ބާސެލޯނާ (މެއި 24) - ސްޕެނިޝް ލީގުގައި ރޭ ކުޅުނު މެޗުގައި ރެލިގޭޝަނުން ސަލާމަތްވާން މަސައްކަތް ކުރަމުން އަންނަ ރެއާލް ވަޔޮޑޮލިޑް އިން 3-1 އިން ލީގު ޗެމްޕިއަންކަން ކަށަވަރުކޮށްފައިވާ ބާސެލޯނާ ބަލިކޮށްފި އެވެ.
މި މޮޅާ އެކު ވަޔޮޑޮލިޑް ވަނީ ރެލިގޭޝަން ޒޯނުގައި 18 ވަނައިގައި އޮތް ގެޓަފޭއާ ތިން ޕޮއިންޓަށް ދުރަށް ޖެހިލައިފަ އެވެ. އެކަމަކު، އެއީ ގެޓަފޭ އަށް ވުރެ އެއް މެޗު އިތުރަށް ކުޅެގެންނެވެ. ބާސެލޯނާ އިން ވަނީ މީގެ ނުވަ ވަރަކަށް ދުވަސް ކުރިން ލީގު ޗެމްޕިއަންކަން ކަށަވަރުކޮށްފަ އެވެ.
ވަޔޮޑޮލިޑުން އަމިއްލަ ދަނޑުގައި ކުޅުނު މެޗު ފަށައިގެން ދެ ވަނަ މިނިޓްގައި ލީޑުނެގީ ބާސެލޯނާގެ ޑެންމާކް ޑިފެންޑަރު، އަންދްރެއަސް ކްރިސްޓެންސަން އަތުން ބައިކޮޅަށް ވަން ގޯލުންނެވެ. މެޗުގެ 22 ވަނަ މިނިޓްގައި ވަޔޮޑޮލިޑުން ލީޑުފުޅާކުރީ ޕެނަލްޓީ އަކުންނެވެ. ބާސެލޯނާގެ ޑިފެންޑަރު، އެރިކް ގާސިއާ އެ ޓީމުގެ އޭރިއާތެރެއިން ވަޔޮޑޮލިޑްގެ ގޮންޒާލޯ ޕްލާޓާ އަށް ކުރި ފައުލަކަށް ދިން ޕެނަލްޓީ، ކައިލް ލަރީން ވަނީ ވައްދާލައިފަ އެވެ.
މެޗުގެ 73 ވަނަ މިނިޓްގައި ލަރީން ދިން ބޯޅައަކުން ވަޔޮޑޮލިޑްގެ ތިން ވަނަ ގޯލު ޖެހީ ގޮންޒާލޯ ޕްލާޓާ އެވެ. މެޗުގެ ފުރިހަމަ ވަގުތު ހަމަވާން ހަ މިނިޓަށް ވެފައި އޮއްވައި، ބާސެލޯނާ އިން މި މެޗުގައި ޖެހި ހަމައެކަނި ގޯލު ކާމިޔާބުކުރީ ފްރެންކީ ޑި ޔޯން ދިން ބޯޅައަކުން ރޮބަޓް ލެވަންޑޯސްކީ އެވެ.
ސްޕެނިޝް ލީގުގައި ރޭގެ މެޗުތައް ފެށުމުގެ ކުރިން ވަނީ ނަަސްލީ ތަފާތު ކުރުމާ ދެކޮޅަށް ކުރާ މަސައްކަތަށް ބާރުއެޅުމުގެ ގޮތުން ދެ ޓީމުން އެއްވެ، ބެނާއެއްގައި ޖަހާފައިވާ މެސެޖެއް ދައްކާލައިފަ އެވެ. ނަސްލީ ތަފާތު ކުރުމުގެ މައްސަލަ ހޫނުވެފައި މި ވަނީ ރެއާލް މެޑްރިޑްގެ ބްރެޒިލް ފޯވާޑް، ވިނީޝިއުސް ޖޫނިއާއާ ނަސްލީ ގޮތުން ވެލެންސިއާ ދަނޑުގައި ތިބި ގިނަ ސަޕޯޓަރުންތަކެއް ދިމާކޮށްލާފައިވާއިރު، އެ އަށް މީޑިއާގެ ޕްރެޝަރު ވެސް ބޮޑުވެފައިވާތީ އެވެ.
