ބާސެލޯނާ (މެއި 17) - ބާސެލޯނާގެ ސްޕޯޓިން ޑިރެކްޓަރުގެ މަގާމުގައި ހުރި ޖޯޑީ ކްރައިފް މި ސީޒަނަށް ފަހު އެ ކްލަބު ދޫކޮށްލާނެ ކަމަށް ބާސެލޯނާ އިން ބުނެފި އެވެ.
ބާސެލޯނާ އިން ނެރުނު ބަޔާނެއްގައި ބުނީ ޖޯޑީ "ކެރިއަރުގައި އެހެން ފުރުސަތުތަކެއް ލިބިފައި އޮތުމާ އެކު" މި ސީޒަނަށް ފަހު އޭނާގެ ކޮންޓުރެކްޓް އާނުކުރާނެ ކަމަށެވެ.
"ކްލަބުގެ އާ އެގްޒެކުޓިވް އޮނިގަނޑަކަށް ބަދަލުކުރުމުގެ މަސައްކަތް ކުރަމުންދާއިރު، އެ ކަމުގައި އެހީތެރިވާނެކަމުގެ ޔަގީންކަން ކްރައިފް ވަނީ ދީފަ. އަދި މި ސީޒަންގެ އޮޕަރޭޝަންސްތައް ނިންމުމަށް ވެސް އޭނާގެ އެއްބާރުލުން ލިބޭނެ،" ބާސެލޯނާ އިން ބުނެފައިވެ އެވެ.
ޖޯޑީ، 49، ބާސެލޯނާ ދޫކޮށްލާކަން އެ ކްލަބުން އިއުލާނުކުރިއިރު، އެ ކްލަބުގެ ޑިރެކްޓަރު އޮފް ފުޓްބޯލް މަތެއޫ އަލެމާނީ ވެސް ޖުލައި އެކަކުން ފެށިގެން އެ މަގާމުން ވަކިވާނެ ކަމަށް އެ ކްލަބުން ވަނީ އިއްޔެ ބުނެފަ އެވެ.
ޖޯޑީ އާއި އަލެމާނީ އަކީ ވެސް ބާސެލޯނާގެ ރައީސް ކަމަށް ޖޮއާން ލަޕޯޓާ 2021 ވަނަ އަހަރު މާޗު މަހު އިންތިހާބުވެ، އެ މަގާތުކަށް އައްޔަންކުރި ދެ މީހުންނެވެ. އޭރު އެ ކްލަބު އޮތީ މާލީ މައްސަލަތަކާ ގުޅިގެން ވަރަށް ނާޒުކު ފައްތަރެއްގަ އެވެ.
ޖޯޑީ އަކީ ބާސެލޯނާ އާއި ނެދަލޭންޑްސްގެ ލެޖަންޑް ޔޯހާން ކްރައިފްގެ ދަރިފުޅެވެ. ކްރައިފް ވާނީ ބާސެލޯނާ އަށް ކުޅެ އަދި ފަހުން އެ ކްލަބުގެ ކޯޗެއްގެ ގޮތުގައި ވެސް މަސައްކަތްކޮށްފަ އެވެ. ޖޯޑީ ވެސް ވަނީ ބާސެލޯނާ އަށް ކުޅެފަ އެވެ. އަދި މެންޗެސްޓާ ޔުނައިޓަށް ވެސް ކުޅުނެވެ.
