ރާއްޖޭގެ ކަނޑުގެ ސަރަހައްދު ސަރުކާރުން ވިއްކާލި ކަމަށް ބުނެ އުފެއްދި ފޯޅަވަހި ކޯލިޝަނުން ޖޫން 2، ގައި ބާއްވަން ރާވަމުން އަންނަ އެއްވުމުގައި ބައިވެރިވުމާމެދު ގޮތެއް ނިންމުމަށްފަހު އިއުލާންކުރާނެ ކަމަށް ދި ޑިމޮކްރެޓްސްއިން ބުނެފި އެވެ.
އެމްޑީޕީގެ ތެރޭގައި އުފެދުނު "ފިކުރެއްގެ ދިރުން" ފެކްޝަނުން އެ ޕާޓީއާ ދުރަށްޖެހި އަލަށް އުފައްދާ ޑިމޮކްރެޓްސް ޕާޓީން މިއަދު ބޭއްވި ނޫސްވެރިންގެ ބައްދަލުމެއްގައި އެ ޕާޓީގެ ތަރުޖަމާނު އަފްޝަން ލަތީފު ވިދާޅުވީ، އެ އެއްވުމުގައި ޑިމޮކްރެޓްސްއިން ބައިވެރިވާ ނަމަ އެކަން ފަހުން އިއުލާންކުރާނެ ކަމަށެވެ.
ޑިމޮކްރެޓްސްއިން މިހެން ބުނެފައިވާއިރު ފިކުރެއްގެ ދިރުމުގެ ނަމުގައި އެ ބޭފުޅުން ހަރަކާތްތެރިމުންދިޔައިރު، ފޯޅަވަހި މައްސަލާގައި އެ ފެކްޝަނުން ވަނީ ސަރުކާރަށް ފާޑުކިޔާ އެކި ހަރަކާތްތަކުގައި ބައިވެރިވެފަ އެވެ. އެގޮތުން އެ ކޯލިޝަނުން ފުރަތަމަ އަދި ދެ ވަނައަށް ބޭއްވި ނޫސްވެރިންގެ ބައްދަލުވުންތަކުގައި ވެސް ފިކުރެއްގެ ދިރުމުގެ އިސް ބޭފުޅުން ބައިވެރިވި އެވެ.
ފޯޅަވަހި ކޯލިޝަނުގައި އިސްކޮށް ހަރަކާތްތެރިވަނީ އިދިކޮޅު ޕީޕީއެމްގެ އިތުރުން ޖުމްހުރީ ޕާޓީ، އެމްއެންޕީ، އަދި މި އަހަރުގެ ރިޔާސީ އިންތިހާބުގަ ވާދަކުރައްވާނެކަން އިއުލާންކުރައްވާފައިވާ ކުރީގެ ބަންޑާރަނައިބު ޑރ. މުހައްމަދު މުނައްވަރު އަދި ކުރީގެ ހޯމް މިނިސްޓަރު އުމަރު ނަސީރެވެ.
އެއާއެކު ފިކުރެއްގެ ދިރުމުން ވެސް އެބޭފުޅުންނާއެކު ފުރަތަމަ މަސައްކަތް ކުރި އެވެ. އެގޮތުން މިކަމާ ގުޅިގެން މަޖިލީހަށް ހުށަހެޅި އެޓާނީ ޖެނެރަލް އިބްރާހިމް ރިފްއަތު އަދި ފޮރިން މިނިސްޓަރު އަބްދުﷲ ޝާހިދުގެ އިތުބާރު ނެތްކަމުގެ މައްސަލައިގަ ވެސް ފިކުރެއްގެ ދިރުމުގެ މެމްބަރުން ސޮއިކުރި އެވެ.
ފޯޅަވަހި މައްސަލައިގެ ފަސްފަހަތް
މޮރިޝަސް އިން ޗާގޯސް ގެ މައްޗަށް ސިޔާދަތީ ބާރު ހޯދުމަށް އިންޓަނޭޝަނަލް ކޯޓް އޮފް ޖަސްޓިސްގައި ކުރި ދައުވާ ނިމުނީ އެ ގައުމާ އެއް ކޮޅަށެވެ. 2019 ވަނަ އަހަރު އެ ކޯޓުން ވަނީ ވީ އެންމެ އަވަހަކަށް މޮރިޝަސްއާ ޗާގޯސް ހަވާލުކުރުމަށް ވެސް އިނގިރޭސިވިލާތަށް އަންގާފަ އެވެ. ނަމަވެސް, މިހާތަނަށް އެ ނިންމުމަށް އިނގިރޭސިވިލާތުން އިޖާބަދީފައެއް ނުވެ އެވެ.
މީގެ ކުރިން މެއި 22، 2019، ގައި އދ. އިން އެ ނިންމުމަށް ތާއީދުކޮށް ހަ މަސް ދުވަހުގެ ތެރޭގައި ޗާގޯސް މޮރިޝަސް އާއި ހަވާލުކުރުމަށް 116 ގައުމުގެ ވޯޓާއި އެކު ގަރާރެއް ވެސް ފާސްކުރި އެވެ. ނަމަވެސް އެ ގަރާރުގައި ރާއްޖެއިން ވޯޓުލީ ދެކޮޅަށެވެ.
އެ މައްސަލާގައި ރާއްޖޭގެ ސްޓޭންޑް ބަދަލުވިކަން އެނގުނީ މިހާރު ކަނޑުގެ ސަރަހައްދުގެ މައްސަލައިގައި ރާއްޖެއިން މޮރިޝަސްއާ ދެކޮޅަށް ވަކާލާތުކުރަމުން އެ ގަރާރާ އެއްކޮޅަށް ވޯޓުދޭން ނިންމާފައިވާ ކަމަށް ބަންޑާރަ ނައިބު އިބްރާހީމް ރިފްއަތު ވިދާޅުވުމުންނެވެ.
ނަމަވެސް އެ މައްސަލައިގެ ސްޓޭންޑަށް އައި ބަދަލުގެ ސަބަބުން ކަނޑުގެ ސަރަހައްދުގެ މައްސަލައިގައި ޖަވާބުދާރީވަމުން އައިސްފައިވާ އެއްވެސް ކަމަކަށް ނުވަތަ ސްޓޭންޑަށް އެއްވެސް ބަދަލެއް ނުގެންނާނެ ކަމަށް ސަރުކާރުން ވަނީ ތަކުރާރުކޮށް ބުނެފަ އެވެ.
އޭގެ އިތުރުން، ޗާގޯސްގެ ސިޔާދަތީ ބާރު މޮރިޝަސް އަށް ލިބުމަށް ރާއްޖެއިން ތާއިދުކޮށް އެ ގައުމާއި އެއްކޮޅަށް ވޯޓުލާން ނިންމީ، ރާއްޖެއަކީ އިސްތިއުމާރުކުރުމާ ދެކޮޅު ގައުމަކަށްވެފައި ގައުމުތަކުގެ ސިޔާދަތީ ބާރު އޮތުމަށް ތާއިދުކުރާ ގައުމަކަށް ވާތީ ކަމަށްވެސް ސަރުކާރުން ވަނީ ބުނެފަ އެވެ.
މި ކަމުގައި އެންމެ ބޮޑު ކަންބޮޑުވުމެއް އުފެދިގެން އުޅޭ ކަމަކީ، ސަރުކާރުގެ ސްޓޭންޑް ބަދަލުކުރި ކަން އަންގައި މޮރިޝަސްގެ ބޮޑުވަޒީރަށް ރައީސް ސޯލިހު ފޮނުވި ސިޓީއާ ގުޅިގެނެވެ. އެ ސިޓީ ސަރުކާރުން ހާމަކޮށްފައި ނެތް އިރު، އެ ސިޓީ ހާމަކުރުމަށް ވެސް ގިނަ ބަޔަކު ދަނީ ގޮވާލަމުންނެވެ.
