ރައްޔިތުންގެ މަޖިލީހުގެ މެދުހެންވޭރު ދާއިރާގެ މެމްބަރު އަލީ އާޒިމް އެމްޑީޕީން ވަކިކޮށްފި އެވެ.
ސަރުކާރު ހިންގާ މައި ޕާޓީން އާޒިމް ވަކިކުރީ، ފޯޅަވައްސާއި އައްޑޫއާ ދެމެދު އޮތް ކަނޑުގެ އިގުތިސޯދީ ސަރަހައްދުގެ އިން ވަކިކުރި މައްސަލާގައި އިދިކޮޅު ސިޔާސީ ޕާޓީތަކުން އުފައްދާފައިވާ "ފޯޅަވަހި ކޯލިޝަން"ގެ ބައްދަލުވުންތަކާއި ޕްރެސް ކޮންފަރެންސްގައި ބައިވެރިވެވަޑައިގެންނެވި މައްސަލަ އާއި ބަންޑާރަ ނައިބު އިބްރާހިމް ރިފްއަތުގެ އިތުބާރު ނެތްކަމުގެ މައްސަލައިގައި ސޮއިކުރެއްވުމާ ގުޅިގެންނެވެ.
ކަނޑުގެ އިންވަކިކުރި މައްސަލައިގައި ރާއްޖޭގެ އިގުތިސޯދީ ސަރަހައްދުން ބައެއް ގެއްލިފައިވާ ކަމަށް ބުނެ، ރައީސް އިބްރާހިމް މުހައްމަދު ސޯލިހު އަޒުލުކުރުމާއި ސަރުކާރާ ދެކޮޅަށް އަންނަ މަހު ދެ ވަނަ ދުވަހު ބޮޑު އެއްވުމެއް ބޭއްވުމަށް ވެސް ފޯޅަވަހި ކޯލިޝަނުން ދަނީ ތައްޔާރުވަމުންނެވެ.
އާޒިމުއާމެދު ފިޔަވަޅު އެޅުމަށް ޕީޖީ ގްރޫޕުން ފޮނުވި މައްސަލައިގައި، ޕާޓީގެ ފިޔަވަޅުއަޅާ ކޮމިޓީން މިއަދު ހަވީރު ބައްދަލުކޮށް އާޒިމް ވަކިކުރަން ނިންމިކަން "އަދަދު" ނޫހަށް ވަނީ ކަށަވަރުވެފަ އެވެ. ނަމަވެސް، ޕާޓިން ރަސްމީކޮށް އެކަން އިއުލާނެއް ނުކުރެ އެވެ.
ރޭ ބޭއްވި ފޯޅަވަހި ކޯލިޝަންގެ ނޫސްވެރިންގެ ބައްދަލުވުމުގައި އަލީ އާޒިމް. -- ފޮޓޯ: މުހައްމަދު ޝާބިން/ އަދަދު
އެމްޑީޕީގެ ޕާލިމެންޓްރީ ގްރޫޕުގެ ލީޑަރުކަން ކުރެއްވި އާޒިމް ޕާޓީން ވަކިކުރަން ނިންމީ "އަދަދު" ނޫހަށް އެނގިފައިވާ ގޮތުގައި އެ ޕާޓީގެ އަސާސީ ގަވާއިދުގެ 19 ވަނަ މާއްދާ އާއި 20 ވަނަ މާއްދާގެ ދަށުންނެވެ.
ގަވާއިދުގެ 19 ވަނަ މާއްދާގައި ބުނަނީ އެމްޑީޕީގެ މެމްބަރަކު އެހެން ސިޔާސީ ޕާޓީއެއްގައި ބައިވެރިވެއްޖެ ނަމަ ނުވަތަ ހަރަކާތްތެރިވެއްޖެ ނަމަ ޕާޓީން ވަކިވާނެ ކަމަށެވެ. އަދި ގަވާއިދުގެ 20 ވަނަ މާއްދާގައި ބުނެފައި ވަނީ ޕާޓީގެ މަސްލަހަތު ގެއްލުވާލުމަށް މަސައްކަތްކުރާ މެމްބަރެއް ނަމަ ވަކި ކުރެވޭނެ ކަމަށެވެ.
titledesc
އެމްޑީޕީގެ ޕީޖީ ލީޑަރަކަށް އާޒިމް ހުންނެވިއިރު ރައީސް އިބްރާހިމް މުހައްމަދު ސޯލިހްއާ ރައީސް އޮފީހުގައި ބައްދަލުކުރައްވަނީ. -- ފޮޓޯ: ރައީސް އޮފީސް
އެމްޑީޕީގެ ރިޔާސީ ޕްރައިމަރީގައި އެމްޑީޕީގެ ރައީސް މުހައްމަދު ނަޝީދަށް ލިބިވަޑައިގެންނެވި ނާކާމިޔާބަށް ފަހު އެ މަނިކުފާނު އުފެއްދެވި "ފިކުރެއްގެ ދިރުން" ހަރަކާތުގައި އިސްކޮށް ހަރަކާތްތެރިވާ އާޒިމް އެމްޑީޕީއާ ގުޅިވަޑައިގަތީ 2013 ވަނަ އަހަރު ރިޔާސީ އިންތިހާބުގެ ފުރަތަމަ ބުރަށް ފަހު އެވެ. އޭގެ ކުރިން އޭނާ ހުންނެވީ، ކުރީގެ ރައީސް މައުމޫން އަބްދުލް ގައްޔޫމް ފުރަތަމަ އުފެއްދެވި ޑީއާރުޕީގަ އެވެ.
އާޒިމް އެމްޑީޕީން ވަކިކުރުމާއެކު އެ ޕާޓީ ތަމްސީލް ކުރައްވާ ރައްޔިތުންގެ މަޖިލީހުގެ މެމްބަރުންގެ އަދަދު 67 އަށް ތިރިވާނެ އެވެ.
އެމްޑީޕީއަށް ނިސްބަތްވާ ރައްޔިތުންގެ މަޖިލީހުގެ މެމްބަރަކު އެންމެ ފަހުން ޕާޓީން ވަކިކުރީ 2016 ވަނަ އަހަރު އެވެ. އެއީ އޭރު ރައްޔިތުންގެ މަޖިލީހުގެ ނައިބު ރައީސް އަދި ހުޅުހެންވޭރު ދާއިރާގެ މެމްބަރު މޫސާ މަނިކު އެވެ. މޫސަ އަލުން ޕާޓީއާ ގުޅިވަޑައިގަތީ މިދިޔަ އަހަރު އެވެ.
