މިއުނިކް (މެއި 7) - ޖަރުމަނު ލީގުގައި ރޭ ކުޅުނު މެޗުން ވާޑާ ބްރެމެން 2-1 އިން ބަލިކޮށް ބަޔާން މިއުނިކުން ލީގުގެ ކުރީގައި ލީޑެއް ނަގައި ހަމަޖެހިލައިފި އެވެ.
ބަޔާން އެއް ވަނައިގައި އޮތީ ދެ ވަނައިގައި އޮތް ޑޯޓްމަންޑަށް ވުރެ އެއް މެޗު އިތުރަށް ކުޅެ، ހަތަރު ޕޮއިންޓުގެ ލީޑަކާ އެކު އެވެ. ބަޔާނަށް 31 މެޗުން 65 ޕޮއިންޓް ލިބިފައިވާއިރު، ދެ ވަނައިގައި އޮތް ޑޯޓްމަންޑަށް ވަނީ 30 މެޗުން 61 ޕޮއިންޓް ލިބިފަ އެވެ. ޑޯޓްމަންޑުން މިރޭ ކުޅޭ މެޗުން މޮޅުވެއްޖެނަމަ، ބަޔާންގެ ލީޑު އެއް ޕޮއިންޓަށް ކުޑަވާނެ އެވެ.
ލީގުގެ ތިން ވަނައިގައި އޮތީ ފްރައިބާގް ދަނޑުގައި 1-0 އިން މޮޅުވި، އާރްބީ ލައިޕްޒިގު އެވެ. ލައިޕްޒިގަށް ވަނީ 31 މެޗުން 57 ޕޮއިންޓް ލިބިފަ އެވެ.
ރޭގެ މެޗުގެ 19 ވަނަ މިނިޓްގައި ބަޔާންގެ ޔޯސުއާ ކިމިކް ނެގި ހިލޭ ޖެހުމެއް ޖަހަން އެރި ބެންޖަމިން ޕަވާޑް ބޮލުން ފޮނުވާލި ބޯޅަ ބްރެމެން ކީޕަރު ޖިރީ ޕަވަލެންކާ ވަނީ މަތަކޮށްފަ އެވެ.
މެޗުގެ 55 ވަނަ މިނިޓްގައި ބަޔާންގެ ސާޖް ގްނަބްރީ ދިން ބޯޅައަކުން ސަޑިއޯ މާނޭ ހުސްކޮށްހުރެފައި ޖެހި ބޯޅަ ދިޔައީ ގޯލާ ސީދާނުވެ އެވެ. އޭގެ ހަ މިނިޓް ފަހުން، ބްރެމެން އޭރިއާތެރެއިން ލިބުނު ބޯޅައެއް ހޯދައި، ގްނަބްރީ ވަނީ ބަޔާނަށް ލީޑުނަގައިދީފަ އެވެ. މެޗުގެ 71 ވަނަ މިނިޓްގައި ލެރޯއި ސާނޭ ވަނީ ތިރިތިރިން ގޯލުގެ ދުރު ކަނަށް ބޯޅަ ފޮނުވާލައިގެން ބަޔާންގެ ލީޑުފުޅާކޮށްދީފަ އެވެ.
ބްރެމެން އަށް މެޗުގައި ޖަހައިދިން ހަމައެކަނި ގޯލު 86 ވަަނަ މިނިޓްގައި އޭރިއާބޭރުން ޖަަހައިިދިނީ ނިކްލަސް ޝްމިޑްޓް އެވެ. މިއީ އޭރިއާބޭރުން ގޯލުގެ މަތީ ކަނަށް ބޯޅަ ފޮނުވާލައިގެން، ޝްމިޑްޓް ޖެހި މޮޅު ގޯލެކެވެ.
