ބާސެލޯނާ (މެއި 15) - ސްޕެނިޝް ލީގުގައި ރޭ އެސްޕަންޔޯލް ދަނޑުގައި 4-2 އިން ހޯދި، މޮޅާ އެކު ބާކީ ހަތަރު މެޗު އޮއްވައި ބާސެލޯނާ އިން ލީގު ޗެމްޕިއަންކަން ކަށަވަރުކޮށްފި އެވެ.
މިއީ ބާސެލޯނާ އިން ލީގު ކާމިޔާބުކުރި 27 ވަނަ ފަހަރެވެ.
އަނެއްކޮޅުން، މިއީ، 2018-2019 ވަަނަ އަހަރުގެ ސީޒަން ފަހުން ބާސެލޯނާ އިން ލީގު ކާމިޔާބުކުރި ފުރަތަމަ ފަހަރެވެ. މިއީ، 2021 ވަނަ އަހަރުގެ ނޮވެމްބަރު މަހު ޒަވީ ހެނާންޑޭޒް ބާސެލޯނާގެ ކޯޗުކަމާ ހަވާލުވި ފަހުން އެ ޓީމުން ހޯދި ފުރަތަމަ ލީގު ތަށްޓެވެ. އަދި ލިއޮނަލް މެސީ، 2021 ވަނަ އަހަރު އޮގަސްޓް މަހު ބާސެލޯނާ ދޫކޮށްލި ފަހުން ވެސް އެ ޓީމަށް ލީގު ހޯދުނު ފުރަތަމަ ފަހަރެވެ.
ލީގުގެ އެއް ވަނައިގައި ބާސެލޯނާ އޮތީ 34 މެޗުން 85 ޕޮއިންޓާ އެކު އެވެ. ދެ ވަނައިގައި އޮތް ރެއާލް މެޑްރިޑްގެ އޮތީ 34 މެޗުން 69 ޕޮއިންޓެވެ.
ރޭގެ މެޗަށް ފަހު ބާސެލޯނާގެ ކޯޗު ޒަވީ އުފާފާޅުކުރަނީ.
އެސްޕަންޔޯލް ދަނޑުގައި ކުޅުނު ނަމަވެސް ބާސެލޯނާ އިން ވަނީ 40 މިނިޓް ތެރޭ ތިން ގޯލު ޖަހައިފަ އެވެ. އެ ގޮތުން، 11 ވަނަ މިނިޓްގައި ރޮބަޓް ލެވަންޑޯސްކީ ވަނީ ބާސެލޯނާ އަށް ލީޑުނަގައިދީފަ އެވެ. އޭގެ ނުވަ މިނިޓް ފަހުން، އަލެހަންދްރޯ ބާލްޑޭ ބާސެލޯނާގެ ދެ ވަނަ ގޯލު ޖެހިއިރު، މެޗުގެ 40 ވަނަ މިނިޓްގައި ލެވަންޑޯސްކީ އިތުރު ގޯލެއް ޖަހައި، ފުރަތަމަ ހާފު ނިމުނުއިރު، ބާސެލޯނާ އަށް މެޗުގެ ކޮންޓްރޯލް ނަގައިދިނެވެ.
ދެ ވަނަ ހާފްގެ ކުޅުން ފެށިގެން އަށް މިނިޓް ތެރޭ ފްރެންކީ ޑި ޔޯން ދިން ބޯޅައަކުން ޖޫލްސް ކޫންޑޭ ވަނީ ބާސެލޯނާގެ ހަތަރު ވަނަ ގޯލު ޖަހައިފަ އެވެ. އޭގެ ފަހުން، އެސްޕަންޔޯލްގެ ދެ ގޯލު ފެނިގެންދިޔައިރު، މި ލަނޑުތައް ޖެހީ 73 ވަނަ މިނިޓްގައި ޖާވިއޭ ޕުއާޑޯ އާއި މެޗުގެ އިތުރު ވަގުތުގައި ހޮސޭލޫ އެވެ.
ބާސެލޯނާގެ ކޯޗު ޒަވީ ބުނީ ލީގު ޗެމްޕިއަންކަން ލިބުމުން ވަރަށް ބޮޑަށް ހިތްހަމަޖެހުނު ކަމަށާއި މިއީ ގިނަ މަސްތަކެއް ވަންދެން ކުރި ބުރަ މަސައްކަތުގެ ނަތީޖާ ކަމަށެވެ. މިއީ އެސްޕަންޔޯލް ދަނޑުގައި ހޯދުނު މޮޅެއް ކަމަށްވާތީ އެ ހިތްހަމަޖެހުން ވެސް އެބައިން ކަމަށް ޒަވީގެ ވާހަކައިގައި ވަނީ ފާހަގަކޮށްފަ އެވެ.
