ސޭން ފްރެންސިސްކޯ، އެމެރިކާ (މޭ 12) - ޓްވިޓާގެ ވިޔަފާރި ހިންގުން ހަރުދަނާ ކުރުމުގެ ގޮތުން އާ ސީއީއޯގެ މަގާމަށް ލިންޑާ ޔަކަރީނޯ ހަމަޖައްސައިފި އެވެ.
ހުކުރު ދުވަހު ޔަކަރީނޯ ވަނީ އެންބީސީ ޔުނިވާސަލް ކުންފުނިން ވަކިވެފަ އެވެ. އޭނާއަކީ އިޝްތިހާރު ކުރުމުގެ ދާއިރާގެ އެންމެ ކުރީގައި އުޅޭ އެއް ތަޖުރިބާކާރެވެ.
މިދިޔަ އަހަރު 44 ބިލިއަން ޑޮލަރު ހޭދަކޮށްގެން ޓްވިޓާގެ ކޮންޓްރޯލް ހޯދީ ބިލިއަނަރު އެލޮން މަސްކް އެވެ. އޭނާ ވަނީ ކުންފުންޏަށް ބޮޑު ބަދަލުތަކެއް ގެނެސްފަ އެވެ.
އެތައް ހާސް މުވައްޒަފުން ވަޒީފާއިން ވަކިކޮށް، ޓްވިޓާއިން ސަސްޕެންޑުކޮށްފައި ތިބި ގިނަ ބަޔެއްގެ އެކައުންޓުތައް އަލުން އެކްޓިވޭޓް ކުރުން ފަދަ ފިޔަވަޅުތައް އޭނާ އެޅި އެވެ.
އެންބީސީ އާއި ޔުނިވާސަލް އަދި ޓެލެމަންޑޯ ހިންގާ މައި ކުންފުނީގެ 2011 ވަނަ އަހަރުން ފެށިގެން އުޅުނު ޔަކަރީނޯ އެ ކުންފުންޏާ ވަކިވި އިރު، އޭނާ އާއި މަސްކު މީގެ ހަފުތާތަކެއް ކުރިން ބައްދަލުވި އެވެ.
މަޔާމީގައި އޮތް މާކެޓިން ކޮންފެރެންސެއްގެ ތެރެއިން ޔަކަރީނޯ ވަނީ ސްޓޭޖު މަތީގައި ހޯސްޓެއްގެ ދައުރު އަދާކޮށް މަސްކްއާ އިންޓަވިއުކޮށްފަ އެވެ.
ޔަކަރީނޯއަކީ އިޝްތިހާރު ކުރުމުގެ ދާއިރާގެ އެންމެ ނަން މަޝްހޫރު އެކަކު ނަމަވެސް، ޓްވިޓާ ދޫކޮށްފައި ދިޔަ ބޮޑެތި ކުންފުނިތައް އަނބުރާ ގެނައުމަށް ގޮންޖެހުންތަކާ ކުރިމަތިވާނެ ކަމަށް ބެލެވެ އެވެ.
ހުކުރު ދުވަހު މަސްކް ކުރި ޓްވީޓެއްގައި ބުނީ ޑިޒައިނާއި ޓެކްނޮލޮޖީގެ ކަންކަން ދާނީ ސީދާ އޭނާގެ ބެލުމުގެ ދަށުން ކަމަށާއި ޔަކަރީނޯ ބަލަހައްޓާނީ ވިޔަފާރި އޮޕަރޭޝަންތައް ކަމަށެވެ.
