ޕެރިސް (މެއި 8) - ހުއްދަ ނުހޯދައި، ސައުދީ އަރަބިއްޔާ އަށް ދިއުމުން ސަސްޕެންޑްކުރިތާ ހަ ދުވަސް ފަހުން ޕީއެސްޖީގެ ތަރި، ލިއޮނަލް މެސީ އެ ކްލަބްގެ ޕްރެކްޓިހުގައި ބައިވެރިވާން ފަށައިފި އެވެ.
މެސީ، 35، މި ދަތުރު ކުރި ދުވަހު، ކްލަބްގެ ޕްރެކްޓިހަށް ނާންނާތީ އާއި ޓީމުގެ ހުއްދަ ނެތި ދަތުރުކުރުމުން ސަސްޕެންޑްކުރީ ދެ ހަފްތާ އަށެވެ. އެކަމަކު، މެސީ މާފަށް އެދުމުން، މިއަދު، ޕީއެސްޖީން ވަނީ އެ ކްލަބްގެ ޕްރެކްޓިހުގައި ބައިވެރިވުމުގެ ހުއްދަދީފަ އެވެ.
އަންނަ މަހު 36 އަހަރު ފުރޭ މެސީ ޕީއެސްޖީ ކޮންޓްރެކްޓްގައި ހުރީ މި ސީޒަނުގެ ނިޔަލަށެވެ. ދިމާވި މައްސަލައިގެ ސަބަބުން މެސީ ޕީއެސްޖީގައި މަޑުނުކުރާނެކަން ގާތްގަނޑަކަށް ވަނީ ޔަގީންވެފަ އެވެ. މެސީ އާއި ނޭމާގެ ގޭ ކައިރީގައި ޕީއެސްޖީ ސަޕޯޓަރުން އެއްވެ، ކުޅުންތެރިންނާ ދެކޮޅަށް އަޑުގަދަކުރާ މަންޒަރުތައް ދައްކައިދޭ ވީޑިއޯތައް ސޯޝަލް މީޑިއާގައި ވައިރަލް ވެފަ އެވެ.
މެސީގެ ސޮއި ހޯދަން ސައުދީ އަރަބިއްޔާގެ އަލް ހިލާލް އާއި އޭނާގެ ކުރީގެ ކްލަބް، ބާސެލޯނާ އާއި އިޓާލިއަން ލީގުގެ ޓީމެއްގެ އިތުރުން އެމެރިކާ ލީގު، މޭޖަ ލީގު ސޮކާ (އެމްއެލްއެސް)ގެ ކްލަބެއް ވެސް ހިމެނެ އެވެ.
ބާސެލޯނާ އިން އަލުން މެސީ ގެންދާނަމަ އެ ކްލަބްގެ މާލީ ހާލަތު ރަނގަޅު ކުރަން ޖެހެ އެވެ. އެ މަސައްކަތުގައި ލަލީގާ އިން ވެސް އެހީތެރިވާން އޮތީ ތައްޔާރަށެވެ.
