މޮސްކޯ، ރަޝިއާ (މޭ 4) - ޑްރޯން ހަމަލާއެއްގައި ރަޝިއާގެ ދެކުނުގައި ހުންނަ ތެޔޮ ކާރުހާނާއެއްގައި އަލިފާން ރޯވެފައިވާ ކަމަށް ދައުލަތުގެ ނިއުސް އެޖެންސީ ޓަސްއިން ބުނެފި އެވެ.
ތެޔޮ ކާރުހާނާއަކަށް ޑްރޯން ހަމަލާއެއް ދީފައިވާ އިރު، ބުދަ ދުވަހުގެ ރޭ ރައީސް ލެޑިމިއަ ޕުޓިން އަވަހާރަކޮށްލަން ކްރެމްލިންއަށް ޑްރޯން ހަމަލާ ދޭން އުޅުނު ކަމަށް ވެސް ރަޝިއާއިން ބުނެ އެވެ.
ކްރެމްލިންއަށް ފޮނުވި ދެ ޑްރޯން ވައްޓާލި ކަމަށް ރަޝިއާއިން ބުނާ އިރު، ހަމަލާ ދިން ކަމަށް ކުރާ ތުހުމަތުތައް ޔޫކްރެއިނުން ދޮގުކުރެ އެވެ.
އެމެޖެންސީ އޮފިޝަލުންނާ ހަވާލަދީ ޓަސް ނިއުސް އެޖެންސީން ބުނީ ދެކުނު ކްރަސްނޮޑާ ސަރަހައްދުގައި ހުންނަ ތެޔޮ ކާރުހާނާގައި ރޯވީ ގޮތް ނޭނގޭ ޑްރޯންއެއް ދިން ހަމަލާއެއްގައި ކަމަށެވެ.
ކްރަސްނޮޑާގެ ގަވަރުނަރު ވެނިއަމިން ކޮންޑްރަތްޔޭވް ވިދާޅުވީ އަލިފާން ރޯވީ 4300 އަކަފޫޓުގެ ހިސާބެއްގައި ކަމަށާއި ވަރަށް އަވަހަށް އަލިފާންގަނޑު ނިއްވާލެވުނު ކަމަށެވެ.
އެ ތަނާ ކައިރީގައި އޮންނަ ވޮލްނާ އަވަށުގެ ތެޔޮ ކާރުހާނާއެއްގައި ވެސް އަލިފާން ރޯވި ކަމަށް އޮފިޝަލުން ބުނެ އެވެ. އެ ތަނުގައި ރޯވާން މެދުވެރިވީ ވެސް ޑްރޯންއެއްގެ ސަބަބުން ކަމަށް ބެލެވެ އެވެ.
