ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ޗެލެންޖް ކަޕްގައި ރާއްޖޭގެ އަންހެން ވޮލީ ޓީމުން ކުޅުނު ފުރަތަމަ މެޗުގައި ރޭ ކަޒަކްސްތާން އަތުން ބަލިވި މެޗުގައި ރާއްޖެ ޓީމުގެ ކުޅުންތެރިންގެ ފަރާތުން ފެނުނު މަސައްކަތް ރަނގަޅުކަމަށާއި އެހެން ނަމަވެސް، ގޭމް މެނޭޖްކުރަން ވަރަށް ރަނގަޅަށް ދަސްކުރަންޖެހޭ ކަަމަށް ގައުމީ އަންހެން ވޮލީ ޓީމުގެ ކޯޗު، ތައިލެންޑްގެ ވިޗީޕޮން ފޯންޗާޓްޔިންޗީޕް ބުނެފި އެވެ.
ކަޒަކްސްތާން މެޗުގައި ރާއްޖޭން ފުރަތަމަ ސެޓު ފަށައިގެން، ރަނގަޅަށް ލީޑެއްގައި އޮވެ ކުޅުނު ނަމަވެސް ކަޒަކްސްތާނުން ވަނީ މަތީ ލެވަލްގައި ކުޅެން ހޭނިފައިހުރުުމުގެ ތަޖުރިބާގެ ބޭނުހިފައި، 25-16، 25-14 އަދި 25-06 އިން ސެޓުތައް ގެންގޮސް މެޗުން މޮޅުވެފަ އެވެ.
ކަތުމަންޑޫ ނެޝަނަލް ސްޕޯޓްސް ކޮމްޕެލްކްސްގެ އިންޑޯ ވޮލީ ކޯޓުގައި ރޭ ކުޅުނު މެޗުގެ ދެ ވަނަ ސެޓުގައި ރާއްޖެ ޓީމުގެ މުހިންމު ތަރި، އައިޝަތު މާޖިދާ އަށް އަނިޔާވެގެން ބަދަލުކުރަން ޖެހުނުއިރު، ޓީމުގެ ކެޕްޓަން، ހައްވާ ރާޝިދާ (ހައްވަ) ވެސް ކުޅެފައިވަނީ ބަލިން އެއްކޮށް ރަނގަޅުނުވެ ހުރެ އެވެ. މިއީ އަސްލު ލެވަލްގައި ކުޅެން ރާއްޖޭގެ ޓީމަށް ދިމާވި ގޮންޖެހުމެކެވެ.
"އަހަރެމެން ފުރަތަމަ ސެޓުގެ ވަކި ހިސާބަކަށް މި ދިޔައީ ވަރަށް ރަނގަޅަށް، މުޅި މެޗުގައި ވެސް އަނެއްހެން މަސައްކަތް ރަނގަޅު މި ދިމާވީ، މެޗު މެނޭޖްކުރުމުގެ މައްސަލަތަކެއް، އެ ވެދާނެ އިދިކޮޅުގައި އޮތް ޓީމު (ކަޒަކްސްތާން) ވަރަށް ވަރުގަދަވެފައި އެ މީހުންނަށް މެޗު ކޮންޓްރޯލް ލިބުނީމަ އަހަރެމެންނަށް ގޯސްތަކެއް ހެދުނީ ކަމަށް،" ތައިލެންޑްގައި ގިނަ އަހަރުތަކެއް ވަންދެން މަތީ ފަންތީގައި ކޯޗިން ތަޖުރިބާތަކެއް ހާސިލްކުރި ވިޗީޕޮން ބުންޏެވެ.
އޭނާ ބުނީ މި މެޗުގައި ރާއްޖޭގެ ކުޅުންތެރިންގެ މެޗު ކޮންސަންޓްރޭޝަން (ސަމާލުވާންޖެހޭ މިންވަރު) ބަހައްޓަން ޖެހޭ ވަރަށް ނެތުމުން ވަކި ހާލަތްތަކެއްގައި ކަޒަކްސްތާން އިން ތަޖުރިބާގެ ބޭނުންކޮށްގެން އެޑްވާންޓޭޖް ނެގި ކަމަށެވެ.
އަނެއްކޮޅުން، ރާއްޖެ ޓީމަށް މާޖިދާގެ އަނިޔާ އަށް ފަހު ކޮންމެވެސް ވަރެއްގެ ނުތަނަވަސްކަމެއް ކުރިމަތިވި ކަމަށް ވިޗީފޮން ވަނީ ބުނެފަ އެވެ.
"ގޮންޖެހުން ދިމާވި، އެކަމަކު، ވިސްނަންވީ މި ގޮތަށް، ބަދަލުގައި އެ އެރި ޒުވާން ކުޅުންތެރިން ވެސް އެ ލީ ހިތްވަރު، އެ ކުޅުންތެރިންނަށް މިއަދު (އިއްޔެ) އެ ލިބުުނު ތަޖުރިބާގެ އަލީގައި ދެން ކުޅޭ ކޮންމެ މެޗެއް، މެޗަކަށް ފަހު މެޗެއް ދާނީ ރަނގަޅުވަމުން،" ވިޗީފޮން ބުންޏެވެ.
"އަހަރެން މައާފަށް އެދެން، މިއީ (ކަޒަކްސްތާން މެޗުގައި ނުކުތީ) އެންމެ ރަނގަޅު ނަތީޖާއެއް ނޫން، މި އަށް ވުރެ ރަނގަޅަށް އަހަރެމެންނަށް ކުޅެވޭނެ،"
ރާއްޖޭން ގްރޫޕް ސްޓޭޖުގައި ކުޅޭ ދެ ވަނަ މެޗުގައި މިއަދު ރާއްޖެ ގަޑިން ހަވީރު 5:45 ގައި ކުޅޭނީ އުޒްބެކިސްތާންއާ އެވެ. އުޒްބެކިސްތާން ވަނީ ފުރަތަމަ މެޗުން އިއްޔެ، ސްރީ ލަންކާ އަތުން ތިން ސެޓުން މޮޅުވެފަ އެވެ. ރާއްޖޭން ގްރޫޕްގެ ފަހު މެޗުގައި މާދަމާ ހަވީރު ލަންކާއާ ބައްދަލުކުރާނެ އެވެ.
ވިޗީފޮން ބުނީ މި ދެ މެޗުގައި ވެސް ކަޒަކްސްތާން މެޗަށް ވުރެ ރަނގަޅަށް ޕާފޯމްކުރެވޭ ވަރަށް ކުޅުންތެރިން ތައްޔާރުވާނެ ކަމާ މެދު ޔަގީންކަން އެބައޮތް ކަމަށެވެ.
