ލަންޑަން (މެއި 23) - މި ސީޒަނުގެ ނިޔަލަށް މެންޗެސްޓާ ސިޓީގެ ކޮންޓްރެކްޓްގައި ހުރި ޖަރުމަނުގެ މިޑްފީލްޑަރު، އިލްކާއި ގުންޑޮގާންގެ ސޮއި ހޯދަން އާސެނަލުން މަސައްކަތް ފަށާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ގުންޑޮގާން، 32، އަކީ މިދިޔަ އަހަރުތަކުގައި ސިޓީން ހޯދި ގިނަ ކާމިޔާބީތަކުގައި އިސް ރޯލެއް ކުޅެފައިވާ ކުޅުންތެރިއެކެވެ. ސިޓީގެ ކޯޗުކަމާ ގާޑިއޯލާ، 2016 ވަނަ އަހަރު ހަވާލުވުމަށް ފަހު، އެންމެ ފުރަތަމަ ގެނައި ކުޅުންތެރިއަކީ އޭރު ބޮރޫޝިއާ ޑޯޓްމަންޑުގައި ވިދަމުން އައި ތުރުކީ ދަރިކޮޅަށް ނިސްބަތްވާ ގުންޑޮގާން އެވެ.
މި ސީޒަނުގެ ނިޔަލަށް ގުންޑޮގާން، ސިޓީގައި ހުރިއިރު، އޭނާ ލައްވައި އާ ކޮންޓްރެކްޓެއްގައި ސޮއިކުރުވުމުގެ ޝައުގުވެރިކަން ހުރި ކަމަށް ދާދި ފަހުން ވެސް ގާޑިއޯލާ ވަނީ ބުނެފަ އެވެ. އެކަމަކު، މީގެ އެންމެ ފަހު ގޮތެއް ނިންމާނީ ގުންޑޮގާން ކަމަށްވާތީ، އޭނާގެ ކޮންމެ ނިންމުމަކަށް ވެސް އިހުތިރާމްކުރާނެ ކަމަށް ސިޓީން ބުނެފައިވެ އެވެ.
ފާއިތުވި އަހަރު ވެސް ސިޓީގެ ދެ ކުޅުންތެރިއަކު ވަނީ އާސެނަލަށް ބަދަލުވެފަ އެވެ. އެއީ ގަބްރިއެލް ޖީސޫސް އާއި އޮލެކްސަންޑަ ޒިންޗެންކޯ އެވެ. އެހެންކަމުން، ގުންޑޮގާން އަށް ވެސް އެ ގޮތަށް ކްލަބް ބަދަލުކުރުމަކީ އުނދަގޫ ނިންމުމަކަށް ނުވާނެ ކަމަށް ލަންޑަންގެ ބައެއް މީޑިއާތަކުން ވަނީ ރިޕޯޓްކޮށްފަ އެވެ.
ސިޓީ އަށް ޖުމްލަ އެކު، 301 މެޗުން 58 ލަނޑު ޖަހައި، 40 ގޯލު ޖަަހަން ފުރުސަތު ހޯދައިިދިން ގުންޑޮގާން އަކީ މި ސީޒަނުގައި ސިޓީގެ ކެޕްޓަން ބޭންޑް އަޅައިގެން ގިނަ މެޗުތަކެއް ކުޅުނު ކުޅުންތެރިއެކެވެ. ލީގުގައި އެންމެ ފަހުން ޗެލްސީ ބަލިކޮށް ސިޓީން ލީގު ތަށި އުފުލާލިިއިރު، ޓީމުގެ ކެޕްޓަނަކީ ގުންޑޮގާން އެވެ.
ނިއުރެމްބާގާއި ބޮކުމް އަށް ވެސް ކުޅެފައިވާ ގުންޑޮގާން ގެންދަން ބާސެލޯނާ އާއި އިންޓަ މިލާނުން ވެސް ޝައުގުވެރިވެ އެވެ.
