ބެލްގްރޭޑް، ސާބިއާ (މޭ 5) - ބުރާސްފަތި ދުވަހުގެ ދަންވަރުގެ ވަގުތެއްގައި ބެލްގްރޭޑް ކައިރި އަވަށެއްގައި ކާރެއް ދުއްވާފައި ދިޔަ މީހަކު ބަޑި ޖަހައި އަށް މީހުން މަރާލައިފި އެވެ.
އެ ހާދިސާގައި 13 މީހުންނަށް އަނިޔާވި އެވެ. މިއީ ހަފުތާއެއްގެ ތެރޭގައި ސާބިއާގައި ހިނގި އެފަދަ ދެ ވަނަ ހާދިސާ އެވެ. ހަމަލާގެ ތުހުމަތު ކުރެވޭ 21 އަހަރުގެ މީހާ ބަޑި ޖެހުމަށް ފަހު ފިލީ އެވެ.
ފުލުހުން އޭނާ ހައްޔަރު ކުރަން ބޮޑު އޮޕަރޭޝަނެއް ހިންގި އެވެ. ހައްޔަރު ކުރި އިރު، އޭނާގެ އަތުގައި އޮޓޮމެޓިކް ބަޑިއެއް އޮތް ކަމަށް ރިޕޯޓުތައް ބުނެ އެވެ. އޭގެ އިތުރުން ހަތަރު ގްރެނޭޑާއި ގިނަ އަދަދެއްގެ ވަޒަން ވެސް އޭނާގެ އަތުގައި ހުއްޓެވެ.
މިދިޔަ ބުދަ ދުވަހު ވެސް ސާބިއާގެ ސްކޫލެއްގައި 13 އަހަރުގެ ފިރިހެން ކުއްޖަކު ވަނީ ބަޑި ޖަހައި އަށް ކުދިންނާއި ސެކިއުރިޓީ ގާޑަކު މަރާލައިފަ އެވެ.
ސާބިއާގައި ހަތިޔާރު ގިނަ ނަމަވެސް، ބަޑި ޖަހައި އެއް ފަހަރާ ގިނަ ބަޔަކު މެރުމުގެ ހާދިސާތައް ހިނގަނީ ވަރަށް މަދުންނެވެ. އެހެންވެ، އެ ގައުމުގެ ގިނަ ބަޔަކަށް ވަނީ ޝޮކެއް ލިބިފަ އެވެ.
އެ ގައުމުގެ ރައީސް އެލެކްސެންޑަރް ވުޗިޗް ހުކުރު ދުވަހު ވިދާޅުވީ ބަޑި ގެންގުޅުން ކޮންޓްރޯލް ކުރަން ވަރުގަދަ ފިޔަވަޅުތަކެއް އަޅާނެ ކަމަށެވެ.
