ދިމިޝްކު، ސީރިއާ (މޭ 24) - ސީރިއާގެ ދާހިލީ ހަނގުރާމައާ ގުޅިގެން ރައީސް ބައްޝާރުލް އަސަދްގެ ޝަރީއަތް ހިންގަން ޖެހޭ ކަމަށް ފްރާންސްގެ ފޮރިން މިނިސްޓަރު ވިދާޅުވުމުން ސީރިއާގެ ނުރުހުން އަމާޒުވެއްޖެ އެވެ.
ޓީވީއަކަށް ދެއްވި އިންޓަވިއުއެއްގައި ކެތެރީން ކޮލޯނާ ވިދާޅުވީ އަސަދްގެ ޝަރީއަތް ހިންގަން ޖެހޭ ކަމަށެވެ.
އޭނާ އެހެން ވިދާޅުވި އިރު، ސީރިއާ އާއި އަރަބި ގައުމުތަކުން ގުޅުން ވަނީ ރަނގަޅުވާން ފަށައިފަ އެވެ. އަދި 12 އަހަރަށް ފަހު އަސަދް އަރަބި ލީގު ސަމިޓެއްގައި ބައިވެރިވެވަޑައިގެންނެވީ މިދިޔަ ހުކުރު ދުވަހު އެވެ.
ސީރިއާގެ ފޮރިން މިނިސްޓްރީން ނެރުނު ބަޔާނެއްގައި ބުނީ ފްރާންސްގެ ޑިޕްލޮމެސީއަކީ އެހެން ގައުމުތަކާ ދުރުވެ، ކަންތައް ބޮޑުކުރުމުގެ ވިސްނުމެއް ކަމަށެވެ. ފްރާންސުން ކަންބޮޑުވަނީ ސައުދީ އަރަބިއްޔާގެ ރިޔާދްގައި ބޭއްވި ތާރީހީ އަރަބި ސަމިޓުގެ ކާމިޔާބާ ހެދި ކަމަށް ބަޔާނުގައި ބުންޏެވެ.
"މި ޒަމާނަށް ނުފެތޭ ފްރާންސްގެ ޑިޕްލޮމެސީ މުރާޖައާ ކުރުމަށް އެ ގައުމަށް ގޮވާލަން،" ބަޔާނުގައި ބުންޏެވެ.
އަރަބި ގައުމުތަކުން ސީރިއާއާ ގުޅުން ގާއިމްކުރި ނަމަވެސް ހުޅަނގުގެ ގައުމުތަކުން އެކަމާ ހިތްހަމައެއް ނުޖެހެ އެވެ. އެމެރިކާއިން ބުނީ ސީރިއާއާ ދެކޮޅަށް އެޅި ފިޔަވަޅުތައް އަދިވެސް ދެމިއޮންނާނެ ކަމަށެވެ.
ކޮލޯނާގެ އިންޓަވިއުގައި ވެސް ވިދާޅުވީ ޔޫރަޕިއަން ޔޫނިއަން (އީޔޫ) އިން ސީރިއާގެ ސަރުކާރާ ދެކޮޅަށް އަޅާފައިވާ ފިޔަވަޅުތައް އުވާލުމާ މެދު ވިސްނަމުން ނުދާ ކަމަށެވެ.
ސީރިއާގެ ހަނގުރާމައިގައި 500،000 އަށް ވުރެ ގިނަ މީހުން މަރުވެފައިވާ އިރު، އެތައް މިލިއަން ބަޔަކު ވަނީ ހާލުގައި ޖެހިފަ އެވެ.
