ނައިރޯބީ، ކެންޔާ (މޭ 13) - "އީސާގެފާނާ ބައްދަލުކުރުމަށް" ނުކައި ތިބުމަށް އެންގި ނަސާރާ ދީނުގެ ކަލްޓްއާ ގުޅުން ހުރި މަރުތަކުގެ އަދަދު 201 އަށް އަރައިފި އެވެ.
ޖަންގަލީގެ ތެރެއިން ގަބުރުތައް ފެންނަން ފެށުމުން ފުލުހުންގެ ބޮޑު އޮޕަރޭޝަނެއް ފެށީ އެޕްރީލް މަހު އެވެ. ފުލުހުން ބުނީ ހޮނިހިރު ދުވަހު އިތުރު 22 ގަބުރު ފެނުނު ކަމަށެވެ.
ފުލުހުން ތުހުމަތު ކުރާ ގޮތުގައި އެ އެންމެންނަކީ ވެސް ގުޑް ނިއުސް އިންޓަނޭޝަނަލް ޗާޗަށް ނިސްބަތްވާ މެމްބަރުންނެވެ. އެއީ ކުރިން ޓެކްސީ ޑްރައިވަރެއްގެ ގޮތުގައި އުޅުނު ޕައުލް މެކެންޒީ އުފެއްދި ގްރޫޕެކެވެ.
ފުލުހުން ބުނީ އެ ގްރޫޕްގެ ގިނަ މެމްބަރުންތަކެއް މަރުވެފައި ވާތީ ޝައްކު ކުރެވޭ 26 މީހުން ހައްޔަރުކޮށްފަައިވާ ކަމަށެވެ. އޭގެ ތެރޭގައި މެކެންޒީ ވެސް ހިމެނެ އެވެ.
މިދިޔަ ބުދަ ދުވަހު ކޯޓުން އެންގީ މެކެންޒީގެ ބަންދު އިތުރު ތިން ހަފުތާއަށް އިތުރު ކުރުމަށެވެ. އުމުރުން 50 އަހަރުގެ މެކެންޒީ އަމިއްލައަށް ފުލުހުންނާ ހަވާލުވީ އެޕްރީލް 14 ގަ އެވެ.
އޭނާ ހިންގި ގްރޫޕްގެ ގިނަ މީހުން މަރުވީ ނުކައި ތިބެ، ބަނޑަށް ޖެހިގެންނެވެ. އެކަމަކު ބައެއް މީހުންގެ ކަރުގައި ހިފައި ނުވަތަ ނޭވާހާސްކޮށް އަނިޔާކޮށްގެން މަރާލާފައިވާ ކަމުގެ ހެކި އެބަ ހުއްޓެވެ.
އޭގެ އިތުރުން ބައެއް ހަށިތަކުން ގުނަވަންތައް ނަގާފައިވާ ކަމުގެ ހެކި ވެސް އެބަ ހުއްޓެވެ. އެހެންވެ، މަރުވި މީހުންގެ ގުނަވަންތައް ވިއްކި ކަމުގެ ތުހުމަތު ވެސް ކުރެވެ އެވެ.
