ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ޗެލެންޖް ކަޕްގައި މިއަދު ކުޅުނު ރޭންކިން މެޗުގައި ކިރްގިސްތާނުން ސީދާ ތިން ސެޓުން ރާއްޖެ ބަލިކޮށްފި އެވެ.
މިިހާތަނަށް މި ފަހަރުގެ މުބާރާތުގައި ރާއްޖެ ކުޅުނު ހަތަރު މެޗުން ވެސް ބަލިވެފައިވަނީ ސެޓެއް ވެސް ނުލިބި އެވެ. މުބާރާތުގައި ރާއްޖެ ކުޅުނު މެޗުތަކުގެ ތެރެއިން ނިސްބަތުން ބަލާއިރު، ވާދަކުރެވޭނެ މެޗަކާ ބަލައި، އެންމެ ދަށްކޮށް ދިޔަ މެޗަކީ މިއަދު ކިރްގިސްތާނާ ދެކޮޅަށް ކުޅުނު މެޗެވެ. ކިރްގިސްތާނުން މެޗުގެ ސެޓުތައް ގެންދިޔައީ 25-20، 25-20 އަދި 25-15 އިންނެވެ.
ރާއްޖޭން ރޭންކިން ފަހު މެޗުގައި ކުޅެން ޖެހޭނީ މިއަދު ކުޅޭ ރޭންކިން ދެ ވަނަ މެޗުގައި ސްރީ ލަންކާ އާއި ބަންގްލަދޭޝް ބައްދަލުކޮށް ބަލިވާ ޓީމަކާ އެވެ. ރާއްޖޭން ދެން ކުޅޭ ރޭންކިން މެޗަކީ މުބާރާތުގެ ހަތް ވަނަ އާއި އެންމެ ފުލަށްދާ ޓީމެއް ކަނޑައަޅާ މެޗެވެ.
އަނިޔާގެ ސަބަބުން މިއަދު ރާއްޖޭން ކުޅުނު އައިޝަތު މާޖިދާ (މާޖީ) އާއި ފައިހާ މުހައްމަދު ނުލަ އެވެ.
ނޭޕާލްގެ ނެޝަނަލް ސްޕޯޓްސް ކޮމްޕްލެކްސްގެ އިންޑޯ ވޮލީ ކޯޓުގައި މިއަދު ކުޅުނު މެޗުގެ ކޮންމެ ސެޓެއްގައި ވެސް ރާއްޖޭން ކުޅޭ ވަގުތުތަކެއް އާދެ އެވެ. ތިން ޕޮއިންޓަށް ލީޑުފުޅާ ކުރުމަށް ފަހު ވެސް އަމިއްލަ އަށް ގޯސްތަކެއް ހެދި، ފަހަތުން އަރައި ކިރްގިސްތާނަށް މޮޅުވާން ފުރުސަތު ދެވެނީ އެވެ.
ރާއްޖެ ޓީމުގެ އެޓޭކުގައި ކެޕްޓަން، ހައްވާ ރާޝިދާ (ހައްވަ) ތަޖުރިބާގެ އަލީގައި ކަންކަން ހާސިލްކުރި ނަމަވެސް ޓީމެއްގެ ގޮތުގައި ކުޅެން ޖެހޭ ދަނޑިވަޅުތަކުގައި ފެންނަނީ އާދައިގެ ގޮތަކަށެވެ. ކޮންމެ ސެޓެއްގެ ވެސް އެންމެ މުހިންމު ވަގުތުތަކުގައި ރާއްޖެ އަށް އަމިއްލަ އަށް ގޯސްތަކެއް ހެދި މެޗު ގެއްލެނީ އެވެ.
ތައިލެންޑްގެ ތަޖުރިބާކާރު ކޯޗު ވިޗީޕޮން ފޯންޗާޓްޔިންޗީޕްގެ އިރުޝާދުގެ ފުރަތަމަ ފަހަރަށް އަންހެން ވޮލީ ޓީމުން މުބާރާތެއްގައި ވާދަކުރާއިރު، މިހާތަނަށް އަދި ސެޓެއް ވެސް ކާމިޔާބުކުރެވިފައިނުވެ އެވެ.
