އަދިސް އަބާބާ، އިތިއޯޕިއާ (މޭ 24) - ރަޝިއާގެ ސިފައިން ޔޫކްރެއިނަށް އަރައި ކުރަމުންދާ ހަނގުރާމައިގައި ވަކި އަތަކަށް ނުޖެހި ތިބުމަށް ކަމަށް ބުނެ އެފްރިކާގެ ގައުމުތަކުން ރަޝިއާ ކުށްވެރި ނުކުރާތީ ޔޫކްރެއިނުން ކަންބޮޑުވުން ފާޅުކޮށްފި އެވެ.
އިތިއޯޕިއާއަށް ކުރައްވަމުންދާ ދަތުރެއްގައި ޔޫކްރެއިންގެ ފޮރިން މިނިސްޓަރު ޑިމީޓްރޯ ކުލެބާ ވިދާޅުވީ އެފްރިކާގެ ބައެއް ގައުމުތަކުގެ ވިސްނުމާ މެދު ކަންބޮޑުވާ ކަމަށެވެ.
އޭނާގެ މި ދަތުރަކީ އެފްރިކާ ގައުމުތަކުގެ ތާއީދު ހޯދުމަށް ކުރާ ސަރަަހައްދީ ދަތުރެކެވެ. ކުލެބާ ވިދާޅުވީ މި ހަނގުރާމައިގެ ޖަވާބަކީ ވަކި އަތަކަށް ނުޖެހި ތިބުން ނޫން ކަމަށެވެ.
"ރަޝިއާގެ އަމަލުތައް ކުށްވެރި ނުކޮށް ތިބުމަކީ، އެހެން ހުރިހާ ގައުމެއްގެ ބޯޑަރު ހުރަސްކޮށް، ލާއިންސާނީ ޖަރީމާ ހިންގުން ކުށްވެރި ނުކޮށް ތިބުން ކަހަލަ ކަމެއް،" ކުލެބާ ވިދާޅުވި އެވެ.
ޔޫކްރެއިނުން ރަޝިއާ ސިފައިން ފޭބުމަށް ގޮވާލާ މިދިޔަ ފެބްރުއަރީ މަހު އދ. ގެ އާއްމު މަޖިލީހުގައި ނެގި ވޯޓުގައި އެފްރިކަން ޔޫނިއަންގެ 54 މެމްބަރު ގައުމުގެ ތެރެއިން 22 ގައުމުން ވޯޓުގައި ބައިވެރި ނުވެ ނުވަތަ ވަކި އަތަކަށް ނުޖެހި ތިއްބެވެ.
އެރިޓްރިއާ އާއި މާލީއިން ވޯޓުލީ ރަޝިއާ ސިފައިން ފޭބުމަށް ގޮވާލަން ނުފެންނަ ކަމަށޭވެ.
ކުލެބާ އެފްރިކާ ގައުމުތަކުގެ ތާއީދު ހޯދަަން މަސައްކަތް ކުރައްވާ އިރު، ދެކުނު އެފްރިކާއިން ދާދި ފަހުން ބުނީ ސުލްހައިގެ މިޝަނެއްގައި އެފްރިކާގެ އޮފިޝަލުން ވަރަށް އަވަހަށް ރަޝިއާ އާއި ޔޫކްރެއިނަށް ދަތުރު ކުރާނެ ކަމަށެވެ.
