ދޯހާ، ގަތަރު (މޭ 8) - ސީރިއާގެ ރައީސް ބައްޝާރުލް އަސަދްއާ ދެކޮޅު ގަތަރުން ސީރިއާއާ އެކު ޑިޕްލޮމެޓިކް ގުޅުން އަލުން ގާއިމްނުކުރާނެ ކަމަށް އާދީއްތަ ދުވަހު ބުނެފި އެވެ.
ގަތަރުން އެހެން ބުނީ ސީރިއާއަށް އަލުން އަރަބި ލީގުގެ މެމްބަރުކަން ދިނުމާ ގުޅިގެންނެވެ. ގަތަރު ހިމެނޭ ގޮތަށް، އަރަބި ލީގުގެ ހުރިހާ ގައުމަކުން ވެސް އެއްބަސްވީ ސީރިއާއަށް މެމްބަރުކަން ދިނުމަށެވެ.
އަރަބި ލީގުން 2011 ވަނަ އަހަރު ސީރިއާ އެކަހެރި ކުރީ އެ ގައުމުގެ އިދިކޮޅު ފަރާތްތަކާ ދެކޮޅަށް ރައީސް ބައްޝާރުލް އަސަދް ކުރިއަށް ގެންދެވި ކެމްޕެއިނާ ގުޅިގެންނެވެ.
"ސީރިއާގެ ސަރުކާރާ އެކު ގުޅުން ގާއިމްނުކުރަން ގަތަރުން ނިންމާފައި އޮތް ނިންމުމަށް ބަދަލެއް ނާދޭ،" އެ ގައުމުގެ ފޮރިން މިނިސްޓްރީގެ ތަރުޖަމާނު މާޖިދް ބިން މުހައްމަދު އަލް އަންސާރީ ވިދާޅުވި އެވެ.
އޭނާ ވިދާޅުވީ އަރަބި ގައުމުތަކުގެ ވިސްނުމަށް ގަތަރުން އެއްބާރުލުން ދިން ނަމަވެސް، ގަތަރާއި ސީރިއާއާ ދެމެދު ގުޅުން ގާއިމްކުރެވޭނީ ސިޔާސީ ގޮތުން ސީރިއާއިން ހޯދާ ކުރިއެރުންތަކަށް ބެލުމަށް ފަހުގައި ކަމަށެވެ.
"ސީރިއާ ބޮއިކޮޓް ކުރަން އަޅުގަނޑުމެންނަށް މަޖުބޫރުވި ސަބަބުތައް ބަލައި، އެކަން ހައްލު ކުރުމަކީ އަސަދުގެ ސަރުކާރުން ކުރަން ޖެހޭ ކަމެއް."
ސީރިއާގެ ދާހިލީ ހަމަނުޖެހުމާ އެކު ހަނގުރާމަ ފެށުމުން، ބައްޝާރުލް އަސަދްގެ ސަރުކާރު އޮތީ އަރަބި ދުނިޔެއާ އެކަހެރިވެފަ އެވެ. އަދިވެސް ދާހިލީ ހަމަނުޖެހުމަށް ހައްލެއް ނުލިބެ އެވެ. މި ވަގުތު ސީރިއާގެ އުތުރުގެ ބޮޑު ސަރަހައްދެއް އޮތީ އިދިކޮޅު ގްރޫޕްތަކުގެ ކޮންޓްރޯލްގެ ދަަށުގަ އެވެ.
