނގިރޭސި ނޫސްތަަކުން ބުނި ގޮތުގައި ހާދިސާ ހިނގި ވަގުތު ބޮޑު ވަޒީރު ރިޝީ ސުނަކް ހުންނެވީ 10 ޑައުނިން ސްޓްރީޓްގަ އެވެ. އެއީ ބޮޑު ވަޒީރުގެ ރަސްމީ އޮފީހެވެ.
އޭގެ އިރުކޮޅެއް ފަހުން އެމަނިކުފާނު އެ ތަނުން ވަޑައިގެންނެވި ކަމަށް ރިޕޯޓުތައް ބުނެ އެވެ.
ވީޑިއޯއިން ފެންނަނީ ރިހި ކުލައިގެ ކިއާ ބްރޭންޑުގެ ކާރެއް މަޑުމަޑުން ދުއްވާފައި ގޮސް ޑައުނިން ސްޓްރީޓުގެ ދަގަނޑު ގޭޓުގައި ޖެހި ހުއްޓޭ މަންޒަރެވެ.
ޑައުނިން ސްޓްރީޓް ސަރަހައްދުގެ ސެކިއުރިޓީ އަބަދުވެސް ރަނގަޅަށް ބަލަހައްޓަ އެވެ. އެއީ އިނގިރޭސި ސަރުކާރުގެ ގިނަ އިމާރާތްތަކާއި ޕާލަމެންޓް އިމާރާތްތަކާ ވެސް ކައިރި ހިސާބެކެވެ.
މީގެ ކުރިން 2017 ވަނަ އަހަރު ޕާލަމެންޓު ކައިރިން ޕޭމަންޓު މައްޗަށް ކާރުގައު ދުއްވާފައި އެރި މީހެއްގެ ސަަބަބުން ހަތަރު މީހުން މަރުވި އެވެ.
އޭގެ ފަހުން ޕާލަމެންޓުގެ ފެންސުގައި ކާރުން ޖައްސައި، ޕާލަމެންޓުގެ ގޯތިތެރެއަށް ވަދެ، ފުލުހަކަށް ވަޅިން ހަމަލާދިނެވެ. ފުލުހުން އޭނާގެ ގަޔަށް ބަޑި ޖެހުމުން މަރުވީ އެވެ.
ޑައުނިން ސްޓްރީޓްގައި ބޮޑެތި ގޭޓު ކައިރި ހުރީ ލަންޑަންގައި ބޮމުގެ ހަމަލާތަކެއް ދިނުމުން 1989 ގަ އެވެ. އެ މަގަށް ވަންނަ ކާރުތައް ގަވާއިދުން ގޭޓު ކައިރިން ހުއްޓުވައި ބަލައި ފާސްކުރެ އެވެ.
