އިންޓަ އޮފީސް/ކޮމްޕެނީ ވޮލީބޯޅަ މުބާރާތުގެ ފައިނަލުގެ ސީދާ ޖާގަ އާބަންކޯ އިން ހޯދިއިރު، ތިން ވަނަ ސެމީ ފައިނަލުގައި މާދަމާރޭ ވޭސްޓް މެނޭޖްމަންޓް ކޯޕަރޭޝަން (ވެމްކޯ) އާއި މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް/ސިފައިން) ވާދަކުރަން ޖެހިއްޖެ އެވެ.
މިއަދު ހަވީރު ކުޅުނު ސެމީ ފައިނަލުގައި މޯލްޑިވްސް ޕޮލިސް ސާވިސްގެ މައްޗަށް 3-1 އިން ކުރިހޯދައި، ވެމްކޯ އިން ވަނީ ތިން ވަނަ ސެމީ އަށް ދަތުރުކޮށްފަ އެވެ. ތިން ވަނަ ސެމީގައި މާދަމާރޭ ވެމްކޯއާ ކުޅޭ ސިފައިން ވަނީ މިރޭ ކުޅުނު ސެމީގައި އާބަންކޯ އަތުން 3-1 ސެޓުން ބަލިވެފަ އެވެ. ތިން ވަނަ ސެމީ ފައިނަލުން މޮޅުވާ ޓީމެއް އަންނަ ހޮނިހިރު ދުވަހުގެރޭ ފައިނަލުގައި އާބަންކޯއާ ކުޅޭނެ އެވެ.
ގްރޫޕް ސްޓޭޖުގައި ފުރިހަމަ ރެކޯޑަކާ އެކު ސެމީން ފުރުސަތު ހޯދި ސިފައިންނާއި އާބަންކޯގެ ކުރިމަތިލުން ދިޔައީ ފޯރިގަދަކޮށެވެ. މެޗުގެ ސެޓުތައް ދިޔައީ، 22-25، 25-20، 28-26 އަދި 25-23 އިންނެވެ.
ފުރަތަމަ ސެޓު ފަށައިގެން، ސިފައިންގެ ޓީމުން ވަނީ އާބަންކޯ އަށް މާ ބޮޑަށް ކުޅުމުގެ ފުރުސަތު ނުދީ އަވަސް ކުޅުމަކާ އެކު ފުރަތަމަ ސެޓުގައި ކޮންޓްރޯލް ނަގައިގެން ކުޅެ ސެޓު ގެންގޮސްފަ އެވެ. އެ ގޮތުން، ސިފައިންގެ ޓީމަށް ކުޅޭ ލަންކާގެ ކުޅުންތެރިޔާ، މަދުޝަކާ އާއި ދިވެހި ދެ އެޓޭކަރުން ކަމަށްވާ އާދަމް ނަސީމް (އެޑަމް) އާއި ހުސެއިން ރައްޒާންގެ ރަނގަޅު ކުޅުމާ އެކު އެ ޓީމުން ސެޓު ގެންދިޔަ އެވެ. އާބަންކޯ އަށް މި ސެޓުގައި ފޯމަކަށް އެޅިލައިގެން ކުޅެވޭނެ ޖާގައެއް ނުހޯދި، ޕްރެޝަރުގައި ގޯސްތަކެއް ހެދުނެވެ.
ސިފައިންގެ ޓީމުގެ އެޑަމް (މ) މިރޭގެ މެޗުގެ ތެރެއިން ޕޮއިންޓެއް ހޯދުމަށް ފަހު އުފާފާޅުކުރަނީ.--- ފޮޓޯ: މުހައްމަދު ޝާބިން/ އަދަދު
ދެ ވަނަ ސެޓުގައި އާބަންކޯގެ ސެޓަރު، އިޝާން މުހައްމަދު (ބަޓިސް)ގެ ތަޖުރިބާގެ ބޭނުންހިފައި ކުޅެން ފެށުމުގެ ނަތީޖާއަކަށްވީ އެ ޓީމުގެ އެޓޭކަރުންގެ ކުޅުން ފެށި އެވެ. އެ ގޮތުން، އާބަންކޯގެ އިސްމާއިލް ސާޖިދު (ކުޑަކާއްޓެ) އާއި ލަންކާ ކުުޅުންތެރިޔާ، ލަސިންދުގެ ބާރު ހަމަލާތައް ފެނިގެންދިޔަ މި ސެޓު، އާބަންކޯ އިން ގެންގޮސް މެޗު އެއްވަރުކުރި އެވެ.
މި މެޗުގެ އެންމެ ފޯރިގަދަވީ ތިން ވަނަ ސެޓެވެ. މި ސެޓުގެ ފަހުކޮޅުގައި އާބަންކޯގެ ޒުވާން ކުޅުންތެރިޔާ، ޝަމާއިލް ހުސެއިން ސާވިސް އިން ފުލުފުލުގައި ދެ ޕޮއިންޓް ހޯދައިދީ އެ ޓީމަށް ސެޓު ގެންގޮސްދިނުމާ ގާތަށް ޖެހިލި އެވެ. އެކަމަކު، އެ އަށް ރައްދުދީ ސިފައިންގެ ޓީމުގެ މަދުޝަކާ ވެސް ސާވިސް އިން ފުލުފުލުގައި ދެ ޕޮއިންޓް އެ ޓީމަށް ހޯދައިދީ އެއްވަރުކުރި އެވެ.
އާބަންކޯ އާއި ސިފައިން ވެސް ޕްރެޝަރުގައި ކުޅުނު މި ސެޓުގެ ފަހު ވަގުތުގައި އާބަންކޯގެ ލަސިންދު އާއި ކުޑަކާއްޓެގެ ރަނގަޅު އެޓޭކްތައް ފެނި، މި ސެޓު ގެންގޮސް އާބަންކޯ އިން މެޗުގެ ކޮންޓްރޯލް ނެގި އެވެ. އަދި ހަތަރު ވަނަ ސެޓުގައި ވެސް ތަފާތު ރޫހެއްގައި ކުޅެލައި، އެ ސެޓު ގެންގޮސް އާބަންކޯ މެޗުން މޮޅުވީ އެވެ.
އާބަންކޯގެ ކޯޗަކީ މުހައްމަދު ސާޖިދު (ކާއްޓޭ) އެވެ. މިރޭގެ މެޗުގައި މުހިންމު ވަގުތުގައި ޓައިމްއައުޓް ނަގައި، ޓީމު ހަމަޔަކަށް އެޅުވުމުގައި މުހިންމު ނިންމުންތަކެއް ނިންމި އެވެ. މިރޭގެ މެޗުގައި ރެފްރީންނާއި ލައިންޖަޖްގެ ނިންމުންތަކާ މެދު ދެ ޓީމުން ވެސް ވަރަށް ނުރުހުން ފާޅުކުރި އެވެ.
ޒުވާނުންގެ މަރުކަޒު އެތެރެ ކޯޓުގައި މިއަދު ހަވީރު ކުޅުނު މެޗުގައި ވެމްކޯ އިން ޕޮލިހުގެ މައްޗަށް ކާމިޔާބު ހޯދީ ރަނގަޅަށް ފޯކަސް ބަހައްޓައިގެން މޮޅަށް ކުޅެގެންނެވެ. މި މެޗުގެ ފުރަތަމަ ސެޓު ވެމްކޯ އިން ގެންދިޔައީ 19-25 އިންނެވެ.
ވެމްކޯ ޓީމުގެ ކެޕްޓަން ހުޒަންޓެ ޕޮއިންޓެއް ހޯދުމަށް ފަހު އުފާފާޅުކުރަނީ.--- ފޮޓޯ: މުހައްމަދު ޝާބިން/ އަދަދު
ކެޕްޓަން، އަލީ ހުޒާމް (ހުޒަންޓެ) އާއި އިންޑިއާ ކުޅުންތެރިޔާ، ވިނީތު ކުމާރުގެ މޮޅު ކުޅުމާ އެކު ފުރަތަމަ ސެޓުގައި ވެމްކޯ އިން ކޮންޓްރޯލް ނެގި ނަމަވެސް، ދެ ވަނަ ސެޓުގައި ޕޮލިހުން ވަނީ ރަނގަޅު ބަދަލުތަކެއް ގެނެސްގެން، ކުޅުން ރަނގަޅުކޮށްފަ އެވެ. ޕޮލިސް ޓީމުގެ އިންޑިއާ ކުޅުންތެރިޔާ، ހިމާންޝޫ ތިޔާގީ އާއި ޒުވާން ކުޅުންތެރިޔާ، މާއިޝް މުހައްމަދުގެ ރަނގަޅު އެޓޭކްތަކާ އެކު ޕޮލިހުން 25-21 އިން ދެ ވަނަ ސެޓު ގެންގޮސް އެއްވަރުކުރި އެވެ.
އެކަމަކު، ޕޮލިހުން ދެން ކުޅުނު ދެ ސެޓުގައި ވެމްކޯ އިން ކުރި ހިތްވަރާ އަރާ ހަމަނުކުރެވުނެވެ. ވެމްކޯ ޓީމުގައި އާންމުކޮށް ސެޓަރަކަށް ކުޅެމުން އައި، އަހުމަދު ޝިމާއު ސެންޓަ ބްލޮކަރަކަށް ކުޅެ، ވެސް ޕޮއިންޓް ހޯދައިދިންއިރު، ވިނީތު އާއި ހުޒާމް ފެނިގެންދިޔައީ ވަރަށް ބޮޑަށް ފޯމަކަށް އެޅިގެން ކުޅެލިތަނެވެ. ނަތީޖާ އަކަށްވީ ފަހު ދެ ސެޓު، 23-25 އާއި 25-27 އިން ގެންގޮސް ވެމްކޯ މެޗުން މޮޅުވުމެވެ.
ތިން ވަނަ ސެމީގައި ކުޅޭ ވެމްކޯ އާއި ސިފައިން ވަނީ މުބާރާތުގެ ގްރޫޕް ސްޓޭޖުގައި ބައްދަލުކޮށްފަ އެވެ. އެ މެޗުން ސިފައިން ވަނީ ފަސޭހައިން މޮޅުވެފަ އެވެ. އެކަމަކު، ވެމްކޯގެ ކޯޗު އިބްރާހިމް ނިޒާރު (ބޮޑޭ) އާއި ސިފައިންގެ ކޯޗު، އިބްރާހިމް ފަލާހު އަބޫބަކުރު މާދަމާރޭގެ މެޗުގައި މޮޅުވާން ކުރަން ޖެހޭ ކަންކަމަށް ފޯކަސްކޮށް މުހިންމު ކަންތައްތަކެއް ބަދަލުކުރާނެ އެވެ.
