ޗާގޯސް އަކީ މޮރިޝަސްގެ ބައެއްގެ ގޮތުގައި ބަލައިގެން އެ ޖަރީޒާތަކާއި ރާއްޖެއާ ދެެމެދު ކަނޑުގެ ސަރަހައްދީ ރޮނގު ބެހުމުގައި ސަރުކާރުން ރާއްޖޭގެ ކަނޑުގެ ސަރަހައްދުގެ ބައެއް ދޫކޮށްލި ކަމަށް ކުރާ ތުހުމަތުގައި އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް ކަމުގެ މައްސަލަ ނަގަން މަޖިލީހަށް ހުށަހަޅާފައިވާ މައްސަލަ ފާސްވިޔަ ނުދޭނެ ކަމަށް ވެރިކަން ކުރާ މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ބުނެފި އެވެ.
މި މައްސަލަ މަޖިލީހަށް ހުށަހަޅާފައިވަނީ ސަރުކާރާ އިދިކޮޅު ގުޅިފައިވާ ޕާޓީތަކުންނެވެ. އޭގެ ތެރޭގައި އިދިކޮޅު ޕީޕީއެމް/ ޕީއެންސީގެ އިތުރުން އެމްޑީޕީގެ ރައީސް މުހައްމަދު ނަޝީދުގެ ފިކުރެއްގެ ދިރުން ފެކްޝަންގެ މެންބަރުންނާއި އެމްއެންޕީ އާއި ޖުމްހޫރީގެ ޕާޓީ ހިމެނެ އެވެ. "އަދަދު" ނޫހަށް އެނގިފައިވާ ގޮތުގައި މި މައްސަލަ ވައްދާފައިވަނީ 15 މެމްބަރުންގެ ސޮޔާއެކު އެވެ.
އެކަމާ ގުޅިގެން މިރޭ ނެރުނު ބަޔާނެއްގައި އެމްޑީޕީން ބުނީ އިޓްލޮސްގެ ނިންމުމަކީ އެޓާނީ ޖެނެރަލްގެ ޓީމުން ދައުލަތުގެ ހައްގުގައި ކުރެއްވި އިހުލާސްތެރި ކާމިޔާބު މަސައްކަތެއް ކަމަށެވެ.
"މަގާމުގެ މަސްއޫލިއްޔަތު އަދާކުރެއްވުމުގައި ވެސް ގާނޫނުއަސާސީ އާއި ގާނޫނުތައް ނަގަހައްޓަވައި ބަންޑާރަނައިބު މިހާތަނަށް އިސްކުރައްވާފައިވަނީ ގައުމީ މަސްލަހަތެވެ. ބަންޑާރަނައިބު އިބްރާހިމް ރިފްއަތުގެ މައްޗަށް ދިވެހިރައްޔިތުންގެ ޑިމޮކްރެޓިކް ޕާރޓީގެ ފުރިހަމަ އިތުބާރު އެބައޮތެވެ." އެމްޑީޕީން ނެރުނު ބަޔާނެއްގައި އޮތެވެ.
ރިފްއަތު އަދާކުރެއްވި ޒިންމާއާ މެދު ސުވާލު އުފައްދައި އޭނާގެ އިތުބާރު ނެތް ކަމަށް ހުށަހެޅުން އެމްޑީޕީން ސިފަކުރީ "ޒިންމާދާރުކަން ކުޑަ" އަމަލެއްގެ ގޮތުގަ އެވެ. އަދި, ރައީސް ސޯލިހުގެ ސަރުކާރާ ދެކޮޅަށް ކުރަމުންދާ މަސައްކަތްތަކުގައި އެ ޕާޓީގެ ބައިވެރިވުމެއް ނެތް ކަމަށް ވެސް ވަނީ ބުނެފަ އެވެ.
މި މައްސަލާގައި އެމްޑީޕީގެ ތެރޭގައި އޮތް ރައީސް މުހައްމަދު ނަޝީދަށް ތާއިދުކުރާ "ފިކުރެއްގެ ދިރުން" ފެކްޝަނުގެ މެމްބަރުން ބައިވެރިވާއިރު އެ މެމްބަރުން އަސާސީ ގަވާއިދާ ހިލާފުވެފައިވާތީ ފިޔަވަޅު އަޅާނެ ކަމުގެ އިންޒާރު ވެސް ވަނީ ދީފަ އެވެ.
ރައްޔިތުންގެ މަޖިލީސް މެދުވެރިކޮށް ހިންގަން އުޅެނީ ރައްޔިތުންގެ ހިތުގައި ސަރުކާރާ މެދު ނަފްރަތު އުފައްދައި ގައުމުގެ ހަމަޖެހުން ނަގާލައި ބައިބައިކޮށް އަމިއްލަ ސިޔާސީ މަންފާ ހޯދަން ރޭވިގެން ހިންގާ ހަރަކާތެއް ކަމަށް ދެކޭ ކަމަށް އެމްޑީޕީން ބުނެފައިވެ އެވެ.
"ގައުމީ މަސްލަހަތާ ގުޅިފައިވާ މައްސަލައެއް އިޓްލޮސް އިން ނިންމި ގޮތުގެ ހަގީގަތް ހާމައަށް ދިވެހި ރައްޔިތުންނަށް ފެންނަން އޮއްވައި, ބަންޑާރަނައިބު އިބްރާހިމް ރިފްއަތުގެ އިތުބާރު ނެތް ކަމުގެ ވޯޓު ނަގަން ކުރާ މަސައްކަތް ދިވެހި ރައްޔިތުންގެ ޑިމޮކްރެޓިކް ޕާޓީން ކާމިޔާބުވިޔަ ނުދޭނެ," އެމްޑީޕީން ބުނެފައިވެ އެވެ.
އަދި, ރިފްއަތުގެ އިތުބާރު ނެތް ކަމުގެ ވޯޓާ ދެކޮޅަށް, ރިފްއަތުއާ އެކުގައި އެމްޑީޕީގެ ޕީޖީ ގްރޫޕް އޮތް ކަމަށް ވެސް އެ ޕާޓީން ވަނީ މިރޭ ބުނެފަ އެވެ.
ރިފްއަތުގެ އިތުރުން އެހެން ބައެއް ވަޒީރުންނާ ދެކޮޅަށް ވެސް މައްސަލަ ހުށަހަޅާނެ ކަމުގެ އިޝާރާތެއް އިދިކޮޅު ވަނީ މިއަދު ދީފަ އެވެ.
"އޭގެ ތެރޭގައި ފޮރިން މިނިސްޓަރު ޝާހިދާއި ހުދު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ މައްސަލަ ވެސް ހުށަހަޅަން މަސައްކަތް އެބަކުރަން،" އޭދަފުށީ ދާއިރާގެ މެމްބަރު ސަލީމް މިއަދު މެންދުރު އޮތް ނޫސްވެރިންގެ ބައްދަލުވުމެއްގައި ވިދާޅުވި އެވެ.
އޭޖީގެ އިތުބާރު ނެތް ކަމުގެ މައްސަލަ ވެއްދި ސަބަބާ ގުޅޭ ގޮތުން ވާހަކަ ދައްކަވަމުން ކެންދޫ ދާއިރާގެ ޖޭޕީ މެންބަރު އަލީ ހުސައިން ވިދާޅުވީ ރާއްޖޭގެ އީއީޒެޑް ކަނޑައެޅި، ބޭނުން ކުރަމުން އަންނަނިކޮށް އިމުގެ މައްސަލައިގައި ރިއްފަތު އަމަލު ކުރީ ގާނޫނާ ހިލާފަށް ކަމަށެވެ.
ރިއްފަތުގެ އިތުބާރު ނެތް ކަމުގެ މައްސަލަ މަޖިލީހަށް ވެއްދިނަމަވެސް، މަޖިލީހުގެ މެޖޯރިޓީ އޮންނަނީ ސަރުކާރަށެވެ. އެފަދަ މައްސަލައެއް މަޖިލީހަށް ހުށަހެޅެނީ 10 މެންބަރުންގެ ސޮއިންނެވެ. ފާސްވުމަށް މަޖިލީހުގެ ދެ ބައި ކުޅަ އެއްބައި ވޯޓު ބޭނުން ވެ އެވެ. އެއީ 43 ވޯޓެވެ.
