ހާރްތޫމް، ސޫދާން (މޭ 20) - ސޫދާންގައި ކުރިއަށްދާ ދާހިލީ ހަނގުރާމައިގެ ތެރެއިން ހޮނިހިރު ދުވަހު ހަތިޔާރު ހިފައިގެން ތިބި ބަޔަކު ގަތަރު އެމްބަސީއަށް ހަމަލާ ދީފި އެވެ.
ރިޕޯޓުތައް ބުނާ ގޮތުން އިންސާނީ އެހީ ފޯރުކޮށްދިނުމަށް ހަމަލާ މެދުކަނޑާލަން ބައިނަލްއަަގްވާމީ ފަރާތްތަކުން ބާރު އެޅި ނަމަވެސް، ހަމަލާތައް އަދިވެސް ދަނީ ކުރިއަށެވެ.
ހޮނިހިރު ދުވަހު ބޮމުގެ ހަމަލާތައް ދިނީ އޮމްދުރްމާން ސިޓީގައި ދައުލަތުގެ ޓީވީ ހުންނަ އިމާރާތް ކައިރިއަށެވެ. ހަނގުރާމައިގައި ގިނަ ބަޔަކު މަރުވެ، އެތައް މިލިއަން މީހުން ވަނީ ހާލުގައި ޖެހިފަ އެވެ.
އެޕްރީލް 15 ވަނަ ދުވަހު ހަނގުރާމަ ފެށީ ސޫދާންގެ ސިފައިންނާއި ރެޕިޑް ސަޕޯޓް ފޯސާޒް (އާރްއެސްއެފް) ގްރޫޕްގެ ފައުޖާ ދެމެދު އެވެ. އެއީ ސިފައިންގެ ވެރިޔާ އަބްދެލް ފައްތާހް އަލް ބުރްހާން އާއި އާރްއެސްއެފްގެ ވެރިޔާ މުހައްމަދު ހަމްދާން ދަގްލޯގެ ވާދަވެރިކަމުގެ ތެރެއިންނެވެ.
ވެރިކަމުގައި ބުރްހާން ހުރި އިރު، ނައިބުގެ މަގާމުގައި ހުރީ ދަަގްލޯ އެވެ. ވާދަވެރިކަމުގެ ތެރެއިން ހަނގުރާމަ ފެށުމުން، މިދިޔަ ހުކުރު ދުވަހު ބުރްހާން ވަނީ ނައިބުގެ މަގާމުން ދަގްލޯ ވަކިކޮށް، މާލިކް އަގަރްއަށް އެ މަގާމު ދީފަ އެވެ.
އަގަރް ނެރުނު ބަޔާނެއްގައި ބުނީ ސުލްހައަށް މަސައްކަތް ކުރާނެ ކަމަށާއި ގައުމަށް ހަމަޖެހުން ގެނެވޭނީ ޒިންމާދާރުކަމާ އެކު ހަރަކާތްތެރިވާ އެއްބައިވަންތަ ސިފައިންގެ ފައުޖެއްގެ ތެރެއިން ކަމަށެވެ.
ރިޕޯޓުތައް ބުނާ ގޮތުން ބުރްހާން އާއި ދަގްލޯއާ މައްސަލަ ޖެހުނީ އާރްއެސްއެފް އާއި ރަސްމީ ސިފައިން އެއްކޮށްލަން ދެކެވޭ ވާހަކައިގެ ތެރެއިންނެވެ.
އާރްއެސްއެފްއަކީ 2000 ގެ ކުރީކޮޅު ހަނގުރާމަވެރި ގްރޫޕަކާ ދެކޮޅަށް އުފެއްދި ފައުޖެކެވެ. އެކަމަކު އެއީ ރަސްމީ ސިފައިންނެއް ނޫނެވެ. އާރްއެސްއެފްގެ ބައެއް މެމްބަރުންނާ މެދު އެކި ކުށްތަކުގެ ތުހުމަތު ކުރެވެއެވެ.
ހޮނިހިރު ދުވަހު ގަތަރުގެ އެމްބަސީއަށް ހަމަލާދިން އިރު، ގަތަރުން ބުނީ މުވައްޒަފުން އިވެކުއޭޓްކޮށްފައި ވާތީ މީހަކަށް ގެއްލުމެއް ނުވާ ކަމަށެވެ.
ހަމަލާ ދިނީ ކޮން ބައެއް ކަމެއް ގަތަރުން ނުބުނެ އެވެ. އެކަމަކު އާރްއެސްއެފްގެ ސިފައިން މީގެ ކުރިން ވެސް ވަނީ އެމްބަސީތަކާއި އެހީދޭ ޖަމިއްޔާތަކަށް އަމާޒުކޮށްފަ އެވެ.
ގަތަރު އެމްބަސީއަށް ހަމަލާ ދިނުމުގެ ކުރިން އުރުދުން، ސައުދީ އަރަބިއްޔާ އަދި ތުރުކީގެ އެމްބަސީއަށް ވެސް ހަމަލާ ދިނެވެ.
