މިއުނިކް (މެއި 21) - ޖަރުމަނު ލީގުގައި ރޭ އާރްބީ ލައިޕްޒިގު އަތުން 3-1 އިން ބަލިވެ، ބަޔާން މިއުނިކަށް ލީގުގެ ރޭހުގައި އުނދަގޫ ހާލަތެއް ކުރިމަތިވެއްޖެ އެވެ.
ބަޔާން މި ވަގުތު ޖަރުމަނު ލީގުގެ އެއް ވަނައިގައި އޮތީ އެއް މެޗު އިތުރަށް ކުޅެގެން ދެ ވަނައިގައި އޮތް ބޮރޫޝިއާ ޑޯޓްމަންޑަށް ވުރެ އިތުރަށް އެއް ޕޮއިންޓް ހޯދައިގެންނެވެ. ބަޔާނަށް 33 މެޗުން 68 ޕޮއިންޓް ލިބިފައިވާއިރު، ޑޯޓްމަންޑަށް ވަނީ 32 މެޗުން 67 ޕޮއިންޓް ލިބިފަ އެވެ. އޮއުސްބާގް އަތުން ޑޯޓްމަންޑް މިރޭ މޮޅުވެއްޖެނަމަ އެއް ވަނައިގައި ދެ ޕޮއިންޓުގެ ލީޑެއް ލިބޭނެ އެވެ.
އަމިއްލަ ދަނޑުގައި ކުޅުނު ބަޔާނަށް މެޗުގެ 25 ވަނަ މިނިޓްގައި ލީޑުނަގައިދިނީ ތޯމަސް މުލާ ދިން ބޯޅައަކުން ސާޖް ގްނަބްރީ އެވެ. ލައިޕްޒިގުން ނަތީޖާ އަނބުރާލީ މެޗުގެ ދެ ވަނަ ހާފުގަ އެވެ. އެ ޓީމުން އެއްވަރުކުރި ގޯލު ޖެހީ މެޗުގެ 64 ވަނަ މިނިޓްގައި ކޮންރަޑް ލައިމާ އެވެ.
ލައިޕްޒިގު މޮޅުވި ދެ ގޯލަކީ ޕެނަލްޓީން ޖެހި ގޯލުތަކެކެވެ. މި ޕެނަލްޓީތައް ކާމިޔާބުކޮށްދިނީ ކްރިސްޓޮފާ އެންކުންކޫ އާއި ޑޮމިނިކް ސޮބޯޒްލާއީ އެވެ. ފުރަތަމަ ޕެނަލްޓީ އަކީ އެންކުންކޫ އަށް ބަޔާންގެ ބެންޖަމިން ޕަވާޑް ކުރި ފައުލަކަށް ދިން ޕެނަލްޓީ އެކެވެ. ފަހު ޕެނަލްޓީ ދިނީ ބަޔާންގެ ނުސައިޒު މަޒްރައޮއީ އޭރިއާތެރެއިން ސޮބޯޒްލާއީ އަށް ފައުލުކުރުމުންނެވެ.
ޑޯޓްމަންޑުން ކުރިއަށް އޮތް ދެ މެޗުން މޮޅުވެއްޖެނަމަ 2012 ވަނަ އަހަރުގެ ފަހުން ފުރަތަަމަ ފަހަރަށް ލީގު ޗެމްޕިއަންކަން ލިބޭނެ އެވެ. ޑޯޓްމަންޑަށް އޮތީ އޮއުސްބާގްގެ އިތުރުން އަމިއްލަ ދަނޑުގައި މައިންޒާ ކުޅޭ މެޗެވެ. އަދި ބަޔާނަށް އޮތީ ރަށުންބޭރުގައި ކޮލޯންއާ ބައްދަލުކުރާ މެޗެވެ.
ބަޔާން އަތުން ހޯދި މޮޅާ އެކު ލައިޕްޒިގަށް ވަނީ ލީގުގެ ތިން ވަނަ ޔަގީންވެފަ އެވެ.
