ފާއިތުވި އަހަރު ސްރީލަންކާގެ ގައުމީ އެއާލައިނަށް 525 މިލިއަން ޑޮލަރުގެ ގެއްލުމެއް ލިބުނު ކަމަށް އިއުލާންކޮށްފި އެވެ.
ގާތްގަނޑަކަށް 6000 މުވައްޒަފުން އުޅޭ ސްރީލަންކަން އެއާލައިންސްއަކީ ލަންކާގެ ދައުލަތުގެ ކުންފުނިތަކުގެ ތެރެއިން އެންމެ ބޮޑު އަދި އެންމެ ހަރަދުތައް ހިނގާ ކުންފުންޏެވެ.
އިންޓަނޭޝަނަލް މަަނިޓަރީ ފަންޑް (އައިއެމްއެފް) އިން ލަންކާއަށް ތިން ބިލިއަން ޑޮލަރުގެ ލޯނު ދޭން އެއްބަސްވީ ވެސް އެ ކުންފުނި އަލުން ސްޓަރްކްޗާ ކުރަން އެއްބަސްވުމުންނެވެ.
އެގޮތުން ގައުމީ އެއާލައިން ހިމެނޭ ގޮތަށް ދައުލަތުގެ 51 ކުންފުންޏެއް ޕްރައިވެޓައިޒް ކުރަން އައިއެމްއެފްއިން ޝަރުތު ކުރި އެވެ.
ސްރީލަންކަން އެއާލައިންސުން ނެރުނު ބަޔާނެއްގައި ބުނީ މާޗް 2021 އިން މާޗް 2022 އަށް 525 މިލިއަން ޑޮލަރުގެ ގެއްލުން ލިބުނު ކަމަށެވެ.
އެއީ ކޮވިޑާ ގުޅިގެން ވައިގެ ދަތުރުތަކަށް ގިނަ ހުރަސްތަކެއް ކުރިމަތިވި އޭގެ ކުރީ އަހަރާ އަޅާ ބަލާއިރު ތިން ގުނަ ބޮޑު ޑެފިސިޓެކެވެ.
ކުންފުނީގެ ޗެއާމަން އާޝޮކް ޕަތިރަގެ ވިދާޅުވީ އަލުން ސްޓްރަކްޗާ ކުރުމުން ކުންފުންޏަށް ބަދަލުތަކެއް އައިސް ކުރިއަަރަން ފަށާނެ ކަމަށެވެ.
އެކަމަކު ޕްރައިވެޓް އިންވެސްޓަރުންނަށް ސްރީލަންކަން އެއާލައިންއާ މެދު ޝައުގުވެރިވާނެ ކަމާ މެދު ސުވާލު އުފެދޭ ކަމަށް އެނެލިސްޓުން ބުނެ އެވެ. ސްރީލަންކަން އެއާލައިންސްއިން 2008 އިން ފެށިގެން ފައިދާއެއް ރިޕޯޓުކޮށްފައެއް ނުވެ އެވެ.
