ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ޗެލެންޖް ކަޕްގައި މިއަދު ރާއްޖޭގެ އަންހެން ވޮލީބޯޅަ ޓީމުން ކުޅޭ މެޗުގައި އުޒްބެކިސްތާނާ ދެކޮޅަށް ނުކުންނައިރު، އެ މެޗުގައި ކުޅެން ޖެހޭނީ ވަރަށް ވިސްނުންތެރިކަމާ އެކު ސަމާލުކަން ދީގެން ކަމަށް ގައުމީ ޓީމުގެ އެސިސްޓަންޓް ކޯޗު އަހުމަދު އަދީލް (ބޭބެ) ބުނެފި އެވެ.
ރާއްޖޭން ފުރަތަމަ މެޗުގައި ރޭ ވަނީ ކަޒަކްސްތާން އަތުން ތިން ސެޓުން ބަލިވެފަ އެެވެ. ދެ ވަނަ މެޗުގައި މިއަދު ނުކުންނާނީ އުޒްބެކިސްތާނާ ދެކޮޅަށެވެ.
އުޒްބެކިސްތާން ވަނީ ގްރޫޕްގައި ކުޅުނު ފުރަތަމަ މެޗުން އިއްޔެ ސްރީ ލަންކާ އަތުން ތިން ސެޓުން މޮޅުވެފަ އެވެ.
ކަޒަކްސްތާން މެޗަށް ފަހު ދިން އިންޓަވިއުއެއްގައި ބޭބެ ބުުނީ ދެ ވަނަ މެޗުގައި ކުޅެން ޖެހޭ އުޒްބެކިސްތާނަކީ މި ގްރޫޕްގެ ގަދަ ދެ ޓީމުގެ ތެރޭގައި ހިމެނިގެން ސެމީ އަށް ދިއުމުގެ ފޭވަރިޓެއްގެ ގޮތުގައި އޮތް ޓީމެއް ކަމަށެވެ.
"އަޅުގަނޑުމެން މި މުބާރާތުގެ ފޭވަރިޓެއްގެ ގޮތުގައި ކަޒަކްސްތާން ބެލީ، ކަޒަކްސްތާންގެ އިތުރުން އިންޑިއާ ދެން މި އޮތީ، ދެން އިންޑިއާ އަނެއް ފަޅީގައި (އަނެއް ގްރޫޕްގައި) އޮތަސް، ދެން އުޒްބެކް އަކީ ހަމަ މިހާރު މި ފަޅީގައި އޮތް ފޭވަރިޓެއް، އަޅުގަނޑުމެން މި އޮތް ގްރޫޕް ބީ އިން (ސެމީ ފައިނަލަށް ދާން)، އެހެންވީމަ އުޒްބެކް މެޗަކީ ވަރަށް ހާޑްކޮށް ވަރަށް ރަނގަޅަށް ޖައްސައިގެން މޮޅަށް ކުޅެން ޖެހޭ މެޗެއް. ރަނގަޅު ނަތީޖާއެއް ނެރެވޭނެ ކަމަށް މި ބަލަނީ،" ސެންޓްރަލް ޒޯން މުބާރާތުން 2019 ވަނަ އަހަރު ރާއްޖޭގެ އަންހެން ޓީމަށް ރިހި މެޑަލް ހޯދައިދިން ކޯޗިން ޓީމުގައި އިސް ރޯލެއް ކުޅުނު ބޭބެ ބުންޏެވެ.
ކަޒަކްސްތާން މެޗުން ބަލިވުމުގައި ބޭބެ ވެސް އެންމެ ބޮޑަށް ފާހަގަކުރި އެއް ކަމަކީ ދެ ވަނަ ސެޓުގައި، ރާއްޖޭގެ އައިޝަތު މާޖިދާ އަށް އަނިޔާވެގެން ބަދަލުކުރަންޖެހި އޭގެ ސަބަބުން ދެން މުޅި ޓީމަށް ކުރި އަސަރެވެ. އަނެއްކޮޅުން ކޮންފިޑެންސާ އެކު ކުޅެން ބަލާއިރު، ޓީމުގެ ކެޕްޓަން ހައްވާ ރާޝިދާ (ހައްވަ) ވެސް މެޗު ކުޅުނީ ބަލިވުމަށް ފަހު، އެއްކޮށް ރިކަވާ ނުވަނިސް ކަމަށްވާއިރު، އެއީ ވެސް ޓީމަށް ދިމާވި ގޮންޖެހުމެކެވެ.
"ފުރަތަަމަ ދެ ސެޓު ފުދޭ ވަރަކަށް ރަނގަޅަށް ކުޅުނު ކުޅެފައި. ދެން، މާޖީ އިންޖަރީީވީ ހިސާބުން މެޗު އެއްކޮށް އެނބުރުނުތަން މި ފެނުނީ. ބޮޑަށް ހީވަނީ އެރުވި ޒުވާން ކުޅުންތެރިންނަށް އަދި މި ލެވަލްގެ އިތުރު މެޗުތައް ބޭނުންވާނެހެން އެ ލެވަލްގައި ކުޅެން،" ގައުމީ އަންހެން ވޮލީ ޓީމުގެ ހެޑް ކޯޗެއްގެ ގޮތުގައި އެކި ފަހަރު މަތިން މުބާރާތްތަކުގައި މަސައްކަތްކޮށްފައިވާ ބޭބެ ބުންޏެވެ.
"އެ ފެނިގެންދިޔައީ މި ކަހަލަ ކޮމްޕެޓިޝަނެއްގައި އެ ހުންނަ އުނދަގޫތައް އާ ކުޅުންތެރިން ކުއްލިއަކަށް އެރުވީމަ އެ ކޯޕް ނުކުރެވިގެންދިޔައީ. ހީވަނީ ކުރިއަށް އޮތްތާގައި މި އަށް ވުރެ ރަނގަޅުވާނެހެން،"
ބޭބެ ބުނީ މި މުބާރާތުގެ ޝެޑިއުލް ރޭވިފައި އޮތް ގޮތުން ޖެހިޖެހިގެން ތިން ދުވަހު ގްރޫޕް ސްޓޭޖުގެ ތިން މެޗު ކުޅެން ޖެހޭއިރު، ވަރަށް ބޮޑަށް ރިކަވަރީ ބޭނުންވާނެ އެވެ. އަދި މެޗަށް ކުޅުންތެރިން ތައްޔާރުވުމުގައި ވެސް ގިނަ ކަންކަން ކުރަން ޖެހޭކަން ބޭބެ ފާހަގަކުރި އެވެ.
"ކައިރި ކައިރީގައި މެޗުތައް އޮތުމުން ކުޅުންތެރިން ބޮޑަށް ރިކަވަރީ ބޭނުންވާނެ. އެހެން ހުއްޓަސް މެންޓަލީ އަދި ފިޒިކަލީ ވެސް ކުޅުންތެރިން ތައްޔާރުކޮށް ރަނގަޅު ނަތީޖާ ނެރެން މަަސައްކަތް ކުރާނަން،" ބޭބެ ބުންޏެވެ.
ރާއްޖޭން ގްރޫޕް ސްޓޭޖުގައި ކުޅޭ ދެ ވަނަ މެޗުގައި މިއަދު ރާއްޖެ ގަޑިން ހަވީރު 5:45 ގައި ކުޅޭނީ އުޒްބެކިސްތާންއާ އެވެ.
