އެމްޑީޕީގެ ރައީސް މުހައްމަދު ނަޝީދުގެ "ފިކުރެއްގެ ދިރުން" ހަރަކާތް ސިޔާސީ ޕާޓީއަކަށް ބަދަލުކުރުމުގެ މަސައްކަތް ރަސްމީކޮށް ކުރިއަށް ގެންދިޔުމަށްޓަކައި އެކަމުގެ ހުއްދައަށް އެދި އިލެކްޝަން ކޮމިޝަނަށް މިއަދު ހުށަހަޅާނެ ކަމަށް އެ ހަރަކާތުން ބުނެފި އެވެ.
އެންމެ ގިނަ ދުވަސްވީ އަދި އެންމެ ބޮޑު ސިޔާސީ ޕާޓީ، އެމްޑީޕީގެ ރިޔާސީ ޕްރައިމަރީގައި، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް ނަޝީދަށް ލިބިވަޑައިގެންނެވި ބޮޑު ނާކާމިޔާބީ އަށް ފަހު ފުރަތަމަ ވެސް ނިންމެވީ ފިކުރެއްގެ ދިރުން ހަރަކާތުން ރިޔާސީ އިންތިހާބުގައި، ރައީސް އިބްރާހިމް މުހައްމަދު ސޯލިހު ނޫން ކެންޑިޑޭޓަކަށް ތާއިދު ކުރުމަށެވެ.
ރިޔާސީ އިންތިހާބުގައި ޖުމްހޫރީ ޕާޓީގެ ލީޑަރު ގާސިމް އިބްރާހިމްއާއެކު ކުރިއަށް ވަޑައިގަތުމަށް މަސައްކަތްތަކެއް ކުރެއްވުމަށް ފަހު، އެކަން ދޫކުރައްވައި ރިޔާސީ އިންތިހާބުގައި ކެންޑިޑޭޓަކު ނެރޭނެ ކަމަށް ބުނެ ފިކުރެއްގެ ދިރުން ހަރަކާތް ސިޔާސީ ޕާޓީއަކަށް ބަދަލުކުރާން ނިންމާފައިވާކަން އިއުލާނު ކުރީ މިދިޔަ ބުދަ ދުވަހު އެވެ.
އެކަން އިއުލާނު ކުރެއްވީ ނަޝީދަށް ތާއިދު ކުރައްވާ ރައްޔިތުންގެ މަޖިލީހުގެ 12 މެންބަރަކު އެމްޑީޕީން ވަކިވެގެން ބޭއްވި ނިއުސް ކޮންފަރެންސްގަ އެވެ. އެ މެންބަރުން އެމްޑީޕީން ވަކިވުމުގެ ސިޓީގައި ސޮއިކުރެއްވީ ނަޝީދުގެ ހާޒިރުގައި، ރައްޔިތުންގެ މަޖިލީހުގަ އެވެ.
ނަޝީދުގެ އާ ޕާޓީއަށް ކިޔާނެ ނަމަކާއި ކުލަ ކަނޑައެޅުމަށް ސަޕޯޓަރުންގެ ހިޔާލު ވަނީ ހޯދައިފަ އެވެ. ސޯޝަލް މީޑިއާގައި ދައުރުވާ ފިކުރެއްގެ ދިރުން ހަރަކާތުގެ ބްރޭންޑިން މިހާރު ވަނީ އެމްޑީޕީގެ ވަރުގަދަ ރީނދޫ ކުލަ ދޫކޮށް، މަޑު ނޫކުލައަކަށް ބަދަލުކޮށްފަ އެވެ.
އެމްޑީޕީގެ ރިޔާސީ ޕްރައިމަރީ އަށް ފަހު ނަޝީދު ސަޕޯޓަރުންނާއެކު ބޭއްވި ބައްދަލު ކުރެއްވުމުގައި އެ މަނިކުފާނު ތުރުކުރައްވައިގެން ހުންނެވީ މަޑު ނޫކުލައެއްގެ ޓައީގެ ވާހަކަ އޭރު ސޯޝަލް މީޑިއާގައި ވައިރަލްވި އެވެ.
އާ ޕާޓީ އުފެއްދުމެ މަސައްކަތް ކުރިއަށް ގެންދިޔަ ނަމަވެސް އެކަމާ ގުޅޭ ގޮތުން މިހާތަނަށް ނަޝީދު ބަހެއް ވިދާޅެއް ނުވެ އެވެ.
