ޖެނީވާ، ސްވިޓްޒަލޭންޑް (މޭ 20) - ސްވިޓްޒަލޭންޑްގެ ފަރުބަދަ މަތީ ހިސާބެއްގައި ފަތުރުވެރިންނާ އެކު ދަތުރުކުރި މަތިންދާ ބޯޓެއް ވެއްޓި ބަޔަކު މަރުވެއްޖެ އެވެ.
ފުލުހުން ބުނީ ބޯޓު ވެއްޓުނީ އެ ގައުމުގެ ހުޅަނގު ޕޮންޓްސް ޑެ މާޓެލް ހިސާބުގައި ކަމަށެވެ. އެހެން ނަމަވެސް ތަފްސީލެއް ހާމައެއް ނުކުރެ އެވެ.
މީޑިއާ ރިޕޯޓުތައް ބުނާ ގޮތުން އެ ހާދިސާގައި މަރުވީ ތިން މީހުންނެވެ. މަތިންދާބޯޓު ވެއްޓުނީ ނިޔުޗަޓެލް ފަރުބަދައިގެ ޖަންގަލި ބޯ ހިސާބަކަށެވެ.
ފުލުހުން ބުނީ މަރުވި މީހުންގެ ތެރޭގައި ޕައިލެޓު ވެސް ހިމެނޭ ކަމަށެވެ.
ބޯޓު ވެއްޓުނު ހިސާބުގައި ފުލުހުންނާއި ރެސްކިއު ޓީމުތަކުން ހަރަކާތްތެރިވަމުންދާ އިރު، ވެއްޓުނު ސަބަބު ދެނެގަންނަން ތަހުގީގެއް ފަށާފައިވާ ކަމަށް އާރްޓީއެން ޓީވީން ބުންޏެވެ.
