ރައްޔިތުންގެ މަޖިލީހުގެ ދާއިމީ ކޮމިޓީތަކުގައި ތިއްބެވި ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ މެމްބަރުންނަށް ބަދަލުތަކެއް ގެނައުމުން، އެމަނިކުފާނުގެ ރިޔާސަތުގައި މެމްބަރުންގެ ރުހުމަކާ ނުލައި ކޮމެޓީން ވަކި ނުކުރެވޭނެ ކަމަށް މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އެމްޑީޕީގެ ޕާލިމަންޓަރީ ގުރޫޕުގެ ލީޑަރު، މުހައްމަދު އަސްލަމް ސޮއި ކުރައްވައި މަޖިލީހުގެ ރައީސް، މުހައްމަދު ނަޝީދަށް އިއްޔެ ފޮނުވި ސިޓީއެއްގައި ވަނީ އަށް ކޮމިޓީއެއްގައި އެ ޕާޓީ ތަމްސީލު ކުރައްވާ މެމްބަރުންނަށް ބަދަލުތަކެއް ގެނެސްދިނުމަށް އެދިފަ އެވެ.
އެކަމާ ގުޅޭ ގޮތުން ރައްޔިތުންގެ މަޖިލީހުގެ މެމްބަރުން ހިމެނޭ ރަސްމީ ވަޓްސްއެޕް ގްރޫޕަށް ނަޝީދު ފޮނުއްވި ޓެކްސްޓް މެސެޖެއްގައި ވަނީ "މަޖިލީހުގެ ރިޔާސަތުގައި އަޅުގަނޑު އިންނަ ހިނދަކު މެމްބަރުންގެ ރުހުމާ ނުލައި މަޖިލީހުގެ އެއްވެސް ކޮމިޓީއަކުން އެއްވެސް މމްބަރަކު ވަކިނުކުރެވޭނެ" ކަމަށެވެ.
"މަޖިލީހަކީ ރައީސުލްޖުމްހޫރިއްޔާ [އެމްޑީޕީގެ އިސް ލީޑަރު، ރައީސް އިބްރާހީމް މުހައްމަދު ސޯލިހު] އެދިވަޑައިގަންނަވާ ގޮތަކަށް ހިންގާން އޮންނަ ތަނެއް ނޫން،" އެމްޑީޕީގެ ރައީސްގެ މަގާމު ވެސް ފުރުއްވަމުން ގެންދަވާ ނަޝީދު ލިޔުއްވާފައިވެ އެވެ.
ނަޝީދުގެ އެ މެސެޖަށް އެމްޑީޕީގެ ޕާލިމެންޓްރީ ގްރޫޕްގެ ޗީފް ވިޕް އަދި ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ މެމްބަރު އަބްދުލްމުޣުނީ ރައްދު ދެއްވައި ޓެކްސްޓެއް ކުރެއްވި އެވެ. އޭނާ ވިދާޅުވީ "މަޖިލީހަކީ އެ މަޖިލީހުގެ ރިޔާސަތުން ވެސް ބޭނުންވާ ގޮތަކަށް ހިންގާން އޮތް ތަނެއް ނޫން" ކަމަށެވެ.
ނަޝީދު އިތުރަށް ކުރެއްވި ޓެކްސްޓް މެސެޖެއްގައި ވިދާޅުވީ "ރާއްޖޭގެ ސަރަހައްދުން ބައެއް ގެއްލުނު މައްސަލާގައި ކަންބޮޑުވުން ފާޅުކޮށް އިހުތިޖާޖު ކުރުމަކީ ކޮންމެ ރައްޔިތަކަށް ވެސް ލިބި އޮތް އަސާސީ ހައްގެއް" ކަމަށެވެ.
މެމްބަރުންގެ ރުހުން ނެތި ވަކިނުކުރެވޭނެ ކަމަށް ނަޝީދު ވިދާޅުވީ ބެލެވޭ ގޮތުގައި މަޖިލީހުގެ ގަވާއިދުގައި މެމްބަރުގެ އިއުތިރާޒެއް ނެތްކަން ކަށަވަރު ކުރަން ގަވާއިދުގައި އޮންނަ މާއްދާއަށް އިޝާރާތް ކުރައްވަ އެވެ.
titledesc
މަޖިލީހުގެ ކޮމިޓީތަކުގައި އެމްޑީޕީ ތަމްސީލު ކުރައްވާ މެމްބަރުންނަށް ބަދަލުތަކެއް ގެނެސްދިނުން އެދި އެޕާޓީން މަޖިލީހަށް ހުށަހަޅާފައި ވާއިރު، ފޯޅަވަހި ކޯލިޝަނާ ގުޅިގެން ފިކުރެއްގެ ދިރުން ފެކްޝަނުން ދަނީ ރައީސުލްޖުމްހޫރިއްޔާ އާއި ފޮރިން މިނިސްޓަރު، އަބްދުﷲ ޝާހިދު އަދި އެޓާނީ ޖެނެރަލް، އިބްރާހިމް ރިއްފަތު މަގާމުން އަޒުލުކުރުމުގެ މަސައްކަތް ކުރަމުންނެވެ.
އެ މަސައްކަތުގެ ތެރެއިން ފޯޅަވަހި ކޯލިޝަނުން ވަނީ ރިއްފަތުގެ އިތުބާރު ނެތް ކަމުގެ މައްސަލަ މަޖިލީހަށް ވައްދައިފަ އެވެ. އެ މައްސަލަ ވެއްދުމަށް ފިކުރެއްގެ ދިރުން ފެކްޝަނުން ސޮއި ކުރެއްވީ، ހަމައެކަނި މެދު ހެންވޭރު ދާއިރާގެ މެންބަރު އަލީ އާޒިމް އެވެ.
އެ މައްސަލަ ޗެއާޕާސަންގެ ސަމާލު ކަމަށް ގެނައުމުން ޕާޓީގެ ފިޔަވަޅު އަޅާ ކޮމިޓީއަށް ފޮނުވުމުން އެ ކޮމިޓީން އިއްޔެ ހަވީރު ބައްދަލުކޮށް، އާޒިމް ޕާޓީން ވަކިވެފައިވާ ކަމަށް ވަނީ ނިންމައިފަ އެވެ. ނަމަވެސް މި ކަން އަދި ޕާޓީން ރަސްމީކޮށް އިއުލާން ނުކުރާއިރު، އާޒިމަށް ވެސް އެކަން އަދި އަންގާފައެއް ނުވެ އެވެ.
