އަބޫޖާ، ނައިޖީރިއާ (މޭ 16) - ދުނިޔޭގެ ރިކޯޑު ފޮތުން ޖާގަ ހޯދުމަށްޓަކައި ނައިޖީރިއާގެ ޝެފެއް މެދުނުކެނޑި 100 ގަޑިއިރު ވަންދެން ކައްކައިފި އެވެ.
މީގެ ކުރިން އެންމެ ގިނަ ވަގުތު މެދުނުކެނޑި ކެއްކި މީހާގެ ރިކޯޑު އޮތީ އިންޑިއާގެ ލަތާ ޓޮންޑޮންގެ އަތުގަ އެވެ. އޭނާ ކެއްކީ 87 ގަޑިއިރާއި 45 މިނެޓެވެ.
އެ ރިކޯޑު މުގުރާލުމަށް ހިލްޑާ ބާޗީ މަސައްކަތް ފެށީ މިދިޔަ ބުރާސްފަތި ދުވަހު އެވެ. ހޯމަ ދުވަހު 100 ގަޑިއިރު ހަމަވުމާ އެކު ގިނަ ބަޔަކު ހިލްޑާއާ އެކު އުފާ ފާޅުކުރި އެވެ.
ހިލްޑާ ބުނީ ރިކޯޑު ހެދުމުގެ ބޭނުމަކީ ނައިޖީރިއާގެ ޒުވާނުންގެ ބުރަ މަސައްކަތާއި އަޒުމު ދުނިޔެއަށް ދެއްކުން ކަމަށާއި މުޖުތަމައުގައި އެއްފަރާތްވެފައި ތިބޭ އެފްރިކާގެ އަންހެނުންގެ ހައްގުގައި ކެމްޕެއިން ކުރުން ކަމަށެވެ.
"ބަޔަކާ އެކު މަަސައްކަތް ކުރަން ބޭނުންވިޔަސް، އަންހެނަކަށް ވިއްޔާ އެތައް ގުނައެއް ބުރަކޮށްގެން މަސައްކަތްކޮށްގެން ނޫނީ އޭނާއާ މެދު ސީރިއަސްކޮށް ނުވިސްނާނެ،" ހިލްޑާ ބުންޏެވެ.
އޭގެ އިތުރުން ނައިޖީރިއާގެ ކެއުންތައް ދުނިޔެއަށް އަންގައި ދިނުމަކީ ވެސް ރިކޯޑު ހަދަން ބޭނުންވި އެއް ސަބަބު ކަމަށް އޭނާ ބުންޏެވެ.
ގިނެސް ވޯލްޑް ރިކޯޑުން ކުރި ޓްވީޓެއްގައި ބުނީ ހިލްޑާ ކުރި މަސައްކަތް އެނގިފައިވާ ކަމަށާއި ރިކޯޑެއްގެ ގޮތުގައި ޔަގީން ކުރެވޭނީ ރަނގަޅަށް ހެކިތަކަށް ބަލައި މުރާޖައާ ކުރުމަށް ފަހުގައި ކަމަށެވެ.
ހިލްޑާ ވަނީ ގިނަ ބަޔެއްގެ ބެލުމުގެ ދަށުން ނައިޖީރިއާގެ އެކި ކެއުންތައް ތައްޔާރުކޮށްފަ އެވެ. އޭގެ އިތުރުން ހުޅަނގު އެފްރިކާގައި މަގްބޫލް ކެއުންތައް ވެސް އޭނާ ހެދި އެވެ.
ކައްކަމުން ދިޔަ އިރު ކޮންމެ ގަޑިއިރަކުން ފަސް މިނެޓުގެ ހުސް ވަގުތުކޮޅެއް ހޭދަކުރި އެވެ. އަދި ކޮންމެ 12 ގަޑިއިރަކުން އެއް ގަޑިއިރު ސިއްހީ ޗެކަޕްތައް ހެދި އެވެ.
އެ މަސައްކަތް ކުރަމުން ދިޔަ ތަނުގައި އެތައް ބަޔަކު ހިތްވަރު ދޭން ތިބި އިރު، އެކި ސްޓްރީމިން ޕްލެޓްފޯމްތައް މެދުވެރިކޮށް ވެސް އެ މަންޒަރު މީހުން ބެލި އެވެ.
ރިކޯޑު މުގުރާލުމާ އެކު ނައިޖީރިއާގެ ރައީސް މުހައްމަދު ބުހާރީ ކުރެއްވި ޓްވީޓެއްގައި ވިދާޅުވީ މިއީ ނައިޖީރިއާ އުފާވެރި ދުވަހެއް ކަމަށެވެ.
