މޯލްޑިވްސް ޕޯސްޓުން ދޭ އެކްސްޕްރެސް މެއިލް ސާވިސް (އީއެމްއެސް)ގެ ހިދުމަތަށް ޔުނިވާސަލް ޕޯސްޓަލް ޔޫނިއަން (ޔޫޕީޔޫ)ގެ ގޯލްޑް އެވޯޑް ލިބިއްޖެ އެވެ.
ރާއްޖޭގެ އިތުރުން މި އެވޯޑް ލިބުނީ އަޒަރުބައިޖާން، މިޔަންމާ، އޯމަން އަދި ޔުނައިޓަޑް އަރަބް އެމިރޭޓްސް އަށެވެ. ގަތަރަށް ސިލްވަ އެވޯޑް ލިބިފައި ވާއިރު ބްރޯންޒް އެވޯޑަށް އެއްވެސް ގައުމެއް ހޮވިފައެއްނުވެ އެވެ.
ސްވިޓްޒަލޭންޑްގެ ވެރިރަށް ބާން ގައި ބޭއްވި އީއެމްއެސް ކޯޕަރޭޓިވް ޖެނެރަލް އެސެމްބްލީގައި މި އެވޯޑާ މޯލްޑިވްސް ޕޯސްޓްގެ ފަރާތުން ހަވާލުވެވަޑައިގަތީ މެނޭޖިން ޑިރެކްޓަރު އާދަމް މުހައްމަދެވެ.
ދުނިޔޭގެ 174 ގައުމެއްގައި އީއެމްއެސްގެ ހިދުމަތް ދޭއިރު، އެވޯޑު ދެނީ ފާއިތުވެ ދިޔަ އަހަރުގެ ހިދުމަތް ވަޒަންކޮށް، ރޭންކު ކުރުމަށް ފަހު ފަހު އެވެ.
ޕޯސްޓު ލިމިޓެޑްގެ މެނޭޖިން ޑިރެކްޓަރު އާދަމް މުހައްމަދު ވިދާޅުވީ އެ ކުންފުނީގެ އަމާޒަކީ ފެންވަރު ރަނގަޅު ހިދުމަތްތަކެއް ފޯރުކޮށްދިނުން ކަމަށާއި މިއަހަރުވެސް އީއެމްއެސް ޕާފޯމަންސް އަދި ކަސްޓަމާ ކެއާރ އެވޯޑް ހާސިލްކުރުމަށް އެކުންފުނިން މަސައްކަތް ކުރަމުން އަންނަކަމަށެވެ. އީއެމްއެސް ވިއުގަ މެދުވެރިކޮށް ކޮންމެ ހަފުތާއަކުވެސް އަށް މިލިއަންއަށް ވުރެ ގިނަ އައިޓަމް އެއްގައުމުން އަނެއް ގައުމަށް ފޮނުވަމުން ދާއިރު، މުހިއްމު ލިޔެކިއުންތަކާއި ބޭހާއި، ސްޕެއާޕާޓް އަދި އާންމު ދިރުއުޅުމުގައި ބޭނުންކުރާ ތަކެތި ހިމެނެ އެވެ.
މޯލްޑިވްސް ޕޯސްޓުން ދެމުން އަންނަ އީއެމްއެސް ހިދުމަތަކީ ރާއްޖެއިން ބޭރަށް ފޮނުވާ ތެކެތި ފޮނުވުމަށް އެންމެ އިތުބާރު ކުރެވޭ އަދި އެންމެ އަވަސް ޚިދުމަތް ކަމަށް އެ ކުންފުނިން ބުނެ އެވެ. މިއީ ހަރަދު ކުޑަ ހިދުމަތަކަށް ވާއިރު އެންމެ ގިނައިން ރާއްޖޭން ޕޯސްޓް ކުރެވޭ މަންޒިލުތަކުގެ ތެރޭގައި ސިންގަޕޫރު، ޔޫއޭއީ، މެލޭޝިއާ، އޮސްޓްރޭލިއާ އަދި ސްރީލަންކާ ހިމެނެ އެވެ.
