ވަރިވާން ކޯޓަށް ދިޔަ އަންހެނަކަށް މެޖިސްޓްރޭޓަކު ފޯނުން ގުޅި މައްސަލައެއް ޖުޑީޝަލް ސާވިސް ކޮމިޝަން (ޖޭއެސްސީ)އިން ބަލަން ފަށައިފި އެވެ.
ޖޭއެސްސީގެ މީޑީއާ އޮފިޝަލަކު "އަދަދު" އަށް ބުނީ މިފަދަ މައްސަލައެއް އެ ކޮމިޝަނަށް ހުށަހެޅި ބަލަމުން އަންނަ ކަމަށެވެ.
ބަލަމުން ދަނީ ހދ. އަތޮޅު ރަށެއްގެ ކޯޓެއްގެ މެޖިސްޓްރޭޓެއްގެ މައްސަލައެއް ކަމަށް އޭނާ ބުންޏެވެ. އެހެން އިތުރު ތަފްސީލު ހާމައެއް ނުކުރެ އެވެ.
މީގެ ކުރިން ވެސް ޖޭއެސްސީން ވަނީ ފަނޑިޔާރުންނާއި ގުޅުންހުރި ގިނަ މައްސަަލަތަކެއް ބަލައިފަ އެވެ. މިފަދަ މައްސަލަތައް ބަލަނީ ސުލޫކީ މައްސަލައިގެ ގޮތުގަ އެވެ. ސާބިތުވެއްޖެ ނަމަ ފިޔަވަޅު އަޅަ އެވެ.
ޖޭއެސްސީން މީގެ ކުރިން ބަލާފައިވާ ކަންކަމުގެ ތެރޭގައި ކޮރަޕްޝަނާާއި، ޖިންސީ ގޯނާ، ފުރައްސާރަ އަދި މަގާމުގެ ބޭނުން ނަހަމަގޮތުގައި ހިފުން ފަދަ މައްސަލަތައް ހިމެނެ އެވެ.
