ލިޒްބަން (މެެއި 12) - ސްޕޯޓިން ލިޒްބަން އަށް ކުޅެމުން އަންނަ އުރުގުއޭ ގައުމީ ޓީމުގެ މިޑްފީލްޑަރު މެނުއަލް އުގާޓޭ އަށް ފާރަލަމުން އަންނަ ކްލަބަކީ ހަމައެކަނި ލިވަޕޫލެއް ނޫން ކަމަށް އުގާޓޭގެ އެޖެންޓް ޖޯޖް ޗިޖާނޭ ބުނެފި އެވެ.
އުގާޓޭ، 22، މި ސީޒަނުގައި އަންނަނީ ސްޕޯޓިން ލިޒްބަން ޓީމުގައި މޮޅު ކުޅުމެއް ދައްކަމުންނެވެ. ސްޕޯޓިން އިން ޔޫރޮޕާ ލީގުގައި އާސެނަލާ ދެކޮޅަށް ކުޅުނު ދެ މެޗުގައި އުގާޓޭ ސްކައުޓް ކުރަން ލިވަޕޫލްގެ އޮފިޝަލުން ވަނީ ދަނޑަށް ވެސް ގޮސްފަ އެވެ.
މި ވަގުތު ޑިމާންޑް ބޮޑު މިޑްފީލްޑަރެއްގެ ގޮތުގައި ފާހަގަކުރެވޭ އުގާޓޭ، ވިއްކާލަން ސްޕޯޓިން އިން ކިޔާ އަގު އުޅެނީ 60 މިލިއަން ޑޮލަރުގަ އެވެ. އުގާޓޭ މި ވަގުތު ސްޕޯޓިންގައި ހުރި ކޮންޓްރެކްޓްގެ ރިލީސް ކްލޯސް (އުވާލަން ދައްކަން ޖެހޭ އަދަދު) އުޅެނީ ވެސް އެ ވަރުގައި ކަަމަށް ރިޕޯޓްތައް ބުނެ އެވެ.
ޗިޖާނޭ ބުނީ ޔަގީންކަމާ އެކު ބުނަން އެނގޭ އެއް ވާހަކަ އަކީ އަންނަ ސީޒަނުގައި އުގާޓޭ ސްޕޯޓިންގައި މަޑުކުރުމުގެ ފުރުސަތެއް ނެތް ކަމެވެ.
"އަހަރެން ވަރަށް އަވަހަށް މިކަމާ (އުގާޓޭގެ މުސްތަގުބަލާ ގުޅޭގޮތުން) ޖޯޖް މެންޑޭޒްއާ ބައްދަލުކުރާނަން. މެންޑޭޒަކީ ފުޓްބޯޅަ ކުޅުންތެރިންގެ މުސްތަގުބަލާ ގުޅޭ މުހިންމު ފަރާތެއް، އޭނަގެ ލަފާ ހޯދާފައި އުގާޓޭގެ މުސްތަގުބަލާ ގުޅޭ ނިންމުމެއް ނިންމާނަން،" ޗިޖާނޭ ވިދާޅުވި އެވެ.
"ލިވަޕޫލް؟. ތެދެއް އެއީ އުގާޓޭ އަށް ވަރަށް ޝައުގުވެރިވާ ކްލަބެއް. އެކަމަކު، އެއީ އެއް ނޫން ހަމައެކަނި އުގާޓޭ އަށް އޮތް ފުރުސަތަކީ، ގިނަ ކްލަބްތަކަކުން އުގާޓޭގެ މައުލޫމާތު ހޯދާ. ކުރިއަށް އޮތް 15 ވަރަކަށް ދުވަސްތެރޭ މީގެ ވަރަށް މުހިންމު ނިންމުންތަކެއް ނިންމާނެ،"
އަންނަ ސީޒަނަށް ޓީމު ވަރުގަދަ ކުރުމުގެ ގޮތުން ލިވަޕޫލުން އެންމެ ބޮޑަށް މަސައްކަތް ކުރަނީ މިޑްފީލްޑަރުން ގެނައުމަށެވެ. ލިވަޕޫލުން އެންމެ ބޮޑަށް ބޭނުންވި، މިޑްފީލްޑަރު، ޖޫޑް ބެލިންހަމް ރެއާލް މެޑްރިޑަށް ބަދަލުވާން އެއްބަސްވުމަކަށް އަތުވެފައިވާ ކަމަށް މީޑިއާތަކުން ރިޕޯޓްކޮށްފައިވާއިރު، ލިވަޕޫލުން އުގާޓޭގެ އިތުުރުން ދެން މަސައްކަތް ކުރަނީ ލޯން އެއްބަސްވުމެއްގެ ދަށުން ނަމަވެސް ރެއާލްގެ ފްރާންސް މިޑްފީލްޑަރު އައުރެލިން ޗުއަމެނީ ހޯދާށެވެ.
އުރުގުއޭގެ އެތުލެޓިކޯ ފެއިނިކްސް އިން ކެރިއަރު ފެށި އުގާޓޭ މިހާރު ކުޅެމުން އަންނަ ސްޕޯޓިންއާ ގުޅުނީ 2021 ވަނަ އަހަރުގެ އޮގަސްޓް މަހު ހަތް މިލިއަން ޑޮލަރުގެ ފީ އަަކަށެވެ. ސްޕޯޓިން އަށް ކުޅުމުގެ ކުރިން އުގާޓޭ ވަނީ ޕޯޗުގަލްގެ ފަމަލީޝާއޯ އަށް ކުޅެފަ އެވެ.
