މިއުނިކް (މެއި 22) - ޖަރުމަނު ލީގުގައި ރޭ 10 ކުޅުންތެރިންނާ އެކު މެޗު ނިންމާލި އޮއުސްބާގް އަތުން 3-0 އިން މޮޅުވެ، ބޮރޫޝިއާ ޑޯޓްމަންޑުން ލީގު ޗެމްޕިއަންކަން ހޯދުމާ ގާތަށް ޖެހިލައިފި އެވެ.
ހޮނިހިރު ދުވަހުގެރޭ އާރްބީ ލައިޕްޒިގު އަތުން ބަޔާން މިއުނިކް ބަލިވުމާ އެކު، ޑޯޓްމަންޑަށް ލިބުނު ފުރުސަތުގެ .ބޭނުންހިފައި އެ ޓީމުް މި ވަނީ ލީގުގެ އެއް ވަަނައިގައި ދެ ޕޮއިންޓުގެ ލީޑެއް ނަގައިފަ އެވެ. ޑޯޓްމަންޑް އެއް ވަނައިގައި އޮތީ 33 މެޗުން 70 ޕޮއިންޓާ އެކު އެވެ. ދެ ވަނައިގައި އޮތް ބަޔާނަށް ލިބިފައިވަނީ 33 މެޗުން 68 ޕޮއިންޓެވެ. ބާކީ ދެ ޓީމަށް ވެސް އެއް މެޗު އޮތްއިރު، ޑޯޓްމަންޑް މޮޅުވެއްޖެނަަމަ، 2012 ވަނަ އަހަރުގެ ފަހުން ފުރަތަމަ ފަހަރަށް ލީގު ތަށި އުފުލާލެވޭނެ އެވެ.
އޮއުސްބާގަށް ރޭގެ މެޗުގައި މައްސަަލަ ދިމާވީ އެ ޓީމުގެ ޑިފެންޑަރު، ފެލިކްސް އުޑޮކާއި އަށް މެޗުގެ 38 ވަނަ މިނިޓްގައި ރަތް ކާޑު ދެއްކުމުންނެވެ. މިއީ ޑޯޓްމަންޑްގެ ޑޮޮންޔެލް މާލެން އަށް އެންމެ ފަހަތުގައި ހުރެފައި އުޑޮކާއި ކުރި ފައުލަކަށް ދެއްކި ރަތް ކާޑެކެވެ.
ޑޯޓްމަންޑުން ލީޑުނެގީ މެޗުގެ 58 ވަަނަ މިނިޓްގައި ސަބެސްޓިއަން އަލެއާ ޖެހި ގޯލުންނެވެ. މިއީ ޑޯޓްމަންޑްގެ ޑޮންޔެލް މާލެން ދިން ބޯޅަ އަކަށް އަރައި، ޖާގަ ހޯދައިގެން، އަލެއާ ޖެހި ގޯލެކެވެ. މެޗުގެ 84 ވަނަ މިނިޓްގައި ޑޯޓްމަންޑްގެ ކެޕްޓަން މާކޯ ރެއުސް ޖެހި ބޯޅައެއް އޮއުސްބާގްގެ ކީޕަރު، ތޯމަސް ކޫބެކް އަތުގައި ޖެހިފައި ނުކުތް ވަގުތު އަލެއާ ވަނީ ރީބައުންސް ގޯލަށް ފޮނުވާލައިފަ އެވެ.
މެޗުގެ އިތުރު ވަގުުތުގެ ގޮތުގައި ދެއްކި ފަސް މިނިޓްގެ ތެރެއިން ތިން ވަނަ މިނިޓްގައި ޑޯޓްމަންޑްގެ ތިން ވަނަ ގޯލު ޖެހީ އޭރިއާތެރެއިން ގޯލުގެ ދުރު ކަނަށް ބޯޅަ ފޮނުވާލައިގެން ޔޫލިއަން ބްރަންޑްޓް އެވެ.
ބަޔާނަށް ޖެހިޖެހިގެން 11 ވަނަ ލީގު ތަށި ހޯދުމަށް ދިމާވި ހުރަހަކީ ސީޒަނުގެ މެދުތެރެއިން ކޯޗު ބަދަލުވުމެވެ. އެ ގޮތުން، ސީޒަން ފެށިއިރު، ބަޔާންގައި ހުރި ކޯޗު ހޫލިއަން ނާގަލްސްމަން ވަނީ މާޗް މަހު ވަޒީފާއިން ވަކިކޮށްފަ އެވެ. ދެން، އެ ޓީމުން ގެނައީ ޗެލްސީ އާއި ޑޯޓްމަންޑަށް ކުރިން ކޯޗުކޮށްދިން ތޯމަސް ޓުޗެލް އެވެ. އެކަމަކު، ޓުޗެލް އަށް ޓީމު ހަމަޔަކަށް އަޅުވަން އެކަށީގެންވާ ފުރުސަތު ނުލިބޭތީ ގިނަ މައްސަލަތަކެއް ކުރިމަތިވި އެވެ.
