ހުޅުމާލޭ ދެ ވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓްތަކުގެ ކުލި 5300ރ. އަށް ކުޑަކޮށް އެކަން މިއަދު ސަރުކާރުން އިއުލާން ކޮށްފި އެވެ.
މިކަން އިއުލާން ކުރީ ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގަ އެވެ. އެހެންކަމުން, ދެން ހިޔާ ފްލެޓްތަކުން ކުލީގެ ގޮތުގައި ދައްކަން ޖެހޭނީ މެއިންޓެނަންސް ފީއާއެކު ޖުމްލަ 6300ރ. އެވެ.
ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ, މިއަދު ހިޔާ ފްލެޓުގެ ކުލި ކުޑަކުރަނީ ނޫން ކަމަށާއި, މިއީ ކުލި ދެއްކުމުގައި ލުޔެއް ހޯދައިދިނުން ކަމަށެވެ. އެހެންކަމުން, ކުލީގެ ގޮތުގައި ދައްކަން ޖެހޭ އަދަދު ކުޑަކުރީ ކުރިއަށް އޮތް ހަތް އަހަރު ދުވަހަށްކަން އޭނާ ފާހަގަކުރެއްވި އެވެ.
ހިޔާ ފްލެޓްތަކުގެ ތާރީހަށް އަލިއަޅުވާލަމުން އާބަންކޯގެ މެނޭޖިން ޑިރެކްޓަރު އަހުމަދު އާތިފް ވިދާޅުވީ ހިޔާ ފްލެޓްތަކުގެ ކޮންސްޓްރަކްޝަން ހަރަދާއި ޕްރޮޖެކްޓް މެނޭޖްމަންޓް ހަރަދާއި ސަޕްލިމެންޓްރީ އަދި އިދާރީ ހަރަދާއި, ބިމުގެ އަގާއި ލޯނުގެ އިންސްޓޯލްމަންޓަށް ބަލާއިރު, ކުލީގެ ގޮތުގައި ޖެހިފައި އޮތީ 10,000ރ. ކަމަށެވެ. ނަމަވެސް, ކުލީގެ ގޮތުގައި 7500ރ. ނަގަން ނިންމާ އެއްބަސްވުންތައް ހެދީ ހަމައެކަނި ކޮންސްޓްރަކްޝަން ހަރަދު ނަގާ ގޮތަށް ކަމަށް އާތިފް ވިދާޅުވި އެވެ.
"އޭރުވެސް އެވަނީ އެޕާޓްމަންޓަކުން 555,000 ސަބްސިޑައިޒް ކުރެވިފައި," މުޅި މަޝްރޫއުއިން ސަރުކާރުން 3.7 ބިލިއަން ރުފިޔާ ސަބްސިޑައިޒް ކުރިކަން ފާހަގަކުރައްވަމުން އާތިފް ވިދާޅުވި އެވެ.
އާތިފް އިތުރަށް ވިދާޅުވީ, ހިޔާ ރައްޔިތުންނަށް ލުއި ދިނުމުގެ ގޮތުން ފްލެޓްތަކުގެ ފިނިޝިން ނިންމަން ކުލި ނުހިނގާ ގޮތަށް ހަތް މަސް ދުވަހުގެ މުއްދަތެއް ދިން ކަމަށެވެ. އަދި, އެ ފްލެޓްތަކުގެ ކުލީގެ ގޮތުގައި އެވްރެޖުކޮށް އެޕާޓްމަންޓަކަށް 130,000ރ. ދާނެ ކަމަށް އަންދާޒާ ކުރެވޭ ކަމަށެވެ.
ކުލި ދެއްކުމުގައި ވަގުތީ ގޮތުން ލުޔެއް ދޭން ނިންމާފައި ވަނީ ފިނިޝިންގެ މަސައްކަތް ނިންމަން ގިނަ ފަރާތްތަކުން ލޯނު ނަގާފައިވާތީ އެ ލޯނު ދެއްކުމުގައި އެހީތެރިވުމުގެ ގޮތުންނެވެ.
މިއާއެކު ހިޔާ ފްލެޓްތަކަށް ކުލި ދައްކަން ޖެހޭ މުއްދަތު މިވަނީ ދެ އަހަރު އިތުރުވެފަ އެވެ. ދެން ފްލެޓްތަކަށް ފައިސާ ދައްކާ ހަލާސް ވާނީ 27 އަހަރުންނެވެ.
