ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ "ފިކުރެއްގެ ދިރުން" ފެކްޝަނުގައި އިސްކޮށް އުޅުއްވާ އަލީ އާޒިމް އެމްޑީޕީން ވަކިވެފައިވާ ކަމަށް ފިޔަވަޅު އަޅާ ކޮމިޓީން ނިންމާފައި ވަނީ އެ ޕާޓީގެ އާސާސީ ގަވާއިދާ ހިލާފަށް ކަމަށް އެ ފެކްޝަނުން ބުނަމުންދާތީ އެކަމަށް އެ ޕާޓީން ރައްދު ދީފި އެވެ.
ނަޝީދު ލީޑު ކުރައްވާ ފެކްޝަނުގައި ހިމެނޭ އިތުރު މެމްބަރުންތަކަކަށް ވެސް ފިޔަވަޅު އަޅަން އެ ކޮމިޓީން ވަނީ ނިންމާފަ އެވެ. ދާދިފަހުން ރައީސް އޮފީހުގެ މިނިސްޓަރު ކަމުން ވަކިކުރި އެ ޕާޓީގެ ނައިބު ރައީސް މުހައްމަދު ޝިފާޒަކީ އެ ކޮމިޓީގެ މުގައްރިރެވެ. އޭނާ ނެތި ކޮމިޓީ ނުބޭއްވޭނެ ކަމަށް "ފިކުރެއްގެ ދިރުން" ފެކްޝަނުން ދަނީ ބުނަމުންނެވެ.
އެކަމާ ގުޅިގެން "އަދަދު" ނޫހުން އެމްޑީޕީގެ ޗެެއާޕާސަންގެ ނައިބު (އިދާރީ) އަދި ރައީސް އޮފީހުގެ މިނިސްޓަރު އިބްރާހީމް ވަހީދު (މަދަނަ އިބުރޭ) ވިދާޅުވީ އެ ޕާޓީގެ ކަންކަން ހިނގަމުންދަނީ ލިޔެވިފައިވާ ގަވާއިދުތަކާއި އުސޫލުތަކާއި އެއްގޮތަށް ކަމަށެވެ.
"މިހާތަނަށް, ޗެއާޕާސަންގެ އިންތިހާބު ބޭއްވުނު ފަހުން ނައިބު ރައީސް އެ ކޮމިޓީގެ އެއްވެސް ބައްދަލުވުމެއްގައި ބައިވެރިނުވޭ. ކޮމިޓީ އެބަ ހިނގާ. 50,000 މީހުން ތިބި ސިޔާސީ ޕާޓީއެއްގައި މުގައްރިރު ނައިސްގެން ކަންކަން ނުހިނގާ އޮންނަން ޖެހޭނެ ކަމަށް ގަބޫލެއް ނުކުރަން," އޭނާ ވިދާޅުވި އެވެ.
ފިޔަވަޅު އަޅާ ކޮމިޓީގެ ބައްދަލުވުންތައް ބޭއްވޭނީ ވެސް ސީދާ ޝިފާޒް އެކަމަށް އެދިވަޑައިގަތުމުން ކަމަށް ރާއްޖޭގެ ނޫހަކަށް ނަޝީދު ވަނީ ރޭ ވިދާޅުވެފަ އެވެ.
އެހެން ނަމަވެސް, ޝިފާޒް ކޮމިޓީއަށް ހާޒިރު ނުވި ނަމަވެސް ކޮމިޓީގެ ކަންކަން ކުރިއަށްގެންދެވޭނެ ގޮތަށް ކަންކަން ރޭވިފައިވާ ކަމަށް އިބުރޭ ފާހަގަކުރެއްވި އެވެ. އެ ކޮމިޓީގެ ނައިބު މުގައްރިރަކީ ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީނެވެ.
އެ ޕާޓީގެ އަސާސީ ގަވާއިދުން ޕާޓީ ނުހުއްޓި ހިންގޭނެ ގޮތްތައް ހަމަޖައްސާފައި ދީފައިވާ ކަމަށާއި ކޮމިޓީތަކަށް ނައިބު މުގައްރިރުން އިންތިހާބު ކޮށްފައި ވަނީ ވެސް އެ މަގުސަދަށްޓަކައި ކަމަށް އިބުރޭ ފާހަގަކުރެއްވި އެވެ.
"މުގައްރިރަށް ހާޒިރު ނުވެވި ނޫނީ މުގައްރިރު މަސްލަހަތު އޮންނަ ކަންކަން ވެސް އަންނާނެ. އައިމަ ވެސް މުގައްރިރު އެއް ފަރާތަށް ޖެހިލާނެ. އެފަދަ ހާލަތްތަކަށް ނައިބު މުގައްރިރެއް ހޮވާފައި މިހުންނަނީ. މުގައްރިރު ނެތް ހާލަތެއްގައި ވެސް ރިޔާސަތު ބަލަހައްޓާނެ މީހަކު ނަގައިގެން ވެސް ކޮމިޓީ ކުރިއަށްގެންދެވޭނެ," އިބުރޭ ފާހަގަކުރެއްވި އެވެ.
ރައްޔިތުންގެ މަޖިލީހުގައި ވެސް ކަން ހިނގަނީ އެހެން. ނައިބު ރައީސް އިނދެގެން ވެސް ކަންކަން އެބަ ހިނގާ. ނައިބު މުގައްރިރާ އެކު ކޮމިޓީ ހިނގަމުންދިޔައީ މުގައްރިރު ހާޒިރު ނުވާތީ."
އެ މައްސަލަ ތާވަލު ކުރީ ޕާޓީގެ ފިޔަވަޅު ކޮމިޓީއަށް ހުށަހެޅުމުން މައްސަލައާ ގުޅޭ ހުރިހާ ލިޔެކިޔުންތަކެއް އެ ކޮމިޓީގެ ވަޓްސްއެޕް ގްރޫޕަށް ހިއްސާ ކުރުމަށް ފަހެވެ. ކޮމިޓީގެ މެމްބަރުންގެ ތެރެއިން ތިން މެމްބަރުން ހާޒިރުވި އިރު އަނެއް މެމްބަރު ސަލާން ފޮނުއްވި ކަމަށާއި މުގައްރިރުގެ ގޮތުގައި އިންނަވާ އެ ޕާޓީގެ ނައިބު ރައީސް ޝިފާޒްގެ ހަބަރެއް ނުވާ ކަމަށް ވެސް އިބުރޭ ވިދާޅުވި އެވެ.
"ހުރިހާ ގަވާއިދެއްގައި ވެސް އެބަ އޮވޭ ސެކްރެޓޭރިއޭޓުން ކޮމިޓީތަކަށް ގޮވާލެވޭނެ ކަމަށް. ބުއްދި ގަބޫލުކުރާ ކަމެއް ނޫން ޕާޓީއެއްގެ ކޮމިޓީއަށް ޕާޓީއަށް ގޮވާނުލެވޭނެ ކަމަށް," އޭނާ ފާހަގަކުރެއްވި އެވެ.
ސިޔާސީ ޕާޓީތަކުގެ ގާނޫނުގައި ވެސް ޕާޓީތަކުގެ މެމްބަރުންނާ މެދު ފިޔަވަޅު އަޅާނީ ޕާޓީގެ އަސާސީ ގަވާއިދުގެ ދަށުން ކަމަށް ބަޔާން ކޮށްފައިވާ ކަމަށާއި އެ ގާނޫނުގެ ދަށުން މެމްބަރުންނާ މެދު ފިޔަވަޅު އެޅުމުގެ ބާރު އެމްޑީޕީއަށް ލިބިފައިވާ ކަމަށް ވެސް އިބުރޭ ފާހަގަކުރެއްވި އެވެ.
އެމްޑީގެ ރައީސާއި ނައިބު ރައީސްގެ މަގާމުގައި "ފިކުރެއްގެ ދިރުން" ފެކްޝަންގެ ބޭފުޅުން ތިއްބެވި ނަމަވެސް އެޕާޓީގެ އެއްވެސް ގުނަނެއްގައި އެ ފެކްޝަންގެ ބާރެއް ނުހިނގަ އެވެ. ޕާޓީގެ އިދާރީ ކަންކަމުގައި އެންމެ އިސްކޮށް މިހާރު ތިއްބަނީ ޕްރައިމަރީ ކާމިޔާބު ކުރެއްވި ރައީސް އިބްރާހިމް މުހައްމަދު ސޯލިހުގެ އަރިސް ބޭފުޅުންނެވެ.
